8 shlokas
- 1
इति कृतसारणविधिरपि बलवानपि सूतराट्क्रियायोगात्
संवेष्ट्य तिष्ठति लोहं नो विशति क्रामणारहितः
iti kṛtasāraṇavidhirapi balavānapi sūtarāṭkriyāyogāt
saṃveṣṭya tiṣṭhati lohaṃ no viśati krāmaṇārahitaḥ
- 2
अन्नं वा द्रव्यं वा यथानुपानेन धातुषु क्रमते
एवं क्रामणयोगाद्रसराजो विशति लोहेषु
annaṃ vā dravyaṃ vā yathānupānena dhātuṣu kramate
evaṃ krāmaṇayogādrasarājo viśati loheṣu
- 3
कान्तविषरसकदरदै रक्तैलेन्द्रगोपिकाद्यैश्च
क्रामणमेतच्छ्रेष्ठं लेपे क्षेपे सदा योज्यम्
kāntaviṣarasakadaradai raktailendragopikādyaiśca
krāmaṇametacchreṣṭhaṃ lepe kṣepe sadā yojyam
- 4
कुनटीमाक्षिकविषं नररुधिरं वायसस्य विष्ठा च
महिषीणां कर्णमलं स्त्रीक्षीरं क्रामणे बलकृत्
kunaṭīmākṣikaviṣaṃ nararudhiraṃ vāyasasya viṣṭhā ca
mahiṣīṇāṃ karṇamalaṃ strīkṣīraṃ krāmaṇe balakṛt
- 5
टङ्कणकुनटीरामठभूमिलतासंयुतं महारुधिरम्
क्रामणमेतत्कथितं लेपे क्षेपे सदा योज्यम्
ṭaṅkaṇakunaṭīrāmaṭhabhūmilatāsaṃyutaṃ mahārudhiram
krāmaṇametatkathitaṃ lepe kṣepe sadā yojyam
- 6
शिलया निहतो नागो वङ्गं वा तालकेन शुद्धेन
क्रमशः पीते शुक्ले क्रामणमेतत्समुद्दिष्टम्
śilayā nihato nāgo vaṅgaṃ vā tālakena śuddhena
kramaśaḥ pīte śukle krāmaṇametatsamuddiṣṭam
- 7
तीक्ष्णं दरदेन हतं शुल्बं वा ताप्यमारितं विधिना
क्रामणमेतत्कथितं कान्तमुखं माक्षिकैर्वापि
tīkṣṇaṃ daradena hataṃ śulbaṃ vā tāpyamāritaṃ vidhinā
krāmaṇametatkathitaṃ kāntamukhaṃ mākṣikairvāpi
- 8
माक्षिकसत्त्वं नागं विहाय न क्रामणं किमप्यस्ति
दलसिद्धे रससिद्धे विधावसौ भवति खलु सफलः
mākṣikasattvaṃ nāgaṃ vihāya na krāmaṇaṃ kimapyasti
dalasiddhe rasasiddhe vidhāvasau bhavati khalu saphalaḥ

