39 shlokas
- 1
पराशर उवाच
एवं संचिन्तयन्विष्णुम् अभेदेनात्मनो द्विज
तन्मयत्वम् अवापाग्र्यं मेने चात्मानम् अच्युतम्
parāśara uvāca
evaṃ saṃcintayanviṣṇum abhedenātmano dvija
tanmayatvam avāpāgryaṃ mene cātmānam acyutam
- 2
विसस्मार तथात्मानं नान्यत्किंचिद् अजानत
अहम् एवाव्ययो ऽनन्तः परमात्मेत्यचिन्तयत्
visasmāra tathātmānaṃ nānyatkiṃcid ajānata
aham evāvyayo 'nantaḥ paramātmetyacintayat
- 3
तस्य तद्भावनायोगात्क्षीणपापस्य वै क्रमात्
शुद्धे ऽन्तःकरणे विष्णुस्तस्थौ ज्ञानमयो ऽच्युतः
tasya tadbhāvanāyogātkṣīṇapāpasya vai kramāt
śuddhe 'ntaḥkaraṇe viṣṇustasthau jñānamayo 'cyutaḥ
- 4
योगप्रभावात्प्रह्लादे जाते विष्णुमये ऽसुरे
चलत्य् उरगबन्धैस्तैर्मैत्रेय त्रुटितं क्षणात्
yogaprabhāvātprahlāde jāte viṣṇumaye 'sure
calaty uragabandhaistairmaitreya truṭitaṃ kṣaṇāt
- 5
भ्रान्तग्राहगणः सोर्मिर्ययौ क्षोभं महार्णवः
चचाल च मही सर्वा सशैलवनकानना
bhrāntagrāhagaṇaḥ sormiryayau kṣobhaṃ mahārṇavaḥ
cacāla ca mahī sarvā saśailavanakānanā
- 6
स च तं शैलसंघातं दैत्यैर्न्यस्तम् अथोपरि
प्रक्षिप्य तस्मात्सलिलान्निश्चक्राम महामतिः
sa ca taṃ śailasaṃghātaṃ daityairnyastam athopari
prakṣipya tasmātsalilānniścakrāma mahāmatiḥ
- 7
दृष्ट्वा च स जगद्भूयो गगनाद्युपलक्षणम्
प्रह्लादो ऽस्मीति सस्मार पुनर् आत्मानम् आत्मना
dṛṣṭvā ca sa jagadbhūyo gaganādyupalakṣaṇam
prahlādo 'smīti sasmāra punar ātmānam ātmanā
- 8
तुष्टाव च पुनर्धीमान् अनादिं पुरुषोत्तमम्
एकाग्रमतिर् अव्यग्रो यतवाक्कायमानसः
tuṣṭāva ca punardhīmān anādiṃ puruṣottamam
ekāgramatir avyagro yatavākkāyamānasaḥ
- 9
प्रह्लाद उवाच
ॐ नमः परमार्थार्थ स्थूलसूक्ष्म क्षराक्षर
व्यक्ताव्यक्तकलातीत सकलेश निरञ्जन
prahlāda uvāca
oṃ namaḥ paramārthārtha sthūlasūkṣma kṣarākṣara
vyaktāvyaktakalātīta sakaleśa nirañjana
- 10
गुणाञ्जन गुणाधार निर्गुणात्मन्गुणस्थित
मूर्तामूर्त महामूर्ते सूक्ष्ममूर्ते स्फुटास्फुट
guṇāñjana guṇādhāra nirguṇātmanguṇasthita
mūrtāmūrta mahāmūrte sūkṣmamūrte sphuṭāsphuṭa
- 11
करालसौम्यरूपात्मन्विद्याविद्यामयाच्युत
सदसद्रूपसद्भाव सदसद्भावभावन
karālasaumyarūpātmanvidyāvidyāmayācyuta
sadasadrūpasadbhāva sadasadbhāvabhāvana
- 12
नित्यानित्य प्रपञ्चात्मन्निष्प्रपञ्चामलाश्रय
एकानेक नमस्तुभ्यं वासुदेवादिकारण
nityānitya prapañcātmanniṣprapañcāmalāśraya
ekāneka namastubhyaṃ vāsudevādikāraṇa
- 13
यः स्थूलसूक्ष्मः प्रकटप्रकाशो यः सर्वभूतो न च सर्वभूतः
विश्वं यतश्चैतद् अविश्वहेतोर्नमो ऽस्तु तस्मै पुरुषोत्तमाय
yaḥ sthūlasūkṣmaḥ prakaṭaprakāśo yaḥ sarvabhūto na ca sarvabhūtaḥ
viśvaṃ yataścaitad aviśvahetornamo 'stu tasmai puruṣottamāya
- 14
पराशर उवाच
तस्य तच्चेतसो देवः स्तुतिम् इत्थं प्रकुर्वतः
आविर्बभूव भगवान्पीताम्बरधरो हरिः
parāśara uvāca
tasya taccetaso devaḥ stutim itthaṃ prakurvataḥ
āvirbabhūva bhagavānpītāmbaradharo hariḥ
- 15
ससंभ्रमस्तम् आलोक्य समुत्थायाकुलाक्षरम्
नमो ऽस्तु विष्णव इत्येतद्व्याजहारासकृद्द्विज
sasaṃbhramastam ālokya samutthāyākulākṣaram
namo 'stu viṣṇava ityetadvyājahārāsakṛddvija
- 16
प्रह्लाद उवाच
देव प्रपन्नार्तिहर प्रसादं कुरु केशव
अवलोकनदानेन भूयो मां पावयाव्यय
prahlāda uvāca
