6 shlokas
- 1
तद् आहुर्यद्ग्रहान्मे ऽग्रहीत्प्राचारीन्म आहुतीर्मे ऽहौषीद् इत्य् अध्वर्यवे दक्षिणा नीयन्त उदगासीन्म इत्य् उद्गात्रे ऽन्ववोचन्मे ऽशंसीन्मे ऽयाक्षीन्म इति होत्रे किं स्विद् एव चक्रुषे ब्रह्मणे दक्षिणा नीयन्ते ऽकृत्वाहो स्विद् एव हरता इति
tad āhuryadgrahānme 'grahītprācārīnma āhutīrme 'hauṣīd ity adhvaryave dakṣiṇā nīyanta udagāsīnma ity udgātre 'nvavocanme 'śaṃsīnme 'yākṣīnma iti hotre kiṃ svid eva cakruṣe brahmaṇe dakṣiṇā nīyante 'kṛtvāho svid eva haratā iti
- 2
यज्ञस्य हैष भिषग्यद्ब्रह्मा यज्ञायैव तद्भेषजं कृत्वा हरति
yajñasya haiṣa bhiṣagyadbrahmā yajñāyaiva tadbheṣajaṃ kṛtvā harati
- 3
अथो यद्भूयिष्ठेनैव ब्रह्मणा छन्दसां रसेनार्त्विज्यं करोति यद्ब्रह्मा तस्माद्ब्रह्मार्धभाग्घ वा एष इतरेषाम् ऋत्विजाम् अग्र आस यद्ब्रह्मार्धम् एव ब्रह्मण आसार्धम् इतरेषाम् ऋत्विजाम्
atho yadbhūyiṣṭhenaiva brahmaṇā chandasāṃ rasenārtvijyaṃ karoti yadbrahmā tasmādbrahmārdhabhāggha vā eṣa itareṣām ṛtvijām agra āsa yadbrahmārdham eva brahmaṇa āsārdham itareṣām ṛtvijām
- 4
तस्माद्यदि यज्ञ ऋक्त आर्तिः स्याद्यदि यजुष्टो यदि सामतो यद्य् अविज्ञाता सर्वव्यापद्वा ब्रह्मण एव निवेदयन्ते तस्माद्यदि यज्ञ ऋक्त आर्तिर्भवति भूर् इति ब्रह्मा गार्हपत्ये जुहुयाद्यदि यजुष्टो भुव इत्य् आग्नीध्रीये ऽन्वाहार्यपचने वा हविर्यज्ञेषु यदि सामतः स्वर् इत्य् आहवनीये यद्य् अविज्ञाता सर्वव्यापद्वा भूर्भुवः स्वर् इति सर्वा अनुद्रुत्याहवनीय एव जुहुयात्
tasmādyadi yajña ṛkta ārtiḥ syādyadi yajuṣṭo yadi sāmato yady avijñātā sarvavyāpadvā brahmaṇa eva nivedayante tasmādyadi yajña ṛkta ārtirbhavati bhūr iti brahmā gārhapatye juhuyādyadi yajuṣṭo bhuva ity āgnīdhrīye 'nvāhāryapacane vā haviryajñeṣu yadi sāmataḥ svar ity āhavanīye yady avijñātā sarvavyāpadvā bhūrbhuvaḥ svar iti sarvā anudrutyāhavanīya eva juhuyāt
- 5
स प्रस्तोतोपाकृते स्तोत्र आह ब्रह्मन्स्तोष्यामः प्रशास्तर् इति स भूर् इति ब्रह्मा प्रातःसवने ब्रूयाद् इन्द्रवन्तः स्तुध्वम् इति भुव इति माध्यंदिने सवने ब्रूयाद् इन्द्रवन्तः स्तुध्वम् इति स्वर् इति तृतीयसवने ब्रूयाद् इन्द्रवन्तः स्तुध्वम् इति भूर्भुवः स्वर् इत्य् उक्थे वातिरात्रे वा ब्रूयाद् इन्द्रवन्तः स्तुध्वम् इति
sa prastotopākṛte stotra āha brahmanstoṣyāmaḥ praśāstar iti sa bhūr iti brahmā prātaḥsavane brūyād indravantaḥ studhvam iti bhuva iti mādhyaṃdine savane brūyād indravantaḥ studhvam iti svar iti tṛtīyasavane brūyād indravantaḥ studhvam iti bhūrbhuvaḥ svar ity ukthe vātirātre vā brūyād indravantaḥ studhvam iti
- 6
स यद् आहेन्द्रवन्तः स्तुध्वम् इत्य् ऐन्द्रो वै यज्ञ इन्द्रो यज्ञस्य देवता सेन्द्रम् एव तद् उद्गीथं करोतीन्द्रान्मा गाद् इन्द्रवन्तः स्तुध्वम् इति एवैनांस्तद् आह तद् आह
sa yad āhendravantaḥ studhvam ity aindro vai yajña indro yajñasya devatā sendram eva tad udgīthaṃ karotīndrānmā gād indravantaḥ studhvam iti evaināṃstad āha tad āha

