25 shlokas
- 1
यद्वै नेति न प्रेति यत्स्थितं तद् अष्टमस्याह्नो रूपम्
yadvai neti na preti yatsthitaṃ tad aṣṭamasyāhno rūpam
- 2
यद्ध्य् एव द्वितीयम् अहस्तद् एवैतत्पुनर्यद् अष्टमम्
yaddhy eva dvitīyam ahastad evaitatpunaryad aṣṭamam
- 3
यद् ऊर्ध्ववद्यत्प्रतिवद्यद् अन्तर्वद्यद्वृषण्वद्यद्वृधन्वद्यन्मध्यमे पदे देवता निरुच्यते यद् अन्तरिक्षम् अभ्युदितम्
yad ūrdhvavadyatprativadyad antarvadyadvṛṣaṇvadyadvṛdhanvadyanmadhyame pade devatā nirucyate yad antarikṣam abhyuditam
- 4
यद्द्व्यग्नि यन्महद्वद्यद्द्विहूतवद्यत्पुनर्वद्यत्कुर्वत्
yaddvyagni yanmahadvadyaddvihūtavadyatpunarvadyatkurvat
- 5
यद्द्वितीयस्याह्नो रूपम् एतानि वा अष्टमस्याह्नो रूपाणि
yaddvitīyasyāhno rūpam etāni vā aṣṭamasyāhno rūpāṇi
- 6
अग्निं वो देवम् अग्निभिः सजोषा इत्य् अष्टमस्याह्न आज्यम्भवति द्व्यग्न्य् अष्टमे ऽहन्य् अष्टमस्याह्नो रूपम्
agniṃ vo devam agnibhiḥ sajoṣā ity aṣṭamasyāhna ājyambhavati dvyagny aṣṭame 'hany aṣṭamasyāhno rūpam
- 7
तद् उ त्रैष्टुभं त्रिष्टुप्प्रातःसवन एष त्र्यहः
tad u traiṣṭubhaṃ triṣṭupprātaḥsavana eṣa tryahaḥ
- 8
कुविद् अङ्ग नमसा ये वृधासः पीवोअन्नाꣳ रयिवृधः सुमेधा उच्छन्न् उषसः सुदिना अरिप्रा उशन्ता दूता न दभाय गोपा यावत्तरस्तन्वो यावद् ओजः प्रति वां सूर उदिते सूक्तैर्धेनुः प्रत्नस्य काम्यं दुहाना ब्रह्मा णा इन्द्रोप याहि विद्वान् ऊर्ध्वो अग्निः सुमतिं वस्वो अश्रेद् उत स्या नः सरस्वती जुषाणेति प्रौगम्प्रतिवद् अन्तर्वद्द्विहूतवद् ऊर्ध्ववद् अष्टमे ऽहन्य् अष्टमस्याह्नो रूपम्
kuvid aṅga namasā ye vṛdhāsaḥ pīvoannām̐ rayivṛdhaḥ sumedhā ucchann uṣasaḥ sudinā ariprā uśantā dūtā na dabhāya gopā yāvattarastanvo yāvad ojaḥ prati vāṃ sūra udite sūktairdhenuḥ pratnasya kāmyaṃ duhānā brahmā ṇā indropa yāhi vidvān ūrdhvo agniḥ sumatiṃ vasvo aśred uta syā naḥ sarasvatī juṣāṇeti praugamprativad antarvaddvihūtavad ūrdhvavad aṣṭame 'hany aṣṭamasyāhno rūpam
- 9
तद् उ त्रैष्टुभं त्रिष्टुप्प्रातःसवन एष त्र्यहः
tad u traiṣṭubhaṃ triṣṭupprātaḥsavana eṣa tryahaḥ
- 10
विश्वानरस्य वस्पतिम् इन्द्र इत्सोमपा एक इन्द्र नेदीय एद् इह्य् उत्तिष्ठ ब्रह्मणस्पते ऽग्निर्नेता त्वं सोम क्रतुभिः पिन्वन्त्य् अपो बृहद् इन्द्राय गायतेति द्वितीयेनाह्ना समान आतानो ऽष्टमे ऽहन्य् अष्टमस्याह्नो रूपम्
viśvānarasya vaspatim indra itsomapā eka indra nedīya ed ihy uttiṣṭha brahmaṇaspate 'gnirnetā tvaṃ soma kratubhiḥ pinvanty apo bṛhad indrāya gāyateti dvitīyenāhnā samāna ātāno 'ṣṭame 'hany aṣṭamasyāhno rūpam
- 11
शंसा महाम् इन्द्रं यस्मिन्विश्वा इति सूक्तम्महद्वद् अष्टमे ऽहन्य् अष्टमस्याह्नो रूपम्
śaṃsā mahām indraṃ yasminviśvā iti sūktammahadvad aṣṭame 'hany aṣṭamasyāhno rūpam
- 12
