64 shlokas
- 1
रसशास्त्राणि सर्वाणि समालोच्य यथाक्रमम्
साधकानां हितार्थाय प्रकटीक्रियते ऽधुना
rasaśāstrāṇi sarvāṇi samālocya yathākramam
sādhakānāṃ hitārthāya prakaṭīkriyate 'dhunā
- 2
न क्रमेण विना शास्त्रं न शास्त्रेण विना क्रमः
शास्त्रं क्रमयुतं ज्ञात्वा यः करोति स सिद्धिभाक्
na krameṇa vinā śāstraṃ na śāstreṇa vinā kramaḥ
śāstraṃ kramayutaṃ jñātvā yaḥ karoti sa siddhibhāk
- 3
आचार्यो ज्ञानवान्दक्षो रसशास्त्रविशारदः
मन्त्रसिद्धो महावीरो निश्चलशिववत्सलः
ācāryo jñānavāndakṣo rasaśāstraviśāradaḥ
mantrasiddho mahāvīro niścalaśivavatsalaḥ
- 4
देवीभक्तः सदा धीरो देवतायागतत्परः
सर्वाम्नायविशेषज्ञः कुशलो रसकर्मणि
एवं लक्षणसंयुक्तो रसविद्यागुरुर्भवेत्
devībhaktaḥ sadā dhīro devatāyāgatatparaḥ
sarvāmnāyaviśeṣajñaḥ kuśalo rasakarmaṇi
evaṃ lakṣaṇasaṃyukto rasavidyāgururbhavet
- 5
गुरुभक्ताः सदाचाराः सत्यवन्तो दृढव्रताः
निरालस्याः स्वधर्मज्ञाः सदाज्ञापरिपालकाः
gurubhaktāḥ sadācārāḥ satyavanto dṛḍhavratāḥ
nirālasyāḥ svadharmajñāḥ sadājñāparipālakāḥ
- 6
दम्भमात्सर्यनिर्मुक्ताः कुलाचारेषु दीक्षिताः
अत्यन्तसाधकाः शान्ता मन्त्राराधनतत्पराः
इत्येवं लक्षणैर्युक्ताः शिष्याः स्युः सूतसिद्धये
dambhamātsaryanirmuktāḥ kulācāreṣu dīkṣitāḥ
atyantasādhakāḥ śāntā mantrārādhanatatparāḥ
ityevaṃ lakṣaṇairyuktāḥ śiṣyāḥ syuḥ sūtasiddhaye
- 7
सहायाः सोद्यमास्तत्र यथा शिष्यास्ततोऽधिकाः
कुलीनाः स्वामिभक्ताश्च कर्तव्या रसकर्मणि
sahāyāḥ sodyamāstatra yathā śiṣyāstato'dhikāḥ
kulīnāḥ svāmibhaktāśca kartavyā rasakarmaṇi
- 8
नास्तिका ये दुराचाराश्चुम्बका गुरुतोऽपरात्
विद्यां ग्रहीतुमिच्छति चौर्यच्छद्मखलोत्सवात्
nāstikā ye durācārāścumbakā guruto'parāt
vidyāṃ grahītumicchati cauryacchadmakhalotsavāt
- 9
न तेषां सिध्यते किंचिन्मणिमन्त्रौषधादिकम्
कुर्वन्ति यदि मोहेन नाशयन्ति स्वकं धनम्
इह लोके सुखं नास्ति परलोके तथैव च
na teṣāṃ sidhyate kiṃcinmaṇimantrauṣadhādikam
kurvanti yadi mohena nāśayanti svakaṃ dhanam
iha loke sukhaṃ nāsti paraloke tathaiva ca
- 10
तस्माद्भक्तिबलादेव संतुष्यति यदा गुरुः
तदा शिष्येण सा ग्राह्या रसविद्यात्मसिद्धये
हस्तमस्तकयोगेन वरं लब्ध्वा सुसाधयेत्
tasmādbhaktibalādeva saṃtuṣyati yadā guruḥ
tadā śiṣyeṇa sā grāhyā rasavidyātmasiddhaye
hastamastakayogena varaṃ labdhvā susādhayet
- 11
आतङ्करहिते देशे धर्मराज्ये मनोरमे
उमामहेश्वरोपेते समृद्धे नगरे शुभे
ātaṅkarahite deśe dharmarājye manorame
umāmaheśvaropete samṛddhe nagare śubhe
- 12
कर्तव्यं साधनं तत्र रसराजस्य धीमता
अत्यन्तोपवने रम्ये चतुर्द्वारोपशोभिते
kartavyaṃ sādhanaṃ tatra rasarājasya dhīmatā
atyantopavane ramye caturdvāropaśobhite
- 13
तत्र शाला प्रकर्तव्या सुविस्तीर्णा मनोरमा
सम्यग्वातायनोपेता दिव्यचित्रैर्विचित्रिता
tatra śālā prakartavyā suvistīrṇā manoramā
samyagvātāyanopetā divyacitrairvicitritā
- 14
तत्समीपे समे दीप्ते कर्तव्यं रसमण्डपम्
अतिगुप्तं सुविस्तीर्णं कपाटार्गलशोभितम्
tatsamīpe same dīpte kartavyaṃ rasamaṇḍapam
atiguptaṃ suvistīrṇaṃ kapāṭārgalaśobhitam
- 15
ध्वजछत्त्रवितानाढ्यं पुष्पमालाविलम्बितम्
भेरीकाहलघण्टादिशृङ्गीनादावनादितम्
