15 shlokas
- 1
अग्न आयूंष्य् अग्ने पवस्वाग्ने पावकेति तिसृभिर् आश्वत्थीस्तिस्रः समिध एकैकस्मिन्न् आधानवद् आदधात्य् आहवनीये गार्हपत्ये दक्षिणाग्नौ सभ्यावसथ्ययोर् इति वा सर्वकर्मस्व् एषाम् एवानूपूर्व्यम्
agna āyūṃṣy agne pavasvāgne pāvaketi tisṛbhir āśvatthīstisraḥ samidha ekaikasminn ādhānavad ādadhāty āhavanīye gārhapatye dakṣiṇāgnau sabhyāvasathyayor iti vā sarvakarmasv eṣām evānūpūrvyam
- 2
समुद्राद् ऊर्मिर्वयं नाम चत्वारि शृङ्गेति तिसृभिस्तिस्रः शमीमयीर्घृताक्ताः प्रेद्धो अग्ने दीदिहीत्य् औदुम्बरीं विधेम त इति वैकङ्कतीं तां सवितुर्वरेण्यस्येति शमीमयीं
samudrād ūrmirvayaṃ nāma catvāri śṛṅgeti tisṛbhistisraḥ śamīmayīrghṛtāktāḥ preddho agne dīdihīty audumbarīṃ vidhema ta iti vaikaṅkatīṃ tāṃ saviturvareṇyasyeti śamīmayīṃ
- 3
ततस्तूष्णीं प्रातर् अग्निहोत्रं जुहोति
tatastūṣṇīṃ prātar agnihotraṃ juhoti
- 4
अथवाज्यं संस्कृत्य चतुर्गृहीतेनाष्टगृहीतेन वा स्रुचं पूरयित्वा ध्यायन्नारायणं जुहोति
athavājyaṃ saṃskṛtya caturgṛhītenāṣṭagṛhītena vā srucaṃ pūrayitvā dhyāyannārāyaṇaṃ juhoti
- 5
साग्निहोत्रस्य स्थाने भवति
sāgnihotrasya sthāne bhavati
- 6
यजमानो ऽपरेण सर्वान् अग्नींस्तिष्ठन्ये ते अग्ने शिवे तनुवाव् इति शिवाभिस्तनूभिर् उपतिष्ठते
yajamāno 'pareṇa sarvān agnīṃstiṣṭhanye te agne śive tanuvāv iti śivābhistanūbhir upatiṣṭhate
- 7
यास्ते अग्ने घोरास्तनुवस्ताभिः पाप्मानं गच्छेति यजुषोपस्थाय यास्ते अग्ने घोरास्तनुवः क्षुच्च तृष्णा चेति घोराभिश्च
yāste agne ghorāstanuvastābhiḥ pāpmānaṃ gaccheti yajuṣopasthāya yāste agne ghorāstanuvaḥ kṣucca tṛṣṇā ceti ghorābhiśca
- 8
अत्रामुम् इति द्वेष्यस्य नाम गृह्णाति
atrāmum iti dveṣyasya nāma gṛhṇāti
- 9
अप उपस्पृशति
apa upaspṛśati
- 10
जुहूं स्रुवं च संमृज्य पूर्ववत्स्रुचं पूरयित्वा पूर्णाहुती जुहोति
juhūṃ sruvaṃ ca saṃmṛjya pūrvavatsrucaṃ pūrayitvā pūrṇāhutī juhoti
- 11
यजमानो वरं दत्त्वा पुनर्घोराभिर् उपस्थाय शिवाभिर् उपतिष्ठते
yajamāno varaṃ dattvā punarghorābhir upasthāya śivābhir upatiṣṭhate
- 12
नर्य प्रजां मे गोपायाथर्व पितुं मे गोपाय शंस्य पशून्मे गोपाय सप्रथ सभां मे गोपायाहे बुध्न्य मन्त्रं मे गोपायेति पञ्चभिर्विराट्क्रमैः पञ्चाग्नीन् उपतिष्ठते पञ्चधाग्नीन् इति सर्वान्
narya prajāṃ me gopāyātharva pituṃ me gopāya śaṃsya paśūnme gopāya sapratha sabhāṃ me gopāyāhe budhnya mantraṃ me gopāyeti pañcabhirvirāṭkramaiḥ pañcāgnīn upatiṣṭhate pañcadhāgnīn iti sarvān
- 13
अथाग्नेयम् अष्टाकपालं निर्वपेत्
athāgneyam aṣṭākapālaṃ nirvapet
- 14
उपसन्ने परिदत्ते हविष्य् अप्रोक्षिते सभामध्ये ऽधिदेवनम् उद्धत्यावोक्ष्याक्षान् ओप्य तेषु हिरण्यं निधाय निषसाद धृतव्रत इति राजन्यस्य जुहोति
upasanne paridatte haviṣy aprokṣite sabhāmadhye 'dhidevanam uddhatyāvokṣyākṣān opya teṣu hiraṇyaṃ nidhāya niṣasāda dhṛtavrata iti rājanyasya juhoti
- 15
प्र नूनम् इत्य् आवसथे परिषदो हिरण्यं निधाय तस्मिन्जुहोति
pra nūnam ity āvasathe pariṣado hiraṇyaṃ nidhāya tasminjuhoti

