31 shlokas
- 1
अथ प्राङ् आयन्न् आह देवाय सवित्रे ऽनुब्रूहि प्रतिप्रस्थातर् अन्तर्यामपात्रेण सावित्रम् आग्रयणाद्ग्रहं गृहीत्वोपास्व मा सीषद इति
atha prāṅ āyann āha devāya savitre 'nubrūhi pratiprasthātar antaryāmapātreṇa sāvitram āgrayaṇādgrahaṃ gṛhītvopāsva mā sīṣada iti
- 2
तच्छ्रुत्वा प्रतिप्रस्थातान्तर्यामपात्रेण सावित्रम् आग्रयणाद्ग्रहं गृह्णाति वामम् अद्य सवितर् इत्य् अनुद्रुत्योपयामगृहीतो ऽसि देवाय त्वा सवित्रे जुष्टं गृह्णामीति
tacchrutvā pratiprasthātāntaryāmapātreṇa sāvitram āgrayaṇādgrahaṃ gṛhṇāti vāmam adya savitar ity anudrutyopayāmagṛhīto 'si devāya tvā savitre juṣṭaṃ gṛhṇāmīti
- 3
न सादयतीति ब्राह्मणम्
na sādayatīti brāhmaṇam
- 4
असादयित्वैवोपनिष्क्रम्याश्राव्याह देवाय सवित्रे प्रेष्येति
asādayitvaivopaniṣkramyāśrāvyāha devāya savitre preṣyeti
- 5
वषट्कृते जुहोति
vaṣaṭkṛte juhoti
- 6
अथ वै भवति
atha vai bhavati
- 7
सवितृपात्रेण वैश्वदेवं कलशाद्गृह्णाति सोमे सोमम् अभिगृह्णातीति
savitṛpātreṇa vaiśvadevaṃ kalaśādgṛhṇāti some somam abhigṛhṇātīti
- 8
स सवितृपात्रेण वैश्वदेवं कलशाद्गृह्णाति सोमे सोमम् अभिगृह्णात्य् उपयामगृहीतो ऽसि सुशर्मासि सुप्रतिष्ठानो बृहदुक्षे नमो विश्वेभ्यस्त्वा देवेभ्यो जुष्टं गृह्णामीति
sa savitṛpātreṇa vaiśvadevaṃ kalaśādgṛhṇāti some somam abhigṛhṇāty upayāmagṛhīto 'si suśarmāsi supratiṣṭhāno bṛhadukṣe namo viśvebhyastvā devebhyo juṣṭaṃ gṛhṇāmīti
- 9
परिमृज्य सादयत्य् एष ते योनिर्विश्वेभ्यस्त्वा देवेभ्य इति
parimṛjya sādayaty eṣa te yonirviśvebhyastvā devebhya iti
- 10
अथाध्वर्युः प्रदक्षिणम् आवृत्य प्रत्यङ्ङ् आद्रुत्य होत्रा समीक्ष्य पराङ् आवर्तत इडा देवहूर् इति
athādhvaryuḥ pradakṣiṇam āvṛtya pratyaṅṅ ādrutya hotrā samīkṣya parāṅ āvartata iḍā devahūr iti
- 11
यावद् एतस्य यजुषः पर्याप्नोति तावज्जपति
yāvad etasya yajuṣaḥ paryāpnoti tāvajjapati
- 12
अभ्य् एनम् आह्वयते होता
abhy enam āhvayate hotā
- 13
प्रत्याह्वयते ऽध्वर्युः
pratyāhvayate 'dhvaryuḥ
- 14
शंसति
śaṃsati
- 15
प्रतिगृणाति
pratigṛṇāti
- 16
अथ यत्र होतुर् अभिजानात्य् एकया च दशभिश्च स्वभूत इति तत्प्रतिप्रस्थाता द्विदेवत्यपात्राणि मार्जालीये मार्जयित्वा पात्रेष्व् अपिसृजति
atha yatra hotur abhijānāty ekayā ca daśabhiśca svabhūta iti tatpratiprasthātā dvidevatyapātrāṇi mārjālīye mārjayitvā pātreṣv apisṛjati
- 17
अथ यत्र होतुर् अभिजानाति प्र द्यावा यज्ञैः पृथिवी ऋतावृधेति तद् अन्यतोमदं प्रतिगृणात्य् ओथा मोद इव मदा मोद इवेत्य् आ व्याहावात्
atha yatra hotur abhijānāti pra dyāvā yajñaiḥ pṛthivī ṛtāvṛdheti tad anyatomadaṃ pratigṛṇāty othā moda iva madā moda ivety ā vyāhāvāt
- 18
अथ यत्र होतुर् अभिजानाति तद्राधो अद्य सवितुर्वरेण्यम् इति तद् उभयतोमदम् एव प्रतिगृणाति मदा मोद इव मदा मोद इवेत्य् आ व्याहावात्
atha yatra hotur abhijānāti tadrādho adya saviturvareṇyam iti tad ubhayatomadam eva pratigṛṇāti madā moda iva madā moda ivety ā vyāhāvāt
- 19
प्रसिद्धम् उक्थं प्रतिगीर्य प्राङ् एत्योद्यच्छत एतं वैश्वदेवं ग्रहम्
prasiddham ukthaṃ pratigīrya prāṅ etyodyacchata etaṃ vaiśvadevaṃ graham
- 20
अनूद्यच्छन्ते नाराशंसान्
anūdyacchante nārāśaṃsān
- 21
अथाश्रावयत्य् ओ श्रावयास्तु श्रौषड् उक्थशा यज सोमस्येति
athāśrāvayaty o śrāvayāstu śrauṣaḍ ukthaśā yaja somasyeti
- 22
वषट्कृतानुवषट्कृते द्विर्जुहोति
vaṣaṭkṛtānuvaṣaṭkṛte dvirjuhoti
- 23
तथैव द्विर्द्विर्नाराशंसान् अनुप्रकम्पयन्ति
tathaiva dvirdvirnārāśaṃsān anuprakampayanti
- 24
एतत्पात्रं नाराशंसा अन्वायन्ति
etatpātraṃ nārāśaṃsā anvāyanti
- 25
अनुसवनभक्षो विश्वैर्देवैः पीतस्येति
anusavanabhakṣo viśvairdevaiḥ pītasyeti
- 26
होता चैवाध्वर्युश्चैतत्पात्रं संभक्षयतो नराशंसपीतेन नाराशंसान्नराशंसपीतस्य सोम देव ते मतिविदस्तृतीयस्य सवनस्य जगतीछन्दसः पितृपीतस्य मधुमत उपहूतस्योपहूतो भक्षयामीति
hotā caivādhvaryuścaitatpātraṃ saṃbhakṣayato narāśaṃsapītena nārāśaṃsānnarāśaṃsapītasya soma deva te matividastṛtīyasya savanasya jagatīchandasaḥ pitṛpītasya madhumata upahūtasyopahūto bhakṣayāmīti
- 27
होतृचमसम् एवैते त्रयः समुपहूय भक्षयन्ति
hotṛcamasam evaite trayaḥ samupahūya bhakṣayanti
- 28
यथाचमसं चमसान्
yathācamasaṃ camasān
- 29
हिन्व म इत्य् आत्मानं प्रत्यभिमृशन्ते
hinva ma ity ātmānaṃ pratyabhimṛśante
- 30
नाप्याययन्ति चमसान्
nāpyāyayanti camasān

