23 shlokas
- 1
जन्माद्यस्य यतो ऽन्वयादितरतश्चार्थेष्व् अभिज्ञः स्वराट्
तेने ब्रह्म हृदा य आदिकवये मुह्यन्ति यत्सूरयः
तेजोवारिमृदां यथा विनिमयो यत्र त्रिसर्गो ऽमृषा
धाम्ना स्वेन सदा निरस्तकुहकं सत्यं परं धीमहि
janmādyasya yato 'nvayāditarataścārtheṣv abhijñaḥ svarāṭ
tene brahma hṛdā ya ādikavaye muhyanti yatsūrayaḥ
tejovārimṛdāṃ yathā vinimayo yatra trisargo 'mṛṣā
dhāmnā svena sadā nirastakuhakaṃ satyaṃ paraṃ dhīmahi
- 2
धर्मः प्रोज्झितकैतवो ऽत्र परमो निर्मत्सराणां सताम्
वेद्यं वास्तवम् अत्र वस्तु शिवदं तापत्रयोन्मूलनम्
श्रीमद्भागवते महामुनिकृते किं वा परैर् ईश्वरः
सद्यो हृद्य् अवरुध्यते ऽत्र कृतिभिः शुश्रूषुभिस्तत्क्षणात्
dharmaḥ projjhitakaitavo 'tra paramo nirmatsarāṇāṃ satām
vedyaṃ vāstavam atra vastu śivadaṃ tāpatrayonmūlanam
śrīmadbhāgavate mahāmunikṛte kiṃ vā parair īśvaraḥ
sadyo hṛdy avarudhyate 'tra kṛtibhiḥ śuśrūṣubhistatkṣaṇāt
- 3
निगमकल्पतरोर्गलितं फलम्
शुकमुखाद् अमृतद्रवसंयुतम्
पिबत भागवतं रसम् आलयम्
मुहुरहो रसिका भुवि भावुकाः
nigamakalpatarorgalitaṃ phalam
śukamukhād amṛtadravasaṃyutam
pibata bhāgavataṃ rasam ālayam
muhuraho rasikā bhuvi bhāvukāḥ
- 4
नैमिषे ऽनिमिषक्षेत्रे ईशयः शौनकादयः
सत्त्रं स्वर्गाय लोकाय सहस्रसमम् आसत
naimiṣe 'nimiṣakṣetre īśayaḥ śaunakādayaḥ
sattraṃ svargāya lokāya sahasrasamam āsata
- 5
त एकदा तु मुनयः प्रातर्हुतहुताग्नयः
सत्कृतं सूतम् आसीनं पप्रच्छुर् इदम् आदरात्
ta ekadā tu munayaḥ prātarhutahutāgnayaḥ
satkṛtaṃ sūtam āsīnaṃ papracchur idam ādarāt
- 6
ऋषय ऊचुः
त्वया खलु पुराणानि सेतिहासानि चानघ
आख्यातान्य् अप्य् अधीतानि धर्मशास्त्राणि यान्य् उत
ṛṣaya ūcuḥ
tvayā khalu purāṇāni setihāsāni cānagha
ākhyātāny apy adhītāni dharmaśāstrāṇi yāny uta
- 7
यानि वेदविदां श्रेष्ठो भगवान्बादरायणः
अन्ये च मुनयः सूत परावरविदो विदुः
yāni vedavidāṃ śreṣṭho bhagavānbādarāyaṇaḥ
anye ca munayaḥ sūta parāvaravido viduḥ
- 8
वेत्थ त्वं सौम्य तत्सर्वं तत्त्वतस्तदनुग्रहात्
ब्रूयुः स्निग्धस्य शिष्यस्य गुरवो गुह्यम् अप्युत
vettha tvaṃ saumya tatsarvaṃ tattvatastadanugrahāt
brūyuḥ snigdhasya śiṣyasya guravo guhyam apyuta
- 9
तत्र तत्राञ्जसायुष्मन्भवता यद्विनिश्चितम्
पुंसाम् एकान्ततः श्रेयस्तन्नः शंसितुम् अर्हसि
tatra tatrāñjasāyuṣmanbhavatā yadviniścitam
puṃsām ekāntataḥ śreyastannaḥ śaṃsitum arhasi
- 10
प्रायेणाल्पायुषः सभ्य कलाव् अस्मिन्युगे जनाः
मन्दाः सुमन्दमतयो मन्दभाग्या ह्य् उपद्रुताः
prāyeṇālpāyuṣaḥ sabhya kalāv asminyuge janāḥ
mandāḥ sumandamatayo mandabhāgyā hy upadrutāḥ
- 11
