10 shlokas
- 1
ते ततः सर्पन्ति ते सदः सम्प्रपद्यन्ते यथायथम् अन्य ऋत्विजो व्युत्सर्पन्ति संसर्पन्त्य् उद्गातारस्ते सर्पराज्ञ्या ऋक्षु स्तुवते
te tataḥ sarpanti te sadaḥ samprapadyante yathāyatham anya ṛtvijo vyutsarpanti saṃsarpanty udgātāraste sarparājñyā ṛkṣu stuvate
- 2
इयं वै सर्पराज्ञीयं हि सर्पतो राज्ञीयं वा अलोमिकेवाग्र आसीत्सैतम्मन्त्रम् अपश्यद् आयं गौः पृश्निर् अक्रमीद् इति ताम् अयम्पृश्निर्वर्ण आविशन्नानारूपो यं यं कामम् अकामयत यद् इदं किंचौषधयो वनस्पतयः सर्वाणि रूपाणि
iyaṃ vai sarparājñīyaṃ hi sarpato rājñīyaṃ vā alomikevāgra āsītsaitammantram apaśyad āyaṃ gauḥ pṛśnir akramīd iti tām ayampṛśnirvarṇa āviśannānārūpo yaṃ yaṃ kāmam akāmayata yad idaṃ kiṃcauṣadhayo vanaspatayaḥ sarvāṇi rūpāṇi
- 3
पृश्निर् एनं वर्ण आविशति नानारूपो यं यं कामं कामयते य एवं वेद
pṛśnir enaṃ varṇa āviśati nānārūpo yaṃ yaṃ kāmaṃ kāmayate ya evaṃ veda
- 4
मनसा प्रस्तौति मनसोद्गायति मनसा प्रतिहरति वाचा शंसति
manasā prastauti manasodgāyati manasā pratiharati vācā śaṃsati
- 5
वाक्च वै मनश्च देवानाम्मिथुनं देवानाम् एव तन्मिथुनेन मिथुनम् अवरुन्धते देवानाम्मिथुनेन मिथुनम्प्रजायन्ते प्रजात्यै प्रजायते प्रजया पशुभिर्य एवं वेद
vākca vai manaśca devānāmmithunaṃ devānām eva tanmithunena mithunam avarundhate devānāmmithunena mithunamprajāyante prajātyai prajāyate prajayā paśubhirya evaṃ veda
- 6
अथ चतुर्होतॄन्होता व्याचष्टे तद् एव तत्स्तुतम् अनुशंसति
atha caturhotṝnhotā vyācaṣṭe tad eva tatstutam anuśaṃsati
- 7
देवानां वा एतद्यज्ञियं गुह्यं नाम यच्चतुर्होतारस्तद्यच्चतुर्होतॄन्होता व्याचष्टे देवानाम् एव तद्यज्ञियं गुह्यं नाम प्रकाशं गमयति तद् एनम्प्रकाशं गतम्प्रकाशम्गमयति
devānāṃ vā etadyajñiyaṃ guhyaṃ nāma yaccaturhotārastadyaccaturhotṝnhotā vyācaṣṭe devānām eva tadyajñiyaṃ guhyaṃ nāma prakāśaṃ gamayati tad enamprakāśaṃ gatamprakāśamgamayati
- 8
गच्छति प्रकाशं य एवं वेद
gacchati prakāśaṃ ya evaṃ veda
- 9
यम्ब्राह्मणम् अनूचानं यशो नर्च्छेद् इति ह स्माहारण्यम्परेत्य दर्भस्तम्बान् उद्ग्रथ्य दक्षिणतो ब्रह्माणम् उपवेश्य चतुर्होतॄन्व्याचक्षीत
yambrāhmaṇam anūcānaṃ yaśo narcched iti ha smāhāraṇyamparetya darbhastambān udgrathya dakṣiṇato brahmāṇam upaveśya caturhotṝnvyācakṣīta
- 10
देवानां वा एतद्यज्ञियं गुह्यं नाम यच्चतुर्होतारस्तद्यच्चतुर्होतॄन्व्याचक्षीत देवानाम् एव तद्यज्ञियं गुह्यं नाम प्रकाशं गमयति तद् एनम्प्रकाशं गतम्प्रकाशं गमयति गच्छति प्रकाशं य एवं वेद
devānāṃ vā etadyajñiyaṃ guhyaṃ nāma yaccaturhotārastadyaccaturhotṝnvyācakṣīta devānām eva tadyajñiyaṃ guhyaṃ nāma prakāśaṃ gamayati tad enamprakāśaṃ gatamprakāśaṃ gamayati gacchati prakāśaṃ ya evaṃ veda

