12 shlokas
- 1
होष्यन्प्रथमम् अग्निहोत्रं दशहोतारं मनसानुद्रुत्य सग्रहम् आहवनीये हुत्वाथ सायम् अग्निहोत्रं जुहोति
hoṣyanprathamam agnihotraṃ daśahotāraṃ manasānudrutya sagraham āhavanīye hutvātha sāyam agnihotraṃ juhoti
- 2
व्याहृतिभिः प्रथमम् अग्निहोत्रम् उपसादयति संवत्सरे च
vyāhṛtibhiḥ prathamam agnihotram upasādayati saṃvatsare ca
- 3
द्वादशरात्रम् आधानाद् अजस्रेष्व् आज्येनाहतवासाः स्वयम् अप्रवसन्यजमानो ऽग्निहोत्रं जुहोति
dvādaśarātram ādhānād ajasreṣv ājyenāhatavāsāḥ svayam apravasanyajamāno 'gnihotraṃ juhoti
- 4
यां प्रथमाम् अग्निहोत्राय दुहन्ति साग्निहोत्रस्य दक्षिणा
yāṃ prathamām agnihotrāya duhanti sāgnihotrasya dakṣiṇā
- 5
प्रथमौ दर्शपूर्णमासौ यक्ष्यमाणश्चतुर्होतारं मनसानुद्रुत्याहवनीये सग्रहं हुत्वा पूर्णा पश्चाद्यत्ते देवा अदधुर् इति सारस्वतौ होमौ हुत्वा पूर्वस्मिन्पर्वणि पौर्णमास्याम् अन्वारम्भणीयाम् इष्टिं निर्वपत्य् आग्नावैष्णवम् एकादशकपालं सरस्वत्यै चरुं सरस्वते द्वादशकपालम् अग्नये भगिने ऽष्टाकपालम्
prathamau darśapūrṇamāsau yakṣyamāṇaścaturhotāraṃ manasānudrutyāhavanīye sagrahaṃ hutvā pūrṇā paścādyatte devā adadhur iti sārasvatau homau hutvā pūrvasminparvaṇi paurṇamāsyām anvārambhaṇīyām iṣṭiṃ nirvapaty āgnāvaiṣṇavam ekādaśakapālaṃ sarasvatyai caruṃ sarasvate dvādaśakapālam agnaye bhagine 'ṣṭākapālam
- 6
अग्नाविष्णू सजोषसाग्नाविष्णू महि धामेत्य् आग्नावैष्णवस्य
agnāviṣṇū sajoṣasāgnāviṣṇū mahi dhāmety āgnāvaiṣṇavasya
- 7
प्र णो देव्या नो दिव इति सरस्वत्याः
pra ṇo devyā no diva iti sarasvatyāḥ
- 8
पीपिवांसं सरस्वतो ये ते सरस्व ऊर्मय इति सरस्वत आ सवं सवितुर्यथा स नो राधांस्य् आभरेति भगिनः
pīpivāṃsaṃ sarasvato ye te sarasva ūrmaya iti sarasvata ā savaṃ savituryathā sa no rādhāṃsy ābhareti bhaginaḥ
- 9
पुरस्तात्स्विष्टकृतो जयानुपजुहोति
purastātsviṣṭakṛto jayānupajuhoti
- 10
मिथुनौ गावौ दक्षिणा
mithunau gāvau dakṣiṇā
- 11
अमावास्यायां भविष्यन्त्याम् आदधानस्य नान्वारम्भणीया
amāvāsyāyāṃ bhaviṣyantyām ādadhānasya nānvārambhaṇīyā
- 12
आग्नेयम् एवाष्टाकपालं निर्वपेत्
āgneyam evāṣṭākapālaṃ nirvapet