भूरीणि भूरिकर्माणि श्रोतव्यानि विभागशः
अतः साधो ऽत्र यत्सारं समुद्धृत्य मनीषया
ब्रूहि भद्राय भूतानां येनात्मा सुप्रसीदति
bhūrīṇi bhūrikarmāṇi śrotavyāni vibhāgaśaḥ
ataḥ sādho 'tra yatsāraṃ samuddhṛtya manīṣayā
brūhi bhadrāya bhūtānāṃ yenātmā suprasīdati
- 12
सूत जानासि भद्रं ते भगवान्सात्वतां पतिः
देवक्यां वसुदेवस्य जातो यस्य चिकीर्षया
sūta jānāsi bhadraṃ te bhagavānsātvatāṃ patiḥ
devakyāṃ vasudevasya jāto yasya cikīrṣayā
- 13
तन्नः शुश्रूषमाणानाम् अर्हस्य् अङ्गानुवर्णितुम्
यस्यावतारो भूतानां क्षेमाय च भवाय च
tannaḥ śuśrūṣamāṇānām arhasy aṅgānuvarṇitum
yasyāvatāro bhūtānāṃ kṣemāya ca bhavāya ca
- 14
आपन्नः संसृतिं घोरां यन्नाम विवशो गृणन्
ततः सद्यो विमुच्येत यद्बिभेति स्वयं भयम्
āpannaḥ saṃsṛtiṃ ghorāṃ yannāma vivaśo gṛṇan
tataḥ sadyo vimucyeta yadbibheti svayaṃ bhayam
- 15
यत्पादसंश्रयाः सूत मुनयः प्रशमायनाः
सद्यः पुनन्त्य् उपस्पृष्टाः स्वर्धुन्यापो ऽनुसेवया
yatpādasaṃśrayāḥ sūta munayaḥ praśamāyanāḥ
sadyaḥ punanty upaspṛṣṭāḥ svardhunyāpo 'nusevayā
- 16
को वा भगवतस्तस्य पुण्यश्लोकेड्यकर्मणः
शुद्धिकामो न शृणुयाद्यशः कलिमलापहम्
ko vā bhagavatastasya puṇyaślokeḍyakarmaṇaḥ
śuddhikāmo na śṛṇuyādyaśaḥ kalimalāpaham
- 17
तस्य कर्माण्युदाराणि परिगीतानि सूरिभिः
ब्रूहि नः श्रद्दधानानां लीलया दधतः कलाः
tasya karmāṇyudārāṇi parigītāni sūribhiḥ
brūhi naḥ śraddadhānānāṃ līlayā dadhataḥ kalāḥ
- 18
अथाख्याहि हरेर्धीमन्न् अवतारकथाः शुभाः
ईला विदधतः स्वैरम् ईश्वरस्यात्ममायया
athākhyāhi harerdhīmann avatārakathāḥ śubhāḥ
īlā vidadhataḥ svairam īśvarasyātmamāyayā
- 19
वयं तु न वितृप्याम उत्तमश्लोकविक्रमे
यच्छृण्वतां रसज्ञानां स्वादु स्वादु पदे पदे
vayaṃ tu na vitṛpyāma uttamaślokavikrame
yacchṛṇvatāṃ rasajñānāṃ svādu svādu pade pade
- 20
कृतवान्किल कर्माणि सह रामेण केशवः
अतिमर्त्यानि भगवान्गूढः कपटमानुषः
kṛtavānkila karmāṇi saha rāmeṇa keśavaḥ
atimartyāni bhagavāngūḍhaḥ kapaṭamānuṣaḥ
- 21
कलिम् आगतम् आज्ञाय क्षेत्रे ऽस्मिन्वैष्णवे वयम्
आसीना दीर्घसत्त्रेण कथायां सक्षणा हरेः
kalim āgatam ājñāya kṣetre 'sminvaiṣṇave vayam
āsīnā dīrghasattreṇa kathāyāṃ sakṣaṇā hareḥ
- 22
त्वं नः संदर्शितो धात्रा दुस्तरं निस्तितीर्षताम्
कलिं सत्त्वहरं पुंसां कर्णधार इवार्णवम्
tvaṃ naḥ saṃdarśito dhātrā dustaraṃ nistitīrṣatām
kaliṃ sattvaharaṃ puṃsāṃ karṇadhāra ivārṇavam
- 23
ब्रूहि योगेश्वरे कृष्णे ब्रह्मण्ये धर्मवर्मणि
स्वां काष्ठाम् अधुनोपेते धर्मः कं शरणं गतः
brūhi yogeśvare kṛṣṇe brahmaṇye dharmavarmaṇi
svāṃ kāṣṭhām adhunopete dharmaḥ kaṃ śaraṇaṃ gataḥ

