21 shlokas
- 1
कटौ कुक्षिप्रदेशे च शूलं प्रथमतो भवेत्
पश्चाद्रोधो ज्वलन्मूत्रम् अश्मरीरोगलक्षणम्
kaṭau kukṣipradeśe ca śūlaṃ prathamato bhavet
paścādrodho jvalanmūtram aśmarīrogalakṣaṇam
- 2
रसं द्विगुणगंधेन मर्दयित्वा प्रयत्नतः
वसुः पुनर्नवा वासा श्वेता ग्राह्या प्रयत्नतः
rasaṃ dviguṇagaṃdhena mardayitvā prayatnataḥ
vasuḥ punarnavā vāsā śvetā grāhyā prayatnataḥ
- 3
तद्द्रवैर्भावयेदेनं प्रत्येकं तु दिनत्रयम्
पक्वं मूषागतं शुष्कं स्वेदयेज्जलयन्त्रतः
taddravairbhāvayedenaṃ pratyekaṃ tu dinatrayam
pakvaṃ mūṣāgataṃ śuṣkaṃ svedayejjalayantrataḥ
- 4
पाषाणभेदी नामायं नियुञ्जीतास्य वल्लयुक्
गोपालकर्कटीदुग्धं भूम्यामलकमूलिका
कुलत्थक्वाथतोयेन पिष्ट्वा तदनुपाययेत्
pāṣāṇabhedī nāmāyaṃ niyuñjītāsya vallayuk
gopālakarkaṭīdugdhaṃ bhūmyāmalakamūlikā
kulatthakvāthatoyena piṣṭvā tadanupāyayet
- 5
रसेन सितवर्षाभ्वा रसं द्विगुणगंधकम्
घृष्टं पचेच्च मूषायां द्वौ माषौ तस्य भक्षयेत्
rasena sitavarṣābhvā rasaṃ dviguṇagaṃdhakam
ghṛṣṭaṃ pacecca mūṣāyāṃ dvau māṣau tasya bhakṣayet
- 6
पातालकर्कटीमूलं कुलत्थोदैः पिबेदनु
गोकण्टकसदाभद्रामूलक्वाथं पिबेन्निशि
अयं पाषाणभिन्नाम्ना रसः पाषाणभेदकः
pātālakarkaṭīmūlaṃ kulatthodaiḥ pibedanu
gokaṇṭakasadābhadrāmūlakvāthaṃ pibenniśi
ayaṃ pāṣāṇabhinnāmnā rasaḥ pāṣāṇabhedakaḥ
- 7
गोक्षुरबीजसमुत्थं चूर्णमविक्षीरसंयुक्तम्
रसवरमिश्रं पिबतश्चूर्णीभूत्वाश्मरी पतति
gokṣurabījasamutthaṃ cūrṇamavikṣīrasaṃyuktam
rasavaramiśraṃ pibataścūrṇībhūtvāśmarī patati
- 8
मृतताम्रमजाक्षीरैः पाच्यं तुल्यं गते द्रवे
तत्ताम्रं शुद्धसूतं च गंधकं च समं समम्
mṛtatāmramajākṣīraiḥ pācyaṃ tulyaṃ gate drave
tattāmraṃ śuddhasūtaṃ ca gaṃdhakaṃ ca samaṃ samam
- 9
निर्गुण्ड्युत्थद्रवैर्मर्द्यं दिनं तद्गोलम् अन्ध्रयेत्
यामैकं वालुकायंत्रे पाच्यं योज्यं द्विगुञ्जकम्
nirguṇḍyutthadravairmardyaṃ dinaṃ tadgolam andhrayet
yāmaikaṃ vālukāyaṃtre pācyaṃ yojyaṃ dviguñjakam
- 10
बीजपूरस्य मूलं तु सजलं चानुपाययेत्
रसस्त्रिविक्रमो नाम्ना मासैकेनाश्मरीप्रणुत्
bījapūrasya mūlaṃ tu sajalaṃ cānupāyayet
rasastrivikramo nāmnā māsaikenāśmarīpraṇut
- 11
तिलापामार्गकाण्डं च कारवेल्ल्या यवस्य च
पलाशकाष्ठसंयुक्तं सर्वं तुल्यं दहेत्पुटे
tilāpāmārgakāṇḍaṃ ca kāravellyā yavasya ca
palāśakāṣṭhasaṃyuktaṃ sarvaṃ tulyaṃ dahetpuṭe
- 12
तन्निष्कैकमजामूत्रैर्वटीं चानन्दभैरवीम्
पाययेदश्मरीं हन्ति सप्ताहान्नात्र संशयः
tanniṣkaikamajāmūtrairvaṭīṃ cānandabhairavīm
pāyayedaśmarīṃ hanti saptāhānnātra saṃśayaḥ
- 13
पाण्डुरं फलिकामूलं जलेनैवाश्मरीहरम्
pāṇḍuraṃ phalikāmūlaṃ jalenaivāśmarīharam
- 14
मधुना च यवक्षारं लीढं स्याद् अश्मरीहरम्
madhunā ca yavakṣāraṃ līḍhaṃ syād aśmarīharam
- 15
हरिद्रागुडकर्षैकं चारनालेन वा पिबेत्
haridrāguḍakarṣaikaṃ cāranālena vā pibet
- 16
वन्ध्याकर्कोटकीकन्दं भक्ष्य क्षौद्रं सितायुतम्
अश्मरीं हन्ति नो चित्रं कर्षमात्रं शिवोदितम्
vandhyākarkoṭakīkandaṃ bhakṣya kṣaudraṃ sitāyutam
aśmarīṃ hanti no citraṃ karṣamātraṃ śivoditam
- 17
शोषस्तापोऽङ्गकार्श्यं च बहुमूत्रत्वम् एव च
अस्वास्थ्यं सर्वगात्रेषु मूत्रमेहस्य लक्षणम्
śoṣastāpo'ṅgakārśyaṃ ca bahumūtratvam eva ca
asvāsthyaṃ sarvagātreṣu mūtramehasya lakṣaṇam
- 18
मार्कण्डीचूर्णमादाय सगुडं खादयेन्निशि
mārkaṇḍīcūrṇamādāya saguḍaṃ khādayenniśi
- 19
मृतसूतस्य भागैकं चत्वारः शुद्धगन्धकात्
पिष्ट्वा वराटकं तेन रसपादं च टंकणम्
mṛtasūtasya bhāgaikaṃ catvāraḥ śuddhagandhakāt
piṣṭvā varāṭakaṃ tena rasapādaṃ ca ṭaṃkaṇam
- 20
क्षीरैः पिष्ट्वा मुखं रुद्ध्वा वराटांश्चान्ध्रयेत्पुटेत्
स्वांगशीतं विचूर्ण्याथ लघुलोकेश्वरो रसः
kṣīraiḥ piṣṭvā mukhaṃ ruddhvā varāṭāṃścāndhrayetpuṭet
svāṃgaśītaṃ vicūrṇyātha laghulokeśvaro rasaḥ
- 21
चतुर्गुंजारसश्चायं मरिचैकोनविंशतिः
जातिमूलपलैकं तु अजाक्षीरेण पेषयेत्
शर्कराभावितं चानु पीत्वा कृच्छ्रहरं परम्
caturguṃjārasaścāyaṃ maricaikonaviṃśatiḥ
jātimūlapalaikaṃ tu ajākṣīreṇa peṣayet
śarkarābhāvitaṃ cānu pītvā kṛcchraharaṃ param

