22 shlokas
- 1
विश्वे वै देवा देवतास्तृतीयम् अहर्वहन्ति सप्तदशः स्तोमो वैरूपं साम जगती छन्दः
viśve vai devā devatāstṛtīyam aharvahanti saptadaśaḥ stomo vairūpaṃ sāma jagatī chandaḥ
- 2
यथादेवतम् एनेन यथास्तोमं यथासाम यथाछन्दसं राध्नोति य एवं वेद
yathādevatam enena yathāstomaṃ yathāsāma yathāchandasaṃ rādhnoti ya evaṃ veda
- 3
यद्वै समानोदर्कं तत्तृतीयस्याह्नो रूपं यद् अश्ववद्यद् अन्तवद्यत्पुनरावृत्तं यत्पुनर्निनृत्तं यद्रतवद्यत्पर्यस्तवद्यत्त्रिवद्यद् अन्तरूपं यद् उत्तमे पदे देवता निरुच्यते यद् असौ लोको ऽभ्युदितो यद्वैरूपं यज्जागतं यत्कृतम् एतानि वै तृतीयस्याह्नो रूपाणि
yadvai samānodarkaṃ tattṛtīyasyāhno rūpaṃ yad aśvavadyad antavadyatpunarāvṛttaṃ yatpunarninṛttaṃ yadratavadyatparyastavadyattrivadyad antarūpaṃ yad uttame pade devatā nirucyate yad asau loko 'bhyudito yadvairūpaṃ yajjāgataṃ yatkṛtam etāni vai tṛtīyasyāhno rūpāṇi
- 4
युक्ष्वा हि देवहूतमाꣳ अश्वाꣳ अग्ने रथीर् इवेति तृतीयस्याह्न आज्यम्भवति
yukṣvā hi devahūtamām̐ aśvām̐ agne rathīr iveti tṛtīyasyāhna ājyambhavati
- 5
देवा वै तृतीयेनाह्ना स्वर्गं लोकम् आयंस्तान् असुरा रक्षांस्य् अन्ववारयन्त ते विरूपा भवत विरूपा भवतेति भवन्त आयंस्ते यद्विरूपा भवत विरूपा भवतेति भवन्त आयंस्तद्वैरूपं सामाभवत्तद्वैरूपस्य वैरूपत्वम्
devā vai tṛtīyenāhnā svargaṃ lokam āyaṃstān asurā rakṣāṃsy anvavārayanta te virūpā bhavata virūpā bhavateti bhavanta āyaṃste yadvirūpā bhavata virūpā bhavateti bhavanta āyaṃstadvairūpaṃ sāmābhavattadvairūpasya vairūpatvam
- 6
विरूपः पाप्मना भूत्वा पाप्मानम् अपहते य एवं वेद
virūpaḥ pāpmanā bhūtvā pāpmānam apahate ya evaṃ veda
- 7
तान्ह स्मान्व् एवागच्छन्ति सम् एव सृज्यन्ते तान् अश्वा भूत्वा पद्भिर् अपाघ्नत यद् अश्वा भूत्वा पद्भिर् अपाघ्नत तद् अश्वानाम् अश्वत्वम्
tānha smānv evāgacchanti sam eva sṛjyante tān aśvā bhūtvā padbhir apāghnata yad aśvā bhūtvā padbhir apāghnata tad aśvānām aśvatvam
- 8
अश्नुते यद्यत्कामयते य एवं वेद
aśnute yadyatkāmayate ya evaṃ veda
- 9
तस्माद् अश्वः पशूनां जविष्ठस्तस्माद् अश्वः प्रत्यङ्पदा हिनस्ति
tasmād aśvaḥ paśūnāṃ javiṣṭhastasmād aśvaḥ pratyaṅpadā hinasti
- 10
अप पाप्मानं हते य एवं वेद
apa pāpmānaṃ hate ya evaṃ veda
- 11
तस्माद् एतद् अश्ववद् आज्यम्भवति तृतीये ऽहनि तृतीयस्याह्नो रूपम्
tasmād etad aśvavad ājyambhavati tṛtīye 'hani tṛtīyasyāhno rūpam
- 12
