14 shlokas
- 1
युक्तः श्रद्धान्वितो विप्रैर् अनुज्ञातः केशान्रोमनखानि च वापयित्वा विधिना स्नात इषे त्वोर्जे त्वेत्यादि स्वाध्यायम् अधीयीत शतं प्राणायामांश्च कृत्वा ध्यायन्नारायणम् उपोष्य सपत्नीको घृतमिश्रं हविष्यं क्षीरेण प्राश्नाति
yuktaḥ śraddhānvito viprair anujñātaḥ keśānromanakhāni ca vāpayitvā vidhinā snāta iṣe tvorje tvetyādi svādhyāyam adhīyīta śataṃ prāṇāyāmāṃśca kṛtvā dhyāyannārāyaṇam upoṣya sapatnīko ghṛtamiśraṃ haviṣyaṃ kṣīreṇa prāśnāti
- 2
उक्तव्रतम् आचरन्पावनार्थम् अमात्यहोमान्कूश्माण्डहोमांश्च जुहुयात्
uktavratam ācaranpāvanārtham amātyahomānkūśmāṇḍahomāṃśca juhuyāt
- 3
अहन्य् उपवसथे सर्वकामार्थम् अग्नीन् आधास्य इत्य् उक्त्वा यजमानः केशश्मश्रुरोमाणि वपते
ahany upavasathe sarvakāmārtham agnīn ādhāsya ity uktvā yajamānaḥ keśaśmaśruromāṇi vapate
- 4
न वपत इत्य् एके
na vapata ity eke
- 5
ततो ऽभ्युदयश्राद्धं कुर्वीत
tato 'bhyudayaśrāddhaṃ kurvīta
- 6
दैविकवत्सर्वं
daivikavatsarvaṃ
- 7
द्वौ विश्वेदेवौ चतुरः पितॄन्वृणीते
dvau viśvedevau caturaḥ pitṝnvṛṇīte
- 8
नान्दीमुखाः पितरः सानुगाः प्रियन्ताम् इत्य् आराध्यार्घ्यं ददाति
nāndīmukhāḥ pitaraḥ sānugāḥ priyantām ity ārādhyārghyaṃ dadāti
- 9
दूर्वाक्षतयुक्तम् उदकुम्भं निधाय पूर्ववद्दैविकं पैतृकं च हुत्वा तदानीम् उदकुम्भाद्भिर्यासु गन्धा रसा उति यजमानो ऽभिषिच्य पुण्याहं वाचयति
dūrvākṣatayuktam udakumbhaṃ nidhāya pūrvavaddaivikaṃ paitṛkaṃ ca hutvā tadānīm udakumbhādbhiryāsu gandhā rasā uti yajamāno 'bhiṣicya puṇyāhaṃ vācayati
- 10
स्वस्ति नो मिमीतां कृणुष्व पाजः स्वस्तिदा विशस्पतिर् इति प्रतिसरं बद्ध्वा तस्मिन्दिने ब्राह्मणान् उक्तलक्षणान् ऋत्विजो वृत्वा सम्पूज्य मधुपर्कं ददाति
svasti no mimītāṃ kṛṇuṣva pājaḥ svastidā viśaspatir iti pratisaraṃ baddhvā tasmindine brāhmaṇān uktalakṣaṇān ṛtvijo vṛtvā sampūjya madhuparkaṃ dadāti
- 11
यजमानः पत्नी च नवैर्वस्त्रोत्तरीयपुष्पाद्यैर् अलंकृतौ भवतः
yajamānaḥ patnī ca navairvastrottarīyapuṣpādyair alaṃkṛtau bhavataḥ
- 12
अध्वर्युर्यो अश्वत्थः शमीगर्भ इत्य् अरणी उद्धृत्याश्वत्थाद्धव्यवाहाद् इति संभरति
adhvaryuryo aśvatthaḥ śamīgarbha ity araṇī uddhṛtyāśvatthāddhavyavāhād iti saṃbharati
- 13
आयुर्मयि धत्ताम् इति संभृते अभिमन्त्रयते
āyurmayi dhattām iti saṃbhṛte abhimantrayate
- 14
अधिवृक्षसूर्य औपासनाद्दीप्ताञ्छकलान्यजमान आयुषे वो गृह्णामीति पञ्चभिः शरावे गृह्णात्य् आयुर्माम् आविशत्व् इति गृहीत्वा तान्य् उपोत्तिष्ठति
adhivṛkṣasūrya aupāsanāddīptāñchakalānyajamāna āyuṣe vo gṛhṇāmīti pañcabhiḥ śarāve gṛhṇāty āyurmām āviśatv iti gṛhītvā tāny upottiṣṭhati

