20 shlokas
- 1
आ समुद्राद् आन्तरिक्षात्प्रजापतिर् उदधिं च्यावयातीन्द्रः प्रस्नौतु मरुतो वर्षयन्तून्नम्भय पृथिवीं भिन्द्धीदं दिव्यं नभः
उद्नो दिव्यस्य नो देहीशानो विसृजा दृतिम् इति
ā samudrād āntarikṣātprajāpatir udadhiṃ cyāvayātīndraḥ prasnautu maruto varṣayantūnnambhaya pṛthivīṃ bhinddhīdaṃ divyaṃ nabhaḥ
udno divyasya no dehīśāno visṛjā dṛtim iti
- 2
अथैनम् उपांशुसवनं दशापवित्रेण परिमृज्य ग्रावस्व् अपिसृजति
athainam upāṃśusavanaṃ daśāpavitreṇa parimṛjya grāvasv apisṛjati
- 3
विवृण्वन्ति पूर्वां द्वारम् अपरां च
vivṛṇvanti pūrvāṃ dvāram aparāṃ ca
- 4
अथैतं ग्रहं बर्हिर्हस्तेनापिधायोपोत्तिष्ठन्न् आहादित्येभ्यः प्रियेभ्यः प्रियधामभ्यः प्रियव्रतेभ्यो महस्वसरस्य पतिभ्य उरोर् अन्तरिक्षस्याध्यक्षेभ्यो ऽनुब्रूहीति
athaitaṃ grahaṃ barhirhastenāpidhāyopottiṣṭhann āhādityebhyaḥ priyebhyaḥ priyadhāmabhyaḥ priyavratebhyo mahasvasarasya patibhya uror antarikṣasyādhyakṣebhyo 'nubrūhīti
- 5
अत्याक्रम्याश्राव्याहादित्येभ्यः प्रियेभ्यः प्रियधामभ्यः प्रियव्रतेभ्यो महस्वसरस्य पतिभ्य उरोर् अन्तरिक्षस्याध्यक्षेभ्यः प्रेष्येति
atyākramyāśrāvyāhādityebhyaḥ priyebhyaḥ priyadhāmabhyaḥ priyavratebhyo mahasvasarasya patibhya uror antarikṣasyādhyakṣebhyaḥ preṣyeti
- 6
वषट्कृत ओषधीः प्रास्याग्नाव् आदित्यं जुहोति सकृद् एव
vaṣaṭkṛta oṣadhīḥ prāsyāgnāv ādityaṃ juhoti sakṛd eva
- 7
न हुत्वान्वीक्षते
na hutvānvīkṣate
- 8
पर्यावृत्तस्यैव प्रतिप्रस्थाता पात्रम् आदत्ते
paryāvṛttasyaiva pratiprasthātā pātram ādatte
- 9
एतस्मिन्काले प्रतिहर्ता पूतभृतो बिले पवित्रं वितत्य द्वौ वा त्रीन्वा राज्ञ उदचनान् आनयति
etasminkāle pratihartā pūtabhṛto bile pavitraṃ vitatya dvau vā trīnvā rājña udacanān ānayati
- 10
आग्रयणम् एवाध्वर्युर् आदत्ते
āgrayaṇam evādhvaryur ādatte
- 11
आदित्यस्थालीं प्रतिप्रस्थाता सोपशयां सम्प्रगृह्णाति
ādityasthālīṃ pratiprasthātā sopaśayāṃ sampragṛhṇāti
- 12
तासां तिसृणां चतसृणां वा धाराणां तथोपरिष्टाद् आग्रयणम् आनीयाधस्ताद् उपगृह्णाति
tāsāṃ tisṛṇāṃ catasṛṇāṃ vā dhārāṇāṃ tathopariṣṭād āgrayaṇam ānīyādhastād upagṛhṇāti
- 13
तं तथैव त्रिर् अभिहिङ्कृत्य परिमृज्य सादयति
taṃ tathaiva trir abhihiṅkṛtya parimṛjya sādayati
- 14
अपोद्धृत्य पवित्रं बर्हिषी अन्तर्धायाशिरम् अवनयत्य् अन्वारब्धायां पत्न्याम् अस्मे देवासो वपुषे चिकित्सतेति चतसृभिर् अनुच्छन्दसम्
apoddhṛtya pavitraṃ barhiṣī antardhāyāśiram avanayaty anvārabdhāyāṃ patnyām asme devāso vapuṣe cikitsateti catasṛbhir anucchandasam
- 15
अपोद्धृत्य बर्हिषी पूतभृतो बिले द्रप्सान् अनुमन्त्रयते
apoddhṛtya barhiṣī pūtabhṛto bile drapsān anumantrayate
- 16
द्वौ पवमानस्य ग्रहौ गृह्णाति
dvau pavamānasya grahau gṛhṇāti
- 17
तथोन्नेतर् इत्य् आह प्राञ्चं राजानं पूतभृतम् अभि संपवयताद्दशाभिर् आधवनीयं मृष्ट्वा न्युब्जताद् इति
tathonnetar ity āha prāñcaṃ rājānaṃ pūtabhṛtam abhi saṃpavayatāddaśābhir ādhavanīyaṃ mṛṣṭvā nyubjatād iti
- 18
स तथा करोति
sa tathā karoti
- 19
तथाप उपस्पृश्य बर्हिषी आदायोपनिःसर्पति
tathāpa upaspṛśya barhiṣī ādāyopaniḥsarpati
- 20
तेषु तथैव समन्वारब्धेष्व् आहवनीये स्रुवाहुतिं जुहोति
teṣu tathaiva samanvārabdheṣv āhavanīye sruvāhutiṃ juhoti