वायव् आ याहि वीतये वायो याहि शिवा दिव इन्द्रश्च वायव् एषां सुतानाम् आ मित्रे वरुणे वयम् अश्विनाव् एह गच्छतम् आ याह्य् अद्रिभिः सुतं सजूर्विश्वेभिर्देवेभिर् उत नः प्रिया प्रियास्व् इत्य् औष्णिहम्प्रौगं समानोदर्कं तृतीये ऽहनि तृतीयस्याह्नो रूपम्
vāyav ā yāhi vītaye vāyo yāhi śivā diva indraśca vāyav eṣāṃ sutānām ā mitre varuṇe vayam aśvināv eha gacchatam ā yāhy adribhiḥ sutaṃ sajūrviśvebhirdevebhir uta naḥ priyā priyāsv ity auṣṇihampraugaṃ samānodarkaṃ tṛtīye 'hani tṛtīyasyāhno rūpam
- 13
तं तम् इद्राधसे महे त्रय इन्द्रस्य सोमा इति मरुत्वतीयस्य प्रतिपदनुचरौ निनृत्तवत्त्रिवत्तृतीये ऽहनि तृतीयस्याह्नो रूपम्
taṃ tam idrādhase mahe traya indrasya somā iti marutvatīyasya pratipadanucarau ninṛttavattrivattṛtīye 'hani tṛtīyasyāhno rūpam
- 14
इन्द्र नेदीय एद् इहीत्य् अच्युतः प्रगाथः प्र नूनम्ब्रह्मणस्पतिर् इति ब्राह्मणस्पत्यो निनृत्तवांस्तृतीये ऽहनि तृतीयस्याह्नो रूपम्
indra nedīya ed ihīty acyutaḥ pragāthaḥ pra nūnambrahmaṇaspatir iti brāhmaṇaspatyo ninṛttavāṃstṛtīye 'hani tṛtīyasyāhno rūpam
- 15
अग्निर्नेता त्वं सोम क्रतुभिः पिन्वन्त्य् आप इति धाय्या अच्युताः
agnirnetā tvaṃ soma kratubhiḥ pinvanty āpa iti dhāyyā acyutāḥ
- 16
नकिः सुदासो रथम्पर्य् आस न रीरमद् इति मरुत्वतीयः प्रगाथः पर्यस्तवांस्तृतीये ऽहनि तृतीयस्याह्नो रूपम्
nakiḥ sudāso rathampary āsa na rīramad iti marutvatīyaḥ pragāthaḥ paryastavāṃstṛtīye 'hani tṛtīyasyāhno rūpam
- 17
त्र्य् अर्यमा मनुषो देवतातेति सूक्तं त्रिवत्तृतीये ऽहनि तृतीयस्याह्नो रूपम्
try aryamā manuṣo devatāteti sūktaṃ trivattṛtīye 'hani tṛtīyasyāhno rūpam
- 18
यद्द्याव इन्द्र ते शतं यद् इन्द्र यावतस्त्वम् इति वैरूपम्पृष्ठम्भवति राथंतरे ऽहनि तृतीये ऽहनि तृतीयस्याह्नो रूपम्
yaddyāva indra te śataṃ yad indra yāvatastvam iti vairūpampṛṣṭhambhavati rāthaṃtare 'hani tṛtīye 'hani tṛtīyasyāhno rūpam
- 19
यद्वावानेति धाय्याच्युता
yadvāvāneti dhāyyācyutā
- 20
अभि त्वा शूर नोनुम इति रथंतरस्य योनिम् अनु निवर्तयति राथंतरं ह्य् एतद् अहर् आयतनेन
abhi tvā śūra nonuma iti rathaṃtarasya yonim anu nivartayati rāthaṃtaraṃ hy etad ahar āyatanena
- 21
इन्द्र त्रिधातु शरणम् इति सामप्रगाथस्त्रिवांस्तृतीये ऽहनि तृतीयस्याह्नो रूपम्
indra tridhātu śaraṇam iti sāmapragāthastrivāṃstṛtīye 'hani tṛtīyasyāhno rūpam
- 22
त्यम् ऊ षु वाजिनं देवजूतम् इति तार्क्ष्यो ऽच्युतः
tyam ū ṣu vājinaṃ devajūtam iti tārkṣyo 'cyutaḥ

