21 shlokas
- 1
प्रसर्पन्ति तृतीयसवनाय देवी द्वाराव् इत्य् अत एवोर्ध्वेन
prasarpanti tṛtīyasavanāya devī dvārāv ity ata evordhvena
- 2
सम्प्रसृप्तान्विदित्वाध्वर्युः प्राङ् आयन्न् आहाग्नीत्परिश्रयणम् आहर प्रतिप्रस्थातर् आशिरम् आनय शृतातङ्क्यम् आदित्यग्रहाय दध्य् आहरैहि यजमानेति
samprasṛptānviditvādhvaryuḥ prāṅ āyann āhāgnītpariśrayaṇam āhara pratiprasthātar āśiram ānaya śṛtātaṅkyam ādityagrahāya dadhy āharaihi yajamāneti
- 3
पूर्वया द्वारा हविर्धानं प्रपाद्य य एष उपांशुपात्रे ऽंशुः प्रास्तो भवति तं माध्यंदिनीय ऋजीषे ऽपिसृज्य यम् एव कं च ग्रावाणम् आदायोन्नेतारम् आहाहरोपसृजेति
pūrvayā dvārā havirdhānaṃ prapādya ya eṣa upāṃśupātre 'ṃśuḥ prāsto bhavati taṃ mādhyaṃdinīya ṛjīṣe 'pisṛjya yam eva kaṃ ca grāvāṇam ādāyonnetāram āhāharopasṛjeti
- 4
उपसृजत्य् उन्नेताधवनीयाद् उदचनेन
upasṛjaty unnetādhavanīyād udacanena
- 5
अपरिमितम् अभिषुत्याथैनं सुसंभृतं संभरण्यां संभृत्योन्नेत्र उत्प्रयच्छति
aparimitam abhiṣutyāthainaṃ susaṃbhṛtaṃ saṃbharaṇyāṃ saṃbhṛtyonnetra utprayacchati
- 6
तम् उन्नेताधवनीये ऽवनयति
tam unnetādhavanīye 'vanayati
- 7
एवम् एव द्वितीयः पर्यायः संतिष्ठते
evam eva dvitīyaḥ paryāyaḥ saṃtiṣṭhate
- 8
एवं तृतीयः
evaṃ tṛtīyaḥ
- 9
ऋजीषम् अन्ततो दशापवित्रेण परिवेष्ट्योन्नेत्र उत्प्रयच्छति
ṛjīṣam antato daśāpavitreṇa pariveṣṭyonnetra utprayacchati
- 10
तद् उन्नेताधवनीये विक्षाल्य प्रपीड्य दक्षिणस्य हविर्धानस्यान्तरेणेषे उपातिहृत्य नीड उत्सादयति
tad unnetādhavanīye vikṣālya prapīḍya dakṣiṇasya havirdhānasyāntareṇeṣe upātihṛtya nīḍa utsādayati
- 11
परिश्रयन्ति पूर्वां द्वारम् अपरां च
pariśrayanti pūrvāṃ dvāram aparāṃ ca
- 12
अथादत्त आदित्यस्थाल्या औपशयं पात्रम्
athādatta ādityasthālyā aupaśayaṃ pātram
- 13
तस्मिन्न् एतस्य राज्ञस्तृतीयवेलां गृह्णाति य आदित्यस्थाल्यां भवति कदा चन स्तरीर् असीत्य् अनुद्रुत्योपयामगृहीतो ऽस्य् आदित्येभ्यस्त्वा जुष्टं गृह्णामीति
tasminn etasya rājñastṛtīyavelāṃ gṛhṇāti ya ādityasthālyāṃ bhavati kadā cana starīr asīty anudrutyopayāmagṛhīto 'sy ādityebhyastvā juṣṭaṃ gṛhṇāmīti
- 14
बर्हिषी अन्तर्धाय शृतातङ्क्येन श्रीणाति कदा चन प्रयुच्छसीत्य् अनुद्रुत्योपयामगृहीतो ऽस्य् आदित्येभ्यस्त्वा जुष्टं गृह्णामीति
barhiṣī antardhāya śṛtātaṅkyena śrīṇāti kadā cana prayucchasīty anudrutyopayāmagṛhīto 'sy ādityebhyastvā juṣṭaṃ gṛhṇāmīti
- 15
अपोद्धृत्य बर्हिषी अर्धवेलां राज्ञो गृह्णाति यज्ञो देवानां प्रत्येति सुम्नम् इत्य् अनुद्रुत्योपयामगृहीतो ऽस्य् आदित्येभ्यस्त्वा जुष्टं गृह्णामीति
apoddhṛtya barhiṣī ardhavelāṃ rājño gṛhṇāti yajño devānāṃ pratyeti sumnam ity anudrutyopayāmagṛhīto 'sy ādityebhyastvā juṣṭaṃ gṛhṇāmīti
- 16
अथैनं स्थविमत उपांशुसवनेन श्रीणाति विवस्व आदित्यैष ते सोमपीथस्तेन मन्दस्व तेन तृप्य तृप्यास्म ते वयं तर्पयितारो या दिव्या वृष्टिस्तया त्वा श्रीणामीति
athainaṃ sthavimata upāṃśusavanena śrīṇāti vivasva ādityaiṣa te somapīthastena mandasva tena tṛpya tṛpyāsma te vayaṃ tarpayitāro yā divyā vṛṣṭistayā tvā śrīṇāmīti
- 17
अथैनम् उद्गृह्णाति
athainam udgṛhṇāti
- 18
अत्र विज्ञानम् उपैति यदि ताजक्प्रस्कन्देद्वर्षुकः पर्जन्यो भवति
atra vijñānam upaiti yadi tājakpraskandedvarṣukaḥ parjanyo bhavati
- 19
यदि चिरम् अवर्षुकः
yadi ciram avarṣukaḥ
- 20
न सादयतीति ब्राह्मणम्
na sādayatīti brāhmaṇam
- 21
अथैनम् उपांशुसवनं दशापवित्रेण परिवेष्ट्य तेनाधस्तात्पात्रम् उद्धन्त्य् ऊर्मिकारम् अविषिञ्चन्
athainam upāṃśusavanaṃ daśāpavitreṇa pariveṣṭya tenādhastātpātram uddhanty ūrmikāram aviṣiñcan

