5 shlokas
- 1
अष्टावक्र उवाच
aṣṭāvakra uvāca
- 2
न ते सङ्गो ऽस्ति केनापि किं शुद्धस्त्यक्तुम् इच्छसि
सङ्घातविलयं कुर्वन्न् एवम् एव लयं व्रज
na te saṅgo 'sti kenāpi kiṃ śuddhastyaktum icchasi
saṅghātavilayaṃ kurvann evam eva layaṃ vraja
- 3
उदेति भवतो विश्वं वारिधेर् इव बुद्बुदः
इति ज्ञात्वैकम् आत्मानम् एवम् एव लयं व्रज
udeti bhavato viśvaṃ vāridher iva budbudaḥ
iti jñātvaikam ātmānam evam eva layaṃ vraja
- 4
प्रत्यक्षम् अप्य् अवस्तुत्वाद्विश्वं नास्त्य् अमले त्वयि
रज्जुसर्प इव व्यक्तम् एवम् एव लयं व्रज
pratyakṣam apy avastutvādviśvaṃ nāsty amale tvayi
rajjusarpa iva vyaktam evam eva layaṃ vraja
- 5
समदुःखसुखः पूर्ण आशानैराश्ययोः समः
समजीवितमृत्युः सन्न् एवम् एव लयं व्रज
samaduḥkhasukhaḥ pūrṇa āśānairāśyayoḥ samaḥ
samajīvitamṛtyuḥ sann evam eva layaṃ vraja