महश्चित्त्वम् इन्द्र यत एतान् इति सूक्तम्महद्वद् अष्टमे ऽहन्य् अष्टमस्याह्नो रूपम्
mahaścittvam indra yata etān iti sūktammahadvad aṣṭame 'hany aṣṭamasyāhno rūpam
- 13
पिबा सोमम् अभि यम् उग्र तर्द इति सूक्तम् ऊर्वं गव्यम्महि गृणान इन्द्रेति महद्वद् अष्टमे ऽहन्य् अष्टमस्याह्नो रूपम्
pibā somam abhi yam ugra tarda iti sūktam ūrvaṃ gavyammahi gṛṇāna indreti mahadvad aṣṭame 'hany aṣṭamasyāhno rūpam
- 14
महाꣳ इन्द्रो नृवद् आ चर्षणिप्रा इति सूक्तम्महद्वद् अष्टमे ऽहनि अष्टमस्याह्नो रूपम्
mahām̐ indro nṛvad ā carṣaṇiprā iti sūktammahadvad aṣṭame 'hani aṣṭamasyāhno rūpam
- 15
तद् उ त्रैष्टुभं तेन प्रतिष्ठितपदेन सवनं दाधारायतनाद् एवैतेन न प्रच्यवते
tad u traiṣṭubhaṃ tena pratiṣṭhitapadena savanaṃ dādhārāyatanād evaitena na pracyavate
- 16
तम् अस्य द्यावापृथिवी सचेतसेति सूक्तं यद् ऐत्कृण्वानो महिमानम् इन्द्रियम् इति महद्वद् अष्टमे ऽहन्य् अष्टमस्याह्नो रूपम्
tam asya dyāvāpṛthivī sacetaseti sūktaṃ yad aitkṛṇvāno mahimānam indriyam iti mahadvad aṣṭame 'hany aṣṭamasyāhno rūpam
- 17
तद् उ जागतं जगत्यो वा एतस्य त्र्यहस्य मध्यंदिनं वहन्ति तद्वै तच्छन्दो वहति यस्मिन्निविद्धीयते तस्माज्जगतीषु निविदं दधाति
tad u jāgataṃ jagatyo vā etasya tryahasya madhyaṃdinaṃ vahanti tadvai tacchando vahati yasminnividdhīyate tasmājjagatīṣu nividaṃ dadhāti
- 18
मिथुनानि सूक्तानि शस्यन्ते त्रैष्टुभानि च जागतानि च मिथुनं वै पशवः पशवश्छन्दोमाः पशूनाम् अवरुद्ध्यै
mithunāni sūktāni śasyante traiṣṭubhāni ca jāgatāni ca mithunaṃ vai paśavaḥ paśavaśchandomāḥ paśūnām avaruddhyai
- 19
महद्वन्ति सूक्तानि शस्यन्ते महद्वा अन्तरिक्षम् अन्तरिक्षस्याप्त्यै
mahadvanti sūktāni śasyante mahadvā antarikṣam antarikṣasyāptyai
- 20
पञ्च सूक्तानि शस्यन्ते पञ्चपदा पङ्क्तिः पाङ्क्तो यज्ञः पाङ्क्ताः पशवः पशवश्छन्दोमाः पशूनाम् अवरुद्ध्यै
pañca sūktāni śasyante pañcapadā paṅktiḥ pāṅkto yajñaḥ pāṅktāḥ paśavaḥ paśavaśchandomāḥ paśūnām avaruddhyai
- 21
अभि त्वा शूर नोनुमो ऽभि त्वा पूर्वपीतय इति रथंतरं पृष्ठं भवत्य् अष्टमे ऽहनि
abhi tvā śūra nonumo 'bhi tvā pūrvapītaya iti rathaṃtaraṃ pṛṣṭhaṃ bhavaty aṣṭame 'hani
- 22
यद्वावानेति धाय्याच्युता
yadvāvāneti dhāyyācyutā
- 23
त्वाम् इद्धि हवामह इति बृहतो योनिम् अनु निवर्तयति बार्हतं ह्य् एतद् अहर् आयतनेन
tvām iddhi havāmaha iti bṛhato yonim anu nivartayati bārhataṃ hy etad ahar āyatanena
- 24
उभयं शृणवच्च न इति सामप्रगाथो यच्चेदम् अद्य यद् उ च ह्य आसीद् इति बार्हते ऽहन्य् अष्टमे ऽहनि अष्टमस्याह्नो रूपम्
ubhayaṃ śṛṇavacca na iti sāmapragātho yaccedam adya yad u ca hya āsīd iti bārhate 'hany aṣṭame 'hani aṣṭamasyāhno rūpam
- 25
त्यम् ऊ षु वाजिनं देवजूतम् इति तार्क्ष्यो ऽच्युतः
tyam ū ṣu vājinaṃ devajūtam iti tārkṣyo 'cyutaḥ

