29 shlokas
- 1
भेदा वन्ध्याबलानां हि नवधा परिकीर्तिताः
तत्रादिवन्ध्या प्रथमा पापकर्मविनिर्मिता
bhedā vandhyābalānāṃ hi navadhā parikīrtitāḥ
tatrādivandhyā prathamā pāpakarmavinirmitā
- 2
रक्तेन च पृथग्दोषैः समस्तैः पञ्चधा भवेत्
भूतदेवाभिचारैश्च तिस्रो वन्ध्याः प्रकीर्तिताः
raktena ca pṛthagdoṣaiḥ samastaiḥ pañcadhā bhavet
bhūtadevābhicāraiśca tisro vandhyāḥ prakīrtitāḥ
- 3
पुमानपि भवेद्वन्ध्यो दोषैरेतैश्च शुक्रतः
pumānapi bhavedvandhyo doṣairetaiśca śukrataḥ
- 4
गर्भस्रावी स्मृता पूर्वं मृतवत्सा द्वितीयका
तृतीया स्त्रीप्रसूतिः स्यात्काकवन्ध्या सकृत्प्रसूः
garbhasrāvī smṛtā pūrvaṃ mṛtavatsā dvitīyakā
tṛtīyā strīprasūtiḥ syātkākavandhyā sakṛtprasūḥ
- 5
सुवर्णं रजतं ताम्रं ताप्यसत्त्वं च वैकृतम्
एकैकं निष्कमानेन संशुद्धं परिमारितम्
suvarṇaṃ rajataṃ tāmraṃ tāpyasattvaṃ ca vaikṛtam
ekaikaṃ niṣkamānena saṃśuddhaṃ parimāritam
- 6
एतच्चतुर्गुणं सूतं सूताद्द्विगुणगन्धकम्
मर्दयेल्लक्ष्मणातोयैर्बन्धुजीवरसैरपि
etaccaturguṇaṃ sūtaṃ sūtāddviguṇagandhakam
mardayellakṣmaṇātoyairbandhujīvarasairapi
- 7
काचकूप्यां ततः क्षिप्त्वा ताम्रपात्रं मुखे न्यसेत्
विलिम्पेदभितः कूपीमङ्गुलोत्सेधया मृदा
kācakūpyāṃ tataḥ kṣiptvā tāmrapātraṃ mukhe nyaset
vilimpedabhitaḥ kūpīmaṅgulotsedhayā mṛdā
- 8
विशोष्य च पुटं दद्याद्भूमौ निक्षिप्य कूपिकाम्
गजाख्यपुटपर्याप्तिः शाणकर्षमितोत्पलैः
viśoṣya ca puṭaṃ dadyādbhūmau nikṣipya kūpikām
gajākhyapuṭaparyāptiḥ śāṇakarṣamitotpalaiḥ
- 9
स्वांगशीतं विचूर्ण्याथ भावयेल्लक्ष्मणाद्रवैः
सप्तवारं विशोष्याथ करण्डान्तर्विनिक्षिपेत्
svāṃgaśītaṃ vicūrṇyātha bhāvayellakṣmaṇādravaiḥ
saptavāraṃ viśoṣyātha karaṇḍāntarvinikṣipet
- 10
सेवितो गुञ्जया तुल्यः सितया च रसोत्तमः
sevito guñjayā tulyaḥ sitayā ca rasottamaḥ
- 11
मासत्रयप्रयोगेण वन्ध्या भवति पुत्रिणी
पुत्रिण्यै स्नानशुद्धायै जरत्कौशिकचक्षुषी
māsatrayaprayogeṇa vandhyā bhavati putriṇī
putriṇyai snānaśuddhāyai jaratkauśikacakṣuṣī
- 12
गव्याज्येन च संसाध्य तत्तदानीं हि भोजयेत्
ऋतावृताविदं देयं यावन्मासत्रयं भवेत्
gavyājyena ca saṃsādhya tattadānīṃ hi bhojayet
ṛtāvṛtāvidaṃ deyaṃ yāvanmāsatrayaṃ bhavet
- 13
रसेन्द्रः कथितः सोऽयं चम्पकारण्यवासिभिः
पूर्णामृताख्ययोगीन्द्रैर्नामतो जयसुन्दरः
rasendraḥ kathitaḥ so'yaṃ campakāraṇyavāsibhiḥ
pūrṇāmṛtākhyayogīndrairnāmato jayasundaraḥ
- 14
सेवितेऽस्मिन्रसे स्त्रीणां न भवेत्सूतिकागदः
भवेत्पुत्रश्च दीर्घायुः पण्डितो भाग्यमण्डितः
sevite'sminrase strīṇāṃ na bhavetsūtikāgadaḥ
bhavetputraśca dīrghāyuḥ paṇḍito bhāgyamaṇḍitaḥ
- 15
वज्रं मरकतं पद्मरागं पुष्पं च नीलकम्
वैदूर्यं चाथ गोमेदं मौक्तिकं विद्रुमं तथा
vajraṃ marakataṃ padmarāgaṃ puṣpaṃ ca nīlakam
vaidūryaṃ cātha gomedaṃ mauktikaṃ vidrumaṃ tathā
- 16
पञ्चगुञ्जामितं सर्वं रत्नं भागोत्तरं परम्
