9 shlokas
- 1
ग्रासं न मुञ्चति न वाञ्छति तं च भूयः कांश्चिद्गुणान्भजति भुक्तविभुक्तिमात्रात्
यज्जीर्यते प्रचुरकेवलवह्नियोगात्तस्माद्विडैः सुनिविडैः सह जारणा स्यात्
grāsaṃ na muñcati na vāñchati taṃ ca bhūyaḥ kāṃścidguṇānbhajati bhuktavibhuktimātrāt
yajjīryate pracurakevalavahniyogāttasmādviḍaiḥ suniviḍaiḥ saha jāraṇā syāt
- 2
सौवर्चलकटुकत्रयकाक्षीकासीसगन्धकैश्च विडैः
शिग्रो रसशतभाव्यैस्ताम्रदलान्यपि जारयति
sauvarcalakaṭukatrayakākṣīkāsīsagandhakaiśca viḍaiḥ
śigro rasaśatabhāvyaistāmradalānyapi jārayati
- 3
सर्वाङ्गदग्धमूलकभस्म प्रतिगालितं सुरभिमूत्रेण
शतभाव्यं बलिवसया तत्क्षणतो जार्यते हेम
sarvāṅgadagdhamūlakabhasma pratigālitaṃ surabhimūtreṇa
śatabhāvyaṃ balivasayā tatkṣaṇato jāryate hema
- 4
कदलीपलाशतिलनिचुलकनकसुरदालिवास्तुकैरण्डाः
वर्षाभूवृषमोक्षकसहिताः क्षारो यथालाभम्
kadalīpalāśatilaniculakanakasuradālivāstukairaṇḍāḥ
varṣābhūvṛṣamokṣakasahitāḥ kṣāro yathālābham
- 5
आनीय क्षारवृक्षान्कुसुमफलशिफात्वक्प्रवालैरुपेतान्कृत्वातः खण्डशस्तान्विपुलतरशिलापिष्टगात्रातिशुष्कान्
दग्ध्वा काण्डैस्तिलानां करिसुरभिहयाम्भोभिर् आस्राव्य वस्त्रैर्भस्म त्यक्त्वा जलं तन्मृदुशिखिनि पचेद्वंशपाकेन भूयः
ānīya kṣāravṛkṣānkusumaphalaśiphātvakpravālairupetānkṛtvātaḥ khaṇḍaśastānvipulataraśilāpiṣṭagātrātiśuṣkān
dagdhvā kāṇḍaistilānāṃ karisurabhihayāmbhobhir āsrāvya vastrairbhasma tyaktvā jalaṃ tanmṛduśikhini pacedvaṃśapākena bhūyaḥ
- 6
तच्छुष्यमाणं हि सबाष्पबुद्बुदान्यदा विधत्ते क्षणभङ्गुरान्बहून्
तदा क्षिपेत्त्र्यूषणहिंगुगन्धकं क्षारत्रयं षड्लवणानि भूखगौ
tacchuṣyamāṇaṃ hi sabāṣpabudbudānyadā vidhatte kṣaṇabhaṅgurānbahūn
tadā kṣipettryūṣaṇahiṃgugandhakaṃ kṣāratrayaṃ ṣaḍlavaṇāni bhūkhagau
- 7
द्रव्याणि संमिश्र्य निवृत्य भूतले व्यवस्थितं शस्त्रकटोरिकापुटे
संस्थापयेत्सप्तदिनानि धान्यगतं प्रयोज्यं रसजारणादिकम्
dravyāṇi saṃmiśrya nivṛtya bhūtale vyavasthitaṃ śastrakaṭorikāpuṭe
saṃsthāpayetsaptadināni dhānyagataṃ prayojyaṃ rasajāraṇādikam
- 8
जम्बीरबीजपूरकचाङ्गेरीवेतसाम्लसंयोगात्
क्षारा भवन्ति नितरां गर्भद्रुतिजारणे शस्ताः
jambīrabījapūrakacāṅgerīvetasāmlasaṃyogāt
kṣārā bhavanti nitarāṃ garbhadrutijāraṇe śastāḥ
- 9
विडमधरोत्तरमादौ दत्त्वा सूतस्य चाष्टमांशेन
कुर्याज्जारणमेवं क्रमक्रमाद्वर्धयेदग्निम्
viḍamadharottaramādau dattvā sūtasya cāṣṭamāṃśena
kuryājjāraṇamevaṃ kramakramādvardhayedagnim

