8 shlokas
- 1
अष्टावक्र उवाच
भावाभावविकारश्च स्वभावाद् इति निश्चयी
निर्विकारो गतक्लेशः सुखेनैवोपशाम्यति
aṣṭāvakra uvāca
bhāvābhāvavikāraśca svabhāvād iti niścayī
nirvikāro gatakleśaḥ sukhenaivopaśāmyati
- 2
ईश्वरः सर्वनिर्माता नेहान्य इति निश्चयी
अन्तर्गलितसर्वाशः शान्तः क्वापि न सज्जते
īśvaraḥ sarvanirmātā nehānya iti niścayī
antargalitasarvāśaḥ śāntaḥ kvāpi na sajjate
- 3
आपदः सम्पदः काले दैवाद् एवेति निश्चयी
तृप्तः स्वस्थेन्द्रियो नित्यं न वाञ्छति न शोचति
āpadaḥ sampadaḥ kāle daivād eveti niścayī
tṛptaḥ svasthendriyo nityaṃ na vāñchati na śocati
- 4
सुखदुःखे जन्ममृत्यू दैवाद् एवेति निश्चयी
साध्यादर्शी निरायासः कुर्वन्न् अपि न लिप्यते
sukhaduḥkhe janmamṛtyū daivād eveti niścayī
sādhyādarśī nirāyāsaḥ kurvann api na lipyate
- 5
चिन्तया जायते दुःखं नान्यथेहेति निश्चयी
तया हीनः सुखी शान्तः सर्वत्र गलितस्पृहः
cintayā jāyate duḥkhaṃ nānyatheheti niścayī
tayā hīnaḥ sukhī śāntaḥ sarvatra galitaspṛhaḥ
- 6
नाहं देहो न मे देहो बोधो ऽहम् इति निश्चयी
कैवल्यम् इव सम्प्राप्तो न स्मरत्य् अकृतं कृतम्
nāhaṃ deho na me deho bodho 'ham iti niścayī
kaivalyam iva samprāpto na smaraty akṛtaṃ kṛtam
- 7
आ ब्रह्मस्तम्बपर्यन्तम् अहम् एवेति निश्चयी
निर्विकल्पः शुचिः शान्तः प्राप्ताप्राप्तविनिर्वृतः
ā brahmastambaparyantam aham eveti niścayī
nirvikalpaḥ śuciḥ śāntaḥ prāptāprāptavinirvṛtaḥ
- 8
नानाश्चर्यम् इदं विश्वं न किंचिद् इति निश्चयी
निर्वासनः स्फूर्तिमात्रो न किंचिद् इव शाम्यति
nānāścaryam idaṃ viśvaṃ na kiṃcid iti niścayī
nirvāsanaḥ sphūrtimātro na kiṃcid iva śāmyati

