14 shlokas
- 1
जनक उवाच
क्व भूतानि क्व देहो वा क्वेन्द्रियाणि क्व वा मनः
क्व शून्यं क्व च नैराश्यं मत्स्वरूपे निरञ्जने
janaka uvāca
kva bhūtāni kva deho vā kvendriyāṇi kva vā manaḥ
kva śūnyaṃ kva ca nairāśyaṃ matsvarūpe nirañjane
- 2
क्व शास्त्रं क्वात्मविज्ञानं क्व वा निर्विषयं मनः
क्व तृप्तिः क्व वितृष्णत्वं गतद्वन्द्वस्य मे सदा
kva śāstraṃ kvātmavijñānaṃ kva vā nirviṣayaṃ manaḥ
kva tṛptiḥ kva vitṛṣṇatvaṃ gatadvandvasya me sadā
- 3
क्व विद्या क्व च वाविद्या क्वाहं क्वेदं मम क्व वा
क्व बन्धः क्व च वा मोक्षः स्वरूपस्य क्व रूपिता
kva vidyā kva ca vāvidyā kvāhaṃ kvedaṃ mama kva vā
kva bandhaḥ kva ca vā mokṣaḥ svarūpasya kva rūpitā
- 4
क्व प्रारब्धानि कर्माणि जीवन्मुक्तिर् अपि क्व वा
क्व तद्विदेहकैवल्यं निर्विशेषस्य सर्वदा
kva prārabdhāni karmāṇi jīvanmuktir api kva vā
kva tadvidehakaivalyaṃ nirviśeṣasya sarvadā
- 5
क्व कर्ता क्व च वा भोक्ता निष्क्रियं स्फुरणं क्व वा
क्वापरोक्षं फलं वा क्व निःस्वभावस्य मे सदा
kva kartā kva ca vā bhoktā niṣkriyaṃ sphuraṇaṃ kva vā
kvāparokṣaṃ phalaṃ vā kva niḥsvabhāvasya me sadā
- 6
क्व लोकः क्व मुमुक्षुर्वा क्व योगी ज्ञानवान्क्व वा
क्व बद्धः क्व च वा मुक्तः स्वस्वरूपे ऽहम् अद्वये
kva lokaḥ kva mumukṣurvā kva yogī jñānavānkva vā
kva baddhaḥ kva ca vā muktaḥ svasvarūpe 'ham advaye
- 7
क्व सृष्टिः क्व च संहारः क्व साध्यं क्व च साधनम्
क्व साधकः क्व सिद्धिर्वा स्वस्वरूपे ऽहम् अद्वये
kva sṛṣṭiḥ kva ca saṃhāraḥ kva sādhyaṃ kva ca sādhanam
kva sādhakaḥ kva siddhirvā svasvarūpe 'ham advaye
- 8
क्व प्रमाता प्रमाणं वा क्व प्रमेयं क्व च प्रमा
क्व किंचित्क्व न किंचिद्वा सर्वदा विमलस्य मे
kva pramātā pramāṇaṃ vā kva prameyaṃ kva ca pramā
kva kiṃcitkva na kiṃcidvā sarvadā vimalasya me
- 9
क्व विक्षेपः क्व चैकाग्र्यं क्व निर्बोधः क्व मूढता
क्व हर्षः क्व विषादो वा सर्वदा निष्क्रियस्य मे
kva vikṣepaḥ kva caikāgryaṃ kva nirbodhaḥ kva mūḍhatā
kva harṣaḥ kva viṣādo vā sarvadā niṣkriyasya me
- 10
क्व चैष व्यवहारो वा क्व च सा परमार्थता
क्व सुखं क्व च वा दुःखं निर्विमर्शस्य मे सदा
kva caiṣa vyavahāro vā kva ca sā paramārthatā
kva sukhaṃ kva ca vā duḥkhaṃ nirvimarśasya me sadā
- 11
क्व माया क्व च संसारः क्व प्रीतिर्विरतिः क्व वा
क्व जीवः क्व च तद्ब्रह्म सर्वदा विमलस्य मे
kva māyā kva ca saṃsāraḥ kva prītirviratiḥ kva vā
kva jīvaḥ kva ca tadbrahma sarvadā vimalasya me
- 12
क्व प्रवृत्तिर्निर्वृत्तिर्वा क्व मुक्तिः क्व च बन्धनम्
कूटस्थनिर्विभागस्य स्वस्थस्य मम सर्वदा
kva pravṛttirnirvṛttirvā kva muktiḥ kva ca bandhanam
kūṭasthanirvibhāgasya svasthasya mama sarvadā
- 13
क्वोपदेशः क्व वा शास्त्रं क्व शिष्यः क्व च वा गुरुः
क्व चास्ति पुरुषार्थो वा निरुपाधेः शिवस्य मे
kvopadeśaḥ kva vā śāstraṃ kva śiṣyaḥ kva ca vā guruḥ
kva cāsti puruṣārtho vā nirupādheḥ śivasya me
- 14
क्व चास्ति क्व च वा नास्ति क्वास्ति चैकं क्व च द्वयम्
बहुनात्र किम् उक्तेन किंचिन्नोत्तिष्ठते मम
kva cāsti kva ca vā nāsti kvāsti caikaṃ kva ca dvayam
bahunātra kim uktena kiṃcinnottiṣṭhate mama

