90 shlokas
- 1
यस्यानन्दभवेन मङ्गलकलासंभावितेन स्फुरधाम्ना सिद्धरसामृतेन करुणावीक्षासुधासिन्धुना
भक्तानां प्रभवप्रसंहृतिजरारागादिरोगाः क्षणाच्छान्तिं यान्ति जगत्प्रधानभिषजे तस्मै परस्मै नमः
yasyānandabhavena maṅgalakalāsaṃbhāvitena sphuradhāmnā siddharasāmṛtena karuṇāvīkṣāsudhāsindhunā
bhaktānāṃ prabhavaprasaṃhṛtijarārāgādirogāḥ kṣaṇācchāntiṃ yānti jagatpradhānabhiṣaje tasmai parasmai namaḥ
- 2
आदिमश्चन्द्रसेनश्च लङ्केशश्च विशारदः
कपाली मत्तमाण्डव्यौ भास्करः शूरसेनकः
ādimaścandrasenaśca laṅkeśaśca viśāradaḥ
kapālī mattamāṇḍavyau bhāskaraḥ śūrasenakaḥ
- 3
रत्नकोशश्च शम्भुश्च सात्त्विको नरवाहनः
इन्द्रदो गोमुखश्चैव कम्बलिर्व्याडिरेव च
ratnakośaśca śambhuśca sāttviko naravāhanaḥ
indrado gomukhaścaiva kambalirvyāḍireva ca
- 4
नागार्जुनः सुरानन्दो नागबोधिर्यशोधनः
खण्डः कापालिको ब्रह्मा गोविन्दो लम्पको हरिः
nāgārjunaḥ surānando nāgabodhiryaśodhanaḥ
khaṇḍaḥ kāpāliko brahmā govindo lampako hariḥ
- 5
सप्तविंशतिसंख्याका रससिद्धिप्रदायकाः
रसाङ्कुशो भैरवश्च नन्दी स्वच्छन्दभैरवः
saptaviṃśatisaṃkhyākā rasasiddhipradāyakāḥ
rasāṅkuśo bhairavaśca nandī svacchandabhairavaḥ
- 6
मन्थानभैरवश्चैव काकचण्डीश्वरस्तथा
वासुदेव ऋषिः शृङ्गः क्रियातन्त्रसमुच्चयी
manthānabhairavaścaiva kākacaṇḍīśvarastathā
vāsudeva ṛṣiḥ śṛṅgaḥ kriyātantrasamuccayī
- 7
रसेन्द्रतिलको योगी भालुकी मैथिलाह्वयः
महादेवो नरेन्द्रश्च वासुदेवो हरीश्वरः
rasendratilako yogī bhālukī maithilāhvayaḥ
mahādevo narendraśca vāsudevo harīśvaraḥ
- 8
एतेषां क्रियते ऽन्येषां तन्त्राण्यालोक्य संग्रहः
रसानामथ सिद्धानां चिकित्सार्थोपयोगिनाम्
eteṣāṃ kriyate 'nyeṣāṃ tantrāṇyālokya saṃgrahaḥ
rasānāmatha siddhānāṃ cikitsārthopayoginām
- 9
सूनुना सिंहगुप्तस्य रसरत्नसमुच्चयः
रसोपरसलोहानि यन्त्रादिकरणानि च
sūnunā siṃhaguptasya rasaratnasamuccayaḥ
rasoparasalohāni yantrādikaraṇāni ca
- 10
शुद्ध्यर्थमपि लोहानां तन्त्रादिकरणानि च
शुद्धिः सत्त्वं द्रुतिर्भस्मकरणं च प्रवक्ष्यते
śuddhyarthamapi lohānāṃ tantrādikaraṇāni ca
śuddhiḥ sattvaṃ drutirbhasmakaraṇaṃ ca pravakṣyate
- 11
अस्ति नीहारनिलयो महानुत्तरदिङ्मुखे
उत्तुङ्गशृङ्गसंघातलङ्घिताभ्रो महीधरः
asti nīhāranilayo mahānuttaradiṅmukhe
uttuṅgaśṛṅgasaṃghātalaṅghitābhro mahīdharaḥ
- 12
विश्रामाय वियन्मार्गविलङ्घनघनश्रमः
अवतीर्ण इव क्षोणीं शरदम्बुमुचां गणः
viśrāmāya viyanmārgavilaṅghanaghanaśramaḥ
avatīrṇa iva kṣoṇīṃ śaradambumucāṃ gaṇaḥ
- 13
राशिराशीविषाधीशफणाफलकरोचिषाम्
भित्त्वा भुवमिवोत्तीर्णो यो विभाति भृशोन्नतः
rāśirāśīviṣādhīśaphaṇāphalakarociṣām
bhittvā bhuvamivottīrṇo yo vibhāti bhṛśonnataḥ
- 14
ज्वलदौषधयो यस्य नितम्बमणिभूमयः
नक्तमुद्दामतडितामनुकुर्वन्ति वार्मुचाम्
jvaladauṣadhayo yasya nitambamaṇibhūmayaḥ
naktamuddāmataḍitāmanukurvanti vārmucām
- 15
कटके संचरन्तीनां यस्य किंनरयोषिताम्
पादेषु धातुरागेण लाक्षाकृत्यमनुष्ठितम्