deva prapannārtihara prasādaṃ kuru keśava
avalokanadānena bhūyo māṃ pāvayāvyaya
- 17
श्रीभगवान् उवाच
कुर्वतस्ते प्रसन्नो ऽहं भक्तिम् अव्यभिचारिणीम्
यथाभिलषितो मत्तः प्रह्लाद व्रियतां वरः
śrībhagavān uvāca
kurvataste prasanno 'haṃ bhaktim avyabhicāriṇīm
yathābhilaṣito mattaḥ prahlāda vriyatāṃ varaḥ
- 18
प्रह्लाद उवाच
नाथ योनिसहस्रेषु येषु येषु व्रजाम्यहम्
तेषु तेष्वच्युता भक्तिर् अच्युतास्तु सदा त्वयि
prahlāda uvāca
nātha yonisahasreṣu yeṣu yeṣu vrajāmyaham
teṣu teṣvacyutā bhaktir acyutāstu sadā tvayi
- 19
या प्रीतिर् अविवेकानां विषयेष्व् अनपायिनी
त्वाम् अनुस्मरतः सा मे हृदयान्मापसर्पतु
yā prītir avivekānāṃ viṣayeṣv anapāyinī
tvām anusmarataḥ sā me hṛdayānmāpasarpatu
- 20
श्रीभगवान् उवाच
मयि भक्तिस्तवास्त्येव भूयो ऽप्येवं भविष्यति
वरश्च मत्तः प्रह्लाद व्रियतां यस्तवेप्सितः
śrībhagavān uvāca
mayi bhaktistavāstyeva bhūyo 'pyevaṃ bhaviṣyati
varaśca mattaḥ prahlāda vriyatāṃ yastavepsitaḥ
- 21
प्रह्लाद उवाच
मयि द्वेषानुबन्धो ऽभूत्संस्तुतावुद्यते तव
मत्पितुस्तत्कृतं पापं देव तस्य प्रणश्यतु
prahlāda uvāca
mayi dveṣānubandho 'bhūtsaṃstutāvudyate tava
matpitustatkṛtaṃ pāpaṃ deva tasya praṇaśyatu
- 22
शस्त्राणि पातितान्य् अङ्गे क्षिप्तो यच्चाग्निसंहतौ
दंशितश्चोरगैर्दत्तं यद्विषं मम भोजने
śastrāṇi pātitāny aṅge kṣipto yaccāgnisaṃhatau
daṃśitaścoragairdattaṃ yadviṣaṃ mama bhojane
- 23
बद्ध्वा समुद्रे यत्क्षिप्तो यच्चितो ऽस्मि शिलोच्चयैः
अन्यानि चाप्य् असाधूनि यानि पित्रा कृतानि मे
baddhvā samudre yatkṣipto yaccito 'smi śiloccayaiḥ
anyāni cāpy asādhūni yāni pitrā kṛtāni me
- 24
त्वयि भक्तिमतो द्वेषाद् अघं तत्संभवं च यत्
त्वत्प्रसादात्प्रभो सद्यस्तेन मुच्येत मे पिता
tvayi bhaktimato dveṣād aghaṃ tatsaṃbhavaṃ ca yat
tvatprasādātprabho sadyastena mucyeta me pitā
- 25
श्रीभगवान् उवाच
प्रह्लाद सर्वम् एतत्ते मत्प्रसादाद्भविष्यति
अन्यं च ते वरं दद्मि व्रियताम् असुरात्मज
śrībhagavān uvāca
prahlāda sarvam etatte matprasādādbhaviṣyati
anyaṃ ca te varaṃ dadmi vriyatām asurātmaja
- 26
प्रह्लाद उवाच
कृतकृत्यो ऽस्मि भगवन्वरेणानेन यत्त्वयि
भवित्री त्वत्प्रसादेन भक्तिर् अव्यभिचारिणी
prahlāda uvāca
kṛtakṛtyo 'smi bhagavanvareṇānena yattvayi
bhavitrī tvatprasādena bhaktir avyabhicāriṇī
- 27
धर्मार्थकामैः किं तस्य मुक्तिस्तस्य करे स्थिता
समस्तजगतां मूले यस्य भक्तिः स्थिरा त्वयि
dharmārthakāmaiḥ kiṃ tasya muktistasya kare sthitā
samastajagatāṃ mūle yasya bhaktiḥ sthirā tvayi
- 28
श्रीभगवान् उवाच
यथा ते निश्चलं चेतो मयि भक्तिसमन्वितम्
तथा त्वं मत्प्रसादेन निर्वाणं परम् आप्स्यसि
śrībhagavān uvāca
yathā te niścalaṃ ceto mayi bhaktisamanvitam
tathā tvaṃ matprasādena nirvāṇaṃ param āpsyasi
- 29
पराशर उवाच
इत्य् उक्त्वान्तर्दधे विष्णुस्तस्य मैत्रेय पश्यतः
स चापि पुनर् आगम्य ववन्दे चरणौ पितुः
parāśara uvāca
ity uktvāntardadhe viṣṇustasya maitreya paśyataḥ
sa cāpi punar āgamya vavande caraṇau pituḥ
- 30
तं पिता मूर्ध्न्युपाघ्राय परिष्वज्य च पीडितम्
जीवसीत्य् आह वत्सेति बाष्पार्द्रनयनो द्विज
taṃ pitā mūrdhnyupāghrāya pariṣvajya ca pīḍitam
jīvasīty āha vatseti bāṣpārdranayano dvija