dhvajachattravitānāḍhyaṃ puṣpamālāvilambitam
bherīkāhalaghaṇṭādiśṛṅgīnādāvanāditam
- 16
भूः समा तत्र कर्तव्या सुदृढा दर्पणोपमा
तन्मध्ये वेदिका रम्या कर्तव्या लक्षणान्विता
bhūḥ samā tatra kartavyā sudṛḍhā darpaṇopamā
tanmadhye vedikā ramyā kartavyā lakṣaṇānvitā
- 17
निष्कत्रयं हेमपत्त्रं रसेन्द्रं नवनिष्ककम्
अम्लेन मर्दयेद्यामं तेन लिङ्गं तु कारयेत्
niṣkatrayaṃ hemapattraṃ rasendraṃ navaniṣkakam
amlena mardayedyāmaṃ tena liṅgaṃ tu kārayet
- 18
दोलायन्त्रे सारनाले जम्बीरस्थं दिनं पचेत्
तल्लिङ्गं पूजयेत्तत्र सुशुभैरुपचारकैः
dolāyantre sāranāle jambīrasthaṃ dinaṃ pacet
talliṅgaṃ pūjayettatra suśubhairupacārakaiḥ
- 19
लिङ्गकोटिसहस्रस्य यत्फलं सम्यगर्चनात्
तत्फलं कोटिगुणितं रसलिङ्गार्चनाद्भवेत्
liṅgakoṭisahasrasya yatphalaṃ samyagarcanāt
tatphalaṃ koṭiguṇitaṃ rasaliṅgārcanādbhavet
- 20
ब्रह्महत्यासहस्राणि गोहत्याश्चायुतानि हि
तत्क्षणाद्विलयं यान्ति रसलिङ्गस्य दर्शनात्
brahmahatyāsahasrāṇi gohatyāścāyutāni hi
tatkṣaṇādvilayaṃ yānti rasaliṅgasya darśanāt
- 21
स्पर्शनात्प्राप्यते मुक्तिरिति सत्यं शिवोदितम्
आग्नेय्यां श्रीघोरेण मन्त्रराजेन चार्चयेत्
sparśanātprāpyate muktiriti satyaṃ śivoditam
āgneyyāṃ śrīghoreṇa mantrarājena cārcayet
- 22
अष्टादशभुजं शुभ्रं पञ्चवक्त्रं त्रिलोचनम्
प्रेतारूढं नीलकण्ठं रसलिङ्गं विचिन्तयेत्
aṣṭādaśabhujaṃ śubhraṃ pañcavaktraṃ trilocanam
pretārūḍhaṃ nīlakaṇṭhaṃ rasaliṅgaṃ vicintayet
- 23
तस्योत्सङ्गे महादेवीमेकवक्त्रां चतुर्भुजाम्
अक्षमालाङ्कुशं दक्षे वामे पाशाभयं शुभम्
दधतीं तप्तहेमाभां पीतवस्त्रां विभावयेत्
tasyotsaṅge mahādevīmekavaktrāṃ caturbhujām
akṣamālāṅkuśaṃ dakṣe vāme pāśābhayaṃ śubham
dadhatīṃ taptahemābhāṃ pītavastrāṃ vibhāvayet
- 24
वाङ्मयी श्रीः कामराजशक्तिबीजं रसाङ्कुशायै नमो द्वादशार्णैषा ज्ञेया विद्या रसाङ्कुशा
vāṅmayī śrīḥ kāmarājaśaktibījaṃ rasāṅkuśāyai namo dvādaśārṇaiṣā jñeyā vidyā rasāṅkuśā
- 25
अनया पूजयेद्देवीं गन्धपुष्पाक्षतादिभिः
नन्दीभृङ्गीमहाकालकुलीरान्पूर्वदिक्क्रमात्
पूजयेन्नाममन्त्रैश्च प्रणवादिनमोऽन्तकैः
anayā pūjayeddevīṃ gandhapuṣpākṣatādibhiḥ
nandībhṛṅgīmahākālakulīrānpūrvadikkramāt
pūjayennāmamantraiśca praṇavādinamo'ntakaiḥ
- 26
एव नित्यार्चनं तत्र कर्तव्यं रससिद्धये
eva nityārcanaṃ tatra kartavyaṃ rasasiddhaye
- 27
रसविद्या शिवेनोक्ता दातव्या साधकाय वै
यथोक्तेन विधानेन गुरुणा मुदितात्मना
rasavidyā śivenoktā dātavyā sādhakāya vai
yathoktena vidhānena guruṇā muditātmanā
- 28
सुमुहूर्ते सुनक्षत्रे चन्द्रताराबलान्विते
कलशं तोयसम्पूर्णं हेमरत्नफलैर्युतम्
sumuhūrte sunakṣatre candratārābalānvite
kalaśaṃ toyasampūrṇaṃ hemaratnaphalairyutam
- 29
स्थापयेद्रसलिङ्गाग्रे दिव्यवस्त्रेण वेष्टितम्
गन्धपुष्पाक्षतैर्धूपैर्नैवेद्यैश्च सुपूजयेत्
sthāpayedrasaliṅgāgre divyavastreṇa veṣṭitam
gandhapuṣpākṣatairdhūpairnaivedyaiśca supūjayet
- 30
पूजान्ते हवनं कुर्याद्योनिकुण्डे सुलक्षणे
तिलाज्यैः पायसैः पुष्पैः शतपुष्पादिकैः पृथक्
pūjānte havanaṃ kuryādyonikuṇḍe sulakṣaṇe
tilājyaiḥ pāyasaiḥ puṣpaiḥ śatapuṣpādikaiḥ pṛthak