kaṭake saṃcarantīnāṃ yasya kiṃnarayoṣitām
pādeṣu dhāturāgeṇa lākṣākṛtyamanuṣṭhitam
- 16
अवतंसितशीतांशुराच्छादितदिगम्बरः
यो गुहाधिगतो लोकैर्गिरीश इति गीयते
avataṃsitaśītāṃśurācchāditadigambaraḥ
yo guhādhigato lokairgirīśa iti gīyate
- 17
निमीलितदृशो नित्यं मुनयो यस्य सानुषु
प्रत्यक्षयन्ति गिरिशमवाङ्मनसगोचरम्
nimīlitadṛśo nityaṃ munayo yasya sānuṣu
pratyakṣayanti giriśamavāṅmanasagocaram
- 18
शिलातलप्रतिहतैर्यस्य निर्झरशीकरैः
अहन्यपि निरीक्षन्ते यक्षास्ताराङ्कितं नभः
śilātalapratihatairyasya nirjharaśīkaraiḥ
ahanyapi nirīkṣante yakṣāstārāṅkitaṃ nabhaḥ
- 19
नीहारपवनोद्रेकनिःसहा यत्र पुरुषाः
निजस्त्रीणां निषेवन्ते कुचोष्माणं निरन्तरम्
nīhārapavanodrekaniḥsahā yatra puruṣāḥ
nijastrīṇāṃ niṣevante kucoṣmāṇaṃ nirantaram
- 20
संचरन्कटके यस्य निदाघे ऽपि दिवाकरः
उद्दामहिमरुद्धोष्मा न शीतांशोर्विभिद्यते
saṃcarankaṭake yasya nidāghe 'pi divākaraḥ
uddāmahimaruddhoṣmā na śītāṃśorvibhidyate
- 21
गुहागृहेषु कस्तूरीमृगनाभिसुगन्धिषु
गायन्ति यत्र किंनर्यो गौरीपरिणयोत्सवम्
guhāgṛheṣu kastūrīmṛganābhisugandhiṣu
gāyanti yatra kiṃnaryo gaurīpariṇayotsavam
- 22
चकास्ति तत्र जगतामादिदेवो महेश्वरः
रसात्मना जगत्त्रातुं जातो यस्मान्महारसः
cakāsti tatra jagatāmādidevo maheśvaraḥ
rasātmanā jagattrātuṃ jāto yasmānmahārasaḥ
- 23
शताश्वमेधेन कृतेन पुण्यं गोकोटिभिः स्वर्णसहस्रदानात्
नृणां भवेत्सूतकदर्शनेन यत्सर्वतीर्थेषु कृताभिषेकात्
śatāśvamedhena kṛtena puṇyaṃ gokoṭibhiḥ svarṇasahasradānāt
nṛṇāṃ bhavetsūtakadarśanena yatsarvatīrtheṣu kṛtābhiṣekāt
- 24
विधाय रसलिङ्गं यो भक्तियुक्तः समर्चयेत्
जगत्त्रितयलिङ्गानां पूजाफलमवाप्नुयात्
vidhāya rasaliṅgaṃ yo bhaktiyuktaḥ samarcayet
jagattritayaliṅgānāṃ pūjāphalamavāpnuyāt
- 25
भक्षणं स्पर्शनं दानं ध्यानं च परिपूजनम्
पञ्चधा रसपूजोक्ता महापातकनाशिनी
bhakṣaṇaṃ sparśanaṃ dānaṃ dhyānaṃ ca paripūjanam
pañcadhā rasapūjoktā mahāpātakanāśinī
- 26
हन्ति भक्षणमात्रेण पूर्वजन्माघसम्भवम्
रोगसंघमशेषाणां नराणां नात्र संशयः
hanti bhakṣaṇamātreṇa pūrvajanmāghasambhavam
rogasaṃghamaśeṣāṇāṃ narāṇāṃ nātra saṃśayaḥ
- 27
पूर्वजन्मकृतं पापं सद्यो नश्यति देहिनाम्
सुगन्धपिष्टसूतेन यदि शम्भुर्विलेपितः
pūrvajanmakṛtaṃ pāpaṃ sadyo naśyati dehinām
sugandhapiṣṭasūtena yadi śambhurvilepitaḥ
- 28
अभ्रकं त्रुटिमात्रं यो रसस्य परिजारयेत्
शतक्रतुफलं तस्य भवेदित्यब्रवीच्छिवः
abhrakaṃ truṭimātraṃ yo rasasya parijārayet
śatakratuphalaṃ tasya bhavedityabravīcchivaḥ
- 29
यश्च निन्दति सूतेन्द्रं शम्भोस्तेजः परात्परम्
स पतेन्नरके घोरे यावत्कल्पविकल्पना
yaśca nindati sūtendraṃ śambhostejaḥ parātparam
sa patennarake ghore yāvatkalpavikalpanā
- 30
रोगिभ्यो यो रसं दत्ते शुद्धिपाकसमन्वितम्
तुलादानाश्वमेधानां फलं प्राप्नोति शाश्वतम्
rogibhyo yo rasaṃ datte śuddhipākasamanvitam
tulādānāśvamedhānāṃ phalaṃ prāpnoti śāśvatam