तत्तन्त्रोक्तविधानेन भस्मीकुर्यात्प्रयत्नतः
pañcaguñjāmitaṃ sarvaṃ ratnaṃ bhāgottaraṃ param
tattantroktavidhānena bhasmīkuryātprayatnataḥ
- 17
सर्वस्माद् अष्टगुणितं भस्म वैक्रान्तसम्भवम्
तत्तुल्यं ताप्यजं भस्म तद्वद्विमलभस्म च
sarvasmād aṣṭaguṇitaṃ bhasma vaikrāntasambhavam
tattulyaṃ tāpyajaṃ bhasma tadvadvimalabhasma ca
- 18
सर्वतस्त्रिगुणां तुल्यां रसगन्धककज्जलीम्
सर्वमेकत्र संमर्द्य छागीदुग्धेन तद्द्व्यहम्
sarvatastriguṇāṃ tulyāṃ rasagandhakakajjalīm
sarvamekatra saṃmardya chāgīdugdhena taddvyaham
- 19
विधाय पर्पटीं यत्नात्परिचूर्ण्य प्रयत्नतः
वन्ध्याकर्कोटकीपर्णक्वाथेन परिमर्दयेत्
vidhāya parpaṭīṃ yatnātparicūrṇya prayatnataḥ
vandhyākarkoṭakīparṇakvāthena parimardayet
- 20
काननोत्पलविंशत्या पुटेत्षोडशवारकम्
एवं रसो विनिष्पन्नो रत्नभागोत्तराभिधः
kānanotpalaviṃśatyā puṭetṣoḍaśavārakam
evaṃ raso viniṣpanno ratnabhāgottarābhidhaḥ
- 21
महावन्ध्यादिवन्ध्यानां सर्वासां संततिप्रदः
देवीशास्त्रे विनिर्दिष्टः पुंसां वन्ध्यत्वरोगनुत्
mahāvandhyādivandhyānāṃ sarvāsāṃ saṃtatipradaḥ
devīśāstre vinirdiṣṭaḥ puṃsāṃ vandhyatvaroganut
- 22
सोऽयं पाचनदीपनो रुचिकरो वृष्यस्तथा गर्भिणीसर्वव्याधिविनाशनो रतिकरः पाण्डुप्रचण्डार्तिनुत्
धन्यो बुद्धिकरश्च पुत्रजननः सौभाग्यकृद्योषितां निर्दोषः स्मरमन्दिरामयहरो योगादशेषार्तिनुत्
so'yaṃ pācanadīpano rucikaro vṛṣyastathā garbhiṇīsarvavyādhivināśano ratikaraḥ pāṇḍupracaṇḍārtinut
dhanyo buddhikaraśca putrajananaḥ saubhāgyakṛdyoṣitāṃ nirdoṣaḥ smaramandirāmayaharo yogādaśeṣārtinut
- 23
गन्धकः पलमात्रश्च पृथगक्षौ शिलालकौ
त्रिदिनं मर्दयित्वाथ विदध्यात्कज्जलीं शुभाम्
gandhakaḥ palamātraśca pṛthagakṣau śilālakau
tridinaṃ mardayitvātha vidadhyātkajjalīṃ śubhām
- 24
विषाणाकारमूषायां कज्जलीं निक्षिपेत्ततः
द्विपलस्य च ताम्रस्य तन्मुखे चक्रिकां न्यसेत्
viṣāṇākāramūṣāyāṃ kajjalīṃ nikṣipettataḥ
dvipalasya ca tāmrasya tanmukhe cakrikāṃ nyaset
- 25
संनिरुध्यातियत्नेन संधिबन्धे विशोषिते
ततः करिपुटार्धेन पाकं सम्यक्प्रकल्पयेत्
saṃnirudhyātiyatnena saṃdhibandhe viśoṣite
tataḥ karipuṭārdhena pākaṃ samyakprakalpayet
- 26
स्वतःशीतं समुद्धृत्य चक्रिकां परिचूर्णयेत्
स्थगयेत्कूपिकामध्ये वस्त्रेण परिगालितम्
svataḥśītaṃ samuddhṛtya cakrikāṃ paricūrṇayet
sthagayetkūpikāmadhye vastreṇa parigālitam
- 27
रसोऽयं चक्रिकाबन्धस्तत्तद्रोगहरौषधैः
दातव्यः शूलरोगेषु मूले गुल्मे भगन्दरे
raso'yaṃ cakrikābandhastattadrogaharauṣadhaiḥ
dātavyaḥ śūlarogeṣu mūle gulme bhagandare
- 28
ग्रहण्यामग्निमांद्ये च विद्रधौ जठरामये
नागोदरे तथैवोपविष्टके जलकूर्मके
grahaṇyāmagnimāṃdye ca vidradhau jaṭharāmaye
nāgodare tathaivopaviṣṭake jalakūrmake
- 29
स्कन्देनामन्दकृपया त्रिलोकत्राणहेतवे
skandenāmandakṛpayā trilokatrāṇahetave

