8 shlokas
- 1
निक्षिप्तं वा परद्रव्यं नष्टं लब्ध्वापहृत्य वा
विक्रीयते ऽसमक्षं यद्विज्ञेयो ऽस्वामिविक्रयः
nikṣiptaṃ vā paradravyaṃ naṣṭaṃ labdhvāpahṛtya vā
vikrīyate 'samakṣaṃ yadvijñeyo 'svāmivikrayaḥ
- 2
द्रव्यम् अस्वामिविक्रीतं प्राप्य स्वामी समाप्नुयात्
प्रकाशं क्रयतः शुद्धिः क्रेतुः स्तेयं रहः क्रयात्
dravyam asvāmivikrītaṃ prāpya svāmī samāpnuyāt
prakāśaṃ krayataḥ śuddhiḥ kretuḥ steyaṃ rahaḥ krayāt
- 3
अस्वाम्यनुमताद्दासाद् असतश्च जनाद्रहः
हीनमूल्यम् अवेलायां क्रीणंस्तद्दोषभाग्भवेत्
asvāmyanumatāddāsād asataśca janādrahaḥ
hīnamūlyam avelāyāṃ krīṇaṃstaddoṣabhāgbhavet
- 4
न गूहेतागमं क्रेता शुद्धिस्तस्य तदागमात्
विपर्यये तुल्यदोषः स्तेयदण्डं च सो ऽर्हति
na gūhetāgamaṃ kretā śuddhistasya tadāgamāt
viparyaye tulyadoṣaḥ steyadaṇḍaṃ ca so 'rhati
- 5
विक्रेता स्वामिने ऽर्थं च क्रेतुर्मूल्यं च तत्कृतम्
दद्याद्दण्डं तथा राज्ञे विधिर् अस्वामिविक्रये
vikretā svāmine 'rthaṃ ca kreturmūlyaṃ ca tatkṛtam
dadyāddaṇḍaṃ tathā rājñe vidhir asvāmivikraye
- 6
परेण निहितं लब्ध्वा राजन्य् उपहरेन्निधिम्
राजगामी निधिः सर्वः सर्वेषां ब्राह्मणाद् ऋते
pareṇa nihitaṃ labdhvā rājany upaharennidhim
rājagāmī nidhiḥ sarvaḥ sarveṣāṃ brāhmaṇād ṛte
- 7
ब्राह्मणो ऽपि निधिं लब्ध्वा क्षिप्रं राज्ञे निवेदयेत्
तेन दत्तं च भुञ्जीत स्तेनः स्याद् अनिवेदयन्
brāhmaṇo 'pi nidhiṃ labdhvā kṣipraṃ rājñe nivedayet
tena dattaṃ ca bhuñjīta stenaḥ syād anivedayan
- 8
स्वम् अप्य् अर्थं तथा नष्टं लब्ध्वा राज्ञे निवेदयेत्
गृह्णीयात्तत्र तं शुद्धम् अशुद्धं स्यात्ततो ऽन्यथा
svam apy arthaṃ tathā naṣṭaṃ labdhvā rājñe nivedayet
gṛhṇīyāttatra taṃ śuddham aśuddhaṃ syāttato 'nyathā

