28 shlokas
- 1
अथान्तरेण हविर्धाने उपविश्य दधिघर्माय दधि याचति
athāntareṇa havirdhāne upaviśya dadhigharmāya dadhi yācati
- 2
तद् आहृतम् अवेक्षते ज्योतिर् असि वैश्वानरं पृश्नियै दुग्धम् इति
tad āhṛtam avekṣate jyotir asi vaiśvānaraṃ pṛśniyai dugdham iti
- 3
बर्हिषी अन्तर्धाय कंसे वा चमसे वा गृह्णाति यावती द्यावापृथिवी महित्वा यावच्च सप्त सिन्धवो वितस्थुः
तावन्तम् इन्द्र ते ग्रहं सहोर्जा गृह्णाम्य् अस्तृतम् इति
barhiṣī antardhāya kaṃse vā camase vā gṛhṇāti yāvatī dyāvāpṛthivī mahitvā yāvacca sapta sindhavo vitasthuḥ
tāvantam indra te grahaṃ sahorjā gṛhṇāmy astṛtam iti
- 4
अपोद्धृत्य बर्हिषी अथैनं श्रीणाति वाक्च त्वा मनश्च श्रीणीतां प्राणश्च त्वापानश्च श्रीणीतां चक्षुश्च त्वा श्रोत्रं च श्रीणीतां दक्षश्च त्वा बलं च श्रीणीताम् ओजश्च त्वा सहश्च श्रीणीताम् आयुश्च त्वा जरा च श्रीणीताम् आत्मा च त्वा तनूश्च श्रीणीतां शृतो ऽसि शृतंकृतः शृताय त्वा शृतेभ्यस्त्वा शृतं कृण्व् इति
apoddhṛtya barhiṣī athainaṃ śrīṇāti vākca tvā manaśca śrīṇītāṃ prāṇaśca tvāpānaśca śrīṇītāṃ cakṣuśca tvā śrotraṃ ca śrīṇītāṃ dakṣaśca tvā balaṃ ca śrīṇītām ojaśca tvā sahaśca śrīṇītām āyuśca tvā jarā ca śrīṇītām ātmā ca tvā tanūśca śrīṇītāṃ śṛto 'si śṛtaṃkṛtaḥ śṛtāya tvā śṛtebhyastvā śṛtaṃ kṛṇv iti
- 5
अथाह होतर्वदस्व यत्ते वाद्यम् इति
athāha hotarvadasva yatte vādyam iti
- 6
अथैनम् आदायोपोत्तिष्ठन्न् आह श्रातं हविर् इति
athainam ādāyopottiṣṭhann āha śrātaṃ havir iti
- 7
अत्याक्रम्याश्राव्याह दधिघर्मस्य यजेति
atyākramyāśrāvyāha dadhigharmasya yajeti
- 8
वषट्कृते जुहोति यम् इन्द्रम् आहुर्वरुणं यम् आहुर्यं मित्रम् आहुर्यम् उ सत्यम् आहुः
यो देवानां देवतमस्तपोजास्तस्मै त्वा तेभ्यस्त्वा स्वाहेति
vaṣaṭkṛte juhoti yam indram āhurvaruṇaṃ yam āhuryaṃ mitram āhuryam u satyam āhuḥ
yo devānāṃ devatamastapojāstasmai tvā tebhyastvā svāheti
- 9
अनुवषट्कृते हुत्वा हरति भक्षम्
anuvaṣaṭkṛte hutvā harati bhakṣam
- 10
स यावन्तः प्रवर्ग्यस्यर्त्विजस्तेषूपहवम् इष्ट्वा यजमान एव प्रत्यक्षं भक्षयति मयि त्यद् इन्द्रियं महन्मयि दक्षो मयि क्रतुः
मयि धायि सुवीर्यं त्रिशुग्घर्मो विभातु मे
sa yāvantaḥ pravargyasyartvijasteṣūpahavam iṣṭvā yajamāna eva pratyakṣaṃ bhakṣayati mayi tyad indriyaṃ mahanmayi dakṣo mayi kratuḥ
