22 shlokas
- 1
पुनर् अग्न्याधेयस्याधानेन कल्पो व्याख्यातः
punar agnyādheyasyādhānena kalpo vyākhyātaḥ
- 2
अग्निष्व् आहितेषु यो ऽस्मिन्संवत्सरे बन्धुज्यानिं पुत्रज्यानिं वाभ्येति न वर्धते स्वेनाङ्गेन वा व्यृध्यते स उद्वास्य पुनर् आदधीत
agniṣv āhiteṣu yo 'sminsaṃvatsare bandhujyāniṃ putrajyāniṃ vābhyeti na vardhate svenāṅgena vā vyṛdhyate sa udvāsya punar ādadhīta
- 3
दर्शेन पूर्णमासेन वेष्ट्वाग्नेयम् अष्टाकपालं वैश्वानरं द्वादशकपालम् अग्निम् उद्वासयिष्यन्निर्वपेत्
darśena pūrṇamāsena veṣṭvāgneyam aṣṭākapālaṃ vaiśvānaraṃ dvādaśakapālam agnim udvāsayiṣyannirvapet
- 4
अग्निर्मूर्धा भुव इत्य् आग्नेयस्य वैश्वानरो अजीजनत्पृष्टो दिवीति वैश्वानरस्य
agnirmūrdhā bhuva ity āgneyasya vaiśvānaro ajījanatpṛṣṭo divīti vaiśvānarasya
- 5
या ते अग्ने उत्सीदतः पवमाना या ते पावका या ते अग्ने सूर्ये शुचिर्यास्ते अग्ने कामदुघा विभक्तीर्यास्ते अग्ने संभृतीर्ये ते अग्ने वानस्पत्या अगन्न् अग्निर् इति सप्ताहुतीः पुरस्तात्स्विष्टकृत उपजुहोति
yā te agne utsīdataḥ pavamānā yā te pāvakā yā te agne sūrye śuciryāste agne kāmadughā vibhaktīryāste agne saṃbhṛtīrye te agne vānaspatyā agann agnir iti saptāhutīḥ purastātsviṣṭakṛta upajuhoti
- 6
सिद्धेष्टिः संतिष्ठते
siddheṣṭiḥ saṃtiṣṭhate
- 7
ज्वलतो ऽग्नीन् उत्सृजति यावद्दर्शपूर्णमासौ
jvalato 'gnīn utsṛjati yāvaddarśapūrṇamāsau
- 8
संवत्सरं द्वादशाहं वा विसृष्टाग्निर्भवति
saṃvatsaraṃ dvādaśāhaṃ vā visṛṣṭāgnirbhavati
- 9
तदानीम् एवाद्भिर् अग्नीन्समभ्युक्ष्य ब्रह्मौदनं श्रपयित्वोपवसति
tadānīm evādbhir agnīnsamabhyukṣya brahmaudanaṃ śrapayitvopavasati
- 10
रोहिणी पुनर्वसू अनूराधाश्च पुनराधाननक्षत्राणि प्रावृट्छरदाव् ऋतू
rohiṇī punarvasū anūrādhāśca punarādhānanakṣatrāṇi prāvṛṭcharadāv ṛtū
- 11
न संभृत्याः संभाराः
na saṃbhṛtyāḥ saṃbhārāḥ
- 12
संभृत्या वा
saṃbhṛtyā vā
- 13
संभारमन्त्रा भवन्तीत्य् एके
saṃbhāramantrā bhavantīty eke
- 14
यजूंषि न भवन्तीत्य् एके
yajūṃṣi na bhavantīty eke
- 15
अग्न्यायतनेषु संवत्सरप्रवातान्दर्भान्संस्तीर्य भूमिर्भूम्नेति सर्पराज्ञीभिर्गार्हपत्यम् आदधाति मध्यंदिन इतरान्
agnyāyataneṣu saṃvatsarapravātāndarbhānsaṃstīrya bhūmirbhūmneti sarparājñībhirgārhapatyam ādadhāti madhyaṃdina itarān
- 16
सर्वान्वा मध्यंदिने
sarvānvā madhyaṃdine
- 17
पुराणैर्दर्भैर् आहवनीयं शराव उद्धृत्य यत्त्वा क्रुद्धः परोवपेत्य् अन्वाहार्यपचनम् आदधाति यत्ते मन्युपरोप्तस्येत्य् आहवनीये
purāṇairdarbhair āhavanīyaṃ śarāva uddhṛtya yattvā kruddhaḥ parovapety anvāhāryapacanam ādadhāti yatte manyuparoptasyety āhavanīye
- 18
मनो ज्योतिर्जुषताम् इत्य् आहितम् उपतिष्ठते
mano jyotirjuṣatām ity āhitam upatiṣṭhate
- 19
पुनस्त्वादित्या रुद्रा इति द्वाभ्याम् उपसमिन्द्धे
punastvādityā rudrā iti dvābhyām upasaminddhe
- 20
मनो ज्योतिर्जुषताम् इत्य् आहुतिं जुहोति
mano jyotirjuṣatām ity āhutiṃ juhoti
- 21
सप्त ते अग्ने समिधः सप्त जिह्वा इत्य् अग्निहोत्रं जुहोति
sapta te agne samidhaḥ sapta jihvā ity agnihotraṃ juhoti
- 22
सा पूर्णाहुतिर्भवति
sā pūrṇāhutirbhavati

