30 shlokas
- 1
अथ प्राङ् आयन्न् आहेन्द्राय मरुत्वते ऽनुब्रूहीति
atha prāṅ āyann āhendrāya marutvate 'nubrūhīti
- 2
तच्छ्रुत्वा प्रतिप्रस्थाता ग्रहाव् आदायोपनिष्क्रामति
tacchrutvā pratiprasthātā grahāv ādāyopaniṣkrāmati
- 3
उपनिष्क्रान्तस्यैवाध्वर्युर्ग्रहाव् आदत्ते
upaniṣkrāntasyaivādhvaryurgrahāv ādatte
- 4
उत्तरतस्तिष्ठते प्रतिप्रस्थात्रे ऽन्यतरं प्रयच्छति
uttaratastiṣṭhate pratiprasthātre 'nyataraṃ prayacchati
- 5
अथाश्रावयत्य् ओ श्रावयास्तु श्रौषड् इन्द्राय मरुत्वते प्रेष्येति
athāśrāvayaty o śrāvayāstu śrauṣaḍ indrāya marutvate preṣyeti
- 6
वषट्कृते सहोभौ जुहुतः
vaṣaṭkṛte sahobhau juhutaḥ
- 7
अथ प्रतिप्रस्थाताध्वर्योः पात्रे ग्रहस्य संस्रावम् अवनयति
atha pratiprasthātādhvaryoḥ pātre grahasya saṃsrāvam avanayati
- 8
तम् आह प्रतिप्रस्थातर् एतेन पात्रेण तृतीयं मरुत्वतीयं ग्रहं गृहाणेति
tam āha pratiprasthātar etena pātreṇa tṛtīyaṃ marutvatīyaṃ grahaṃ gṛhāṇeti
- 9
तेन प्रतिप्रस्थाता तृतीयं मरुत्वतीयं ग्रहं गृह्णाति द्रोणकलशात्परिप्लुना पात्रेण मरुत्वाꣳ इन्द्र वृषभो रणायेत्य् अनुद्रुत्योपयामगृहीतो ऽसीन्द्राय त्वा मरुत्वते जुष्टं गृह्णामीति
tena pratiprasthātā tṛtīyaṃ marutvatīyaṃ grahaṃ gṛhṇāti droṇakalaśātpariplunā pātreṇa marutvām̐ indra vṛṣabho raṇāyety anudrutyopayāmagṛhīto 'sīndrāya tvā marutvate juṣṭaṃ gṛhṇāmīti
- 10
परिमृज्य सादयत्य् एष ते योनिर् इन्द्राय त्वा मरुत्वत इति
parimṛjya sādayaty eṣa te yonir indrāya tvā marutvata iti
- 11
अथाध्वर्युः प्रदक्षिणम् आवृत्य प्रत्यङ्ङ् आद्रुत्य होत्रैतत्पात्रं संभक्षयतीन्द्रेण मरुत्वता पीतस्येति
athādhvaryuḥ pradakṣiṇam āvṛtya pratyaṅṅ ādrutya hotraitatpātraṃ saṃbhakṣayatīndreṇa marutvatā pītasyeti
- 12
अथ निगृह्य पात्रं पराङ् आवर्तत इडा देवहूर् इति
atha nigṛhya pātraṃ parāṅ āvartata iḍā devahūr iti
- 13
यावद् एतस्य यजुषः पर्याप्नोति तावज्जपति
yāvad etasya yajuṣaḥ paryāpnoti tāvajjapati
- 14
अभ्य् एनम् आह्वयते होता
abhy enam āhvayate hotā
- 15
प्रत्याह्वयते ऽध्वर्युः
pratyāhvayate 'dhvaryuḥ
- 16
शंसति
śaṃsati
- 17
प्रतिगृणाति
pratigṛṇāti
- 18
प्रसिद्धम् उक्थं प्रतिगीर्य प्राङ् एत्योद्यच्छत एतं तृतीयं मरुत्वतीयं ग्रहम्
prasiddham ukthaṃ pratigīrya prāṅ etyodyacchata etaṃ tṛtīyaṃ marutvatīyaṃ graham
- 19
अनूद्यच्छन्ते नाराशंसान्
anūdyacchante nārāśaṃsān
- 20
अथाश्रावयत्य् ओ श्रावयास्तु श्रौषड् उक्थशा यज सोमस्येति
athāśrāvayaty o śrāvayāstu śrauṣaḍ ukthaśā yaja somasyeti
- 21
वषट्कृतानुवषट्कृते द्विर्जुहोति
vaṣaṭkṛtānuvaṣaṭkṛte dvirjuhoti
- 22
तथैव द्विर्द्विर्नाराशंसान् अनुप्रकम्पयन्ति
tathaiva dvirdvirnārāśaṃsān anuprakampayanti
- 23
एतत्पात्रं नाराशंसा अन्वायन्ति
etatpātraṃ nārāśaṃsā anvāyanti
- 24
अनुसवनभक्ष इन्द्रेण मरुत्वता पीतस्येति
anusavanabhakṣa indreṇa marutvatā pītasyeti
- 25
होता चैवाध्वर्युश्चैतत्पात्रं संभक्षयतो नराशंसपीतेन नाराशंसान्नराशंसपीतस्य सोम देव ते मतिविदो माध्यंदिनस्य सवनस्य त्रिष्टुप्छन्दसः पितृपीतस्य मधुमत उपहूतस्योपहूतो भक्षयामीति
hotā caivādhvaryuścaitatpātraṃ saṃbhakṣayato narāśaṃsapītena nārāśaṃsānnarāśaṃsapītasya soma deva te mativido mādhyaṃdinasya savanasya triṣṭupchandasaḥ pitṛpītasya madhumata upahūtasyopahūto bhakṣayāmīti
- 26
होतृचमसम् एवैते त्रयः समुपहूय भक्षयन्ति
hotṛcamasam evaite trayaḥ samupahūya bhakṣayanti
- 27
यथाचमसं चमसान्
yathācamasaṃ camasān
- 28
हिन्व म इत्य् आत्मानं प्रत्यभिमृशन्ते
hinva ma ity ātmānaṃ pratyabhimṛśante
- 29
आप्याययन्ति चमसान् आप्यायस्व समेतु त इति
āpyāyayanti camasān āpyāyasva sametu ta iti
- 30
सीदन्ति नाराशंसा आप्यायिता दक्षिणस्य हविर्धानस्यापालम्बम् अधोऽधो माहेन्द्राय
sīdanti nārāśaṃsā āpyāyitā dakṣiṇasya havirdhānasyāpālambam adho'dho māhendrāya

