7 shlokas
- 1
जनक उवाच
अकिंचनभवं स्वास्थ्यं कौपीनत्वे ऽपि दुर्लभम्
त्यागादाने विहायास्माद् अहम् आसे यथासुखम्
janaka uvāca
akiṃcanabhavaṃ svāsthyaṃ kaupīnatve 'pi durlabham
tyāgādāne vihāyāsmād aham āse yathāsukham
- 2
कुत्रापि खेदः कायस्य जिह्वा कुत्रापि खिद्यते
मनः कुत्रापि तत्त्यक्त्वा पुरुषार्थे स्थितः सुखम्
kutrāpi khedaḥ kāyasya jihvā kutrāpi khidyate
manaḥ kutrāpi tattyaktvā puruṣārthe sthitaḥ sukham
- 3
कृतं किम् अपि नैव स्याद् इति संचिन्त्य तत्त्वतः
यदा यत्कर्तुम् आयाति तत्कृत्वासे यथासुखम्
kṛtaṃ kim api naiva syād iti saṃcintya tattvataḥ
yadā yatkartum āyāti tatkṛtvāse yathāsukham
- 4
कर्मनैष्कर्म्यनिर्बन्धभावा देहस्थयोगिनः
संयोगायोगविरहाद् अहम् आसे यथासुखम्
karmanaiṣkarmyanirbandhabhāvā dehasthayoginaḥ
saṃyogāyogavirahād aham āse yathāsukham
- 5
अर्थानर्थौ न मे स्थित्या गत्या न शयनेन वा
तिष्ठन्गच्छन्स्वपन्तस्माद् अहम् आसे यथासुखम्
arthānarthau na me sthityā gatyā na śayanena vā
tiṣṭhangacchansvapantasmād aham āse yathāsukham
- 6
स्वपतो नास्ति मे हानिः सिद्धिर्यत्नवतो न वा
नाशोल्लासौ विहायास्माद् अहम् आसे यथासुखम्
svapato nāsti me hāniḥ siddhiryatnavato na vā
nāśollāsau vihāyāsmād aham āse yathāsukham
- 7
सुखादिरूपा नियमं भावेष्व् आलोक्य भूरिशः
शुभाशुभे विहायास्माद् अहम् आसे यथासुखम्
sukhādirūpā niyamaṃ bhāveṣv ālokya bhūriśaḥ
śubhāśubhe vihāyāsmād aham āse yathāsukham