mayi dhāyi suvīryaṃ triśuggharmo vibhātu me
- 11
आकूत्या मनसा सह विराजा ज्योतिषा सह
यज्ञेन पयसा सह ब्रह्मणा तेजसा सह
क्षत्रेण यशसा सह सत्येन तपसा सह
तस्य दोहम् अशीमहि तस्य सुम्नम् अशीमहि
तस्य भक्षम् अशीमहि तस्य त इन्द्रेण पीतस्य मधुमत उपहूतस्योपहूतो भक्षयामीति
ākūtyā manasā saha virājā jyotiṣā saha
yajñena payasā saha brahmaṇā tejasā saha
kṣatreṇa yaśasā saha satyena tapasā saha
tasya doham aśīmahi tasya sumnam aśīmahi
tasya bhakṣam aśīmahi tasya ta indreṇa pītasya madhumata upahūtasyopahūto bhakṣayāmīti
- 12
निर्णिज्य पात्रं प्रयच्छति
nirṇijya pātraṃ prayacchati
- 13
तथा सवनीयान्पुरोडाशान्याचति
tathā savanīyānpuroḍāśānyācati
- 14
तेषां तथैव समवद्यन्न् आह माध्यंदिनस्य सवनस्येन्द्राय पुरोडाशानाम् अवदीयमानानाम् अनुब्रूहीति
teṣāṃ tathaiva samavadyann āha mādhyaṃdinasya savanasyendrāya puroḍāśānām avadīyamānānām anubrūhīti
- 15
पूर्वार्धाद् अवदायापरार्धाद् अवद्यति
pūrvārdhād avadāyāparārdhād avadyati
- 16
अभिघारयति
abhighārayati
- 17
प्रत्यनक्ति
pratyanakti
- 18
तथोपभृति स्विष्टकृते सर्वेषां सकृत्सकृद् उत्तरार्धाद् अवद्यति
tathopabhṛti sviṣṭakṛte sarveṣāṃ sakṛtsakṛd uttarārdhād avadyati
- 19
द्विर् अभिघारयति
dvir abhighārayati
- 20
न प्रत्यनक्ति
na pratyanakti
- 21
अत्याक्रम्याश्राव्याह माध्यंदिनस्य सवनस्येन्द्राय पुरोडाशान्प्रस्थितान्प्रेष्येति
atyākramyāśrāvyāha mādhyaṃdinasya savanasyendrāya puroḍāśānprasthitānpreṣyeti
- 22
वषट्कृते जुहोति
vaṣaṭkṛte juhoti
- 23
तथा समावपमान आहाग्नये ऽनुब्रूहीति
tathā samāvapamāna āhāgnaye 'nubrūhīti
- 24
आश्राव्याहाग्नये प्रेष्येति
āśrāvyāhāgnaye preṣyeti
- 25
वषट्कृत उत्तरार्धपूर्वार्धे ऽतिहाय पूर्वा आहुतीर्जुहोति
vaṣaṭkṛta uttarārdhapūrvārdhe 'tihāya pūrvā āhutīrjuhoti
- 26
तथोदङ्ङ् अत्याक्रम्य यथायतनं स्रुचौ सादयित्वा तथैव पात्र्याम् इडां समवधाय प्रतीचः पुरोडाशान्प्रहिणोति
tathodaṅṅ atyākramya yathāyatanaṃ srucau sādayitvā tathaiva pātryām iḍāṃ samavadhāya pratīcaḥ puroḍāśānprahiṇoti
- 27
अनु हैके संयन्ति पशव इडेति वदन्तः
anu haike saṃyanti paśava iḍeti vadantaḥ
- 28
अथ प्राङ् आयन्न् आहोन्नीयमानेभ्यो ऽनुब्रूहि
atha prāṅ āyann āhonnīyamānebhyo 'nubrūhi

