19 shlokas
- 1
इदं तृतीयं सवनं कवीनाम् ऋतेन ये चमसम् ऐरयन्त
ते सौधन्वनाः सुवर् आनशानाः स्विष्टिं नो अभि वसीयो नयन्तु स्वाहेत्य् एतयाध्वर्यू जुहुतः
idaṃ tṛtīyaṃ savanaṃ kavīnām ṛtena ye camasam airayanta
te saudhanvanāḥ suvar ānaśānāḥ sviṣṭiṃ no abhi vasīyo nayantu svāhety etayādhvaryū juhutaḥ
- 2
यथावेदम् इतरे जुह्वति
yathāvedam itare juhvati
- 3
तथा प्रदक्षिणम् आवृत्य सदो ऽभिपवमानं सर्पन्ति
tathā pradakṣiṇam āvṛtya sado 'bhipavamānaṃ sarpanti
- 4
तथा सदसि यथायतनम् उपविशन्ति
tathā sadasi yathāyatanam upaviśanti
- 5
तथोद्गात्रे वा प्रस्तोत्रे वा बर्हिषी प्रयच्छत्य् ऋक्सामयोर् उपस्तरणम् असि मिथुनस्य प्रजात्या इति वा तूष्णीं वा
tathodgātre vā prastotre vā barhiṣī prayacchaty ṛksāmayor upastaraṇam asi mithunasya prajātyā iti vā tūṣṇīṃ vā
- 6
तथोपाकरणं जपति वायुर्हिङ्कर्तेति
tathopākaraṇaṃ japati vāyurhiṅkarteti
- 7
स एष सप्तदश आर्भवः पवमानो भवति
sa eṣa saptadaśa ārbhavaḥ pavamāno bhavati
- 8
तस्य नवम्यां प्रस्तुतायां वाचयति सघासि जगतीच्छन्दा अनु त्वारभे स्वस्ति मा संपारयेति
tasya navamyāṃ prastutāyāṃ vācayati saghāsi jagatīcchandā anu tvārabhe svasti mā saṃpārayeti
- 9
अत्र पञ्चहोतारं व्याचष्टे
atra pañcahotāraṃ vyācaṣṭe
- 10
उद्द्रुते साम्नि संप्रैषम् आहाग्नीच्छालाकान्विहर बर्हि स्तृणाहि पुरोडाशां अलंकुरु प्रतिप्रस्थातः पशौ संवदस्वेति
uddrute sāmni saṃpraiṣam āhāgnīcchālākānvihara barhi stṛṇāhi puroḍāśāṃ alaṃkuru pratiprasthātaḥ paśau saṃvadasveti
- 11
यथासंप्रैषं तौ कुरुतः
yathāsaṃpraiṣaṃ tau kurutaḥ
- 12
तथाप उपस्पृश्याहैहि यजमानेति
tathāpa upaspṛśyāhaihi yajamāneti
- 13
पूर्वया द्वारा हविर्धानं प्रपाद्य तथा समस्तं राजानम् उपतिष्ठते
pūrvayā dvārā havirdhānaṃ prapādya tathā samastaṃ rājānam upatiṣṭhate
- 14
नात्रावकाशैश्चरति
nātrāvakāśaiścarati
- 15
तथा प्रचरण्यां नवकृत्वो गृह्णीते
tathā pracaraṇyāṃ navakṛtvo gṛhṇīte
- 16
तथैष आग्नीध्र आग्नीध्रीयाद्धिष्णियाद् अनुपूर्वं धिष्णियेषु शालाकान्विहरति
tathaiṣa āgnīdhra āgnīdhrīyāddhiṣṇiyād anupūrvaṃ dhiṣṇiyeṣu śālākānviharati
- 17
तथा पुरस्तात्प्रत्यङ्ङ् आसीनो विहृताञ्छालाकान्व्याघारयति
tathā purastātpratyaṅṅ āsīno vihṛtāñchālākānvyāghārayati
- 18
तथोत्तरस्य हविर्धानस्य चुबुके प्रचरणीं सादयति
tathottarasya havirdhānasya cubuke pracaraṇīṃ sādayati
- 19
तथा सांकाशिनेन पथा पृष्ठ्यां स्तृणाति संततां गार्हपत्याद् आहवनीयात्
tathā sāṃkāśinena pathā pṛṣṭhyāṃ stṛṇāti saṃtatāṃ gārhapatyād āhavanīyāt

