8 shlokas
- 1
जनक उवाच
कायकृत्यासहः पूर्वं ततो वाग्विस्तरासहः
अथ चिन्तासहस्तस्माद् एवम् एवाहम् आस्थितः
janaka uvāca
kāyakṛtyāsahaḥ pūrvaṃ tato vāgvistarāsahaḥ
atha cintāsahastasmād evam evāham āsthitaḥ
- 2
प्रीत्यभावेन शब्दादेर् अदृश्यत्वेन चात्मनः
विक्षेपैकाग्रहृदय एवम् एवाहं आस्थितः
prītyabhāvena śabdāder adṛśyatvena cātmanaḥ
vikṣepaikāgrahṛdaya evam evāhaṃ āsthitaḥ
- 3
समाध्यासादिविक्षिप्तौ व्यवहारः समाधये
एवं विलोक्य नियमम् एवम् एवाहम् आस्थितः
samādhyāsādivikṣiptau vyavahāraḥ samādhaye
evaṃ vilokya niyamam evam evāham āsthitaḥ
- 4
हेयोपादेयविरहाद् एवं हर्षविषादयोः
अभावाद् अद्य हे ब्रह्मन्न् एवम् एवाहम् आस्थितः
heyopādeyavirahād evaṃ harṣaviṣādayoḥ
abhāvād adya he brahmann evam evāham āsthitaḥ
- 5
आश्रमानाश्रमं ध्यानं चित्तस्वीकृतवर्जनम्
विकल्पं मम वीक्ष्यैतैर् एवम् एवाहम् आस्थितः
āśramānāśramaṃ dhyānaṃ cittasvīkṛtavarjanam
vikalpaṃ mama vīkṣyaitair evam evāham āsthitaḥ
- 6
कर्मानुष्ठानम् अज्ञानाद्यथैवोपरमस्तथा
बुद्ध्वा सम्यग् इदं तत्त्वम् एवम् एवाहम् आस्थितः
karmānuṣṭhānam ajñānādyathaivoparamastathā
buddhvā samyag idaṃ tattvam evam evāham āsthitaḥ
- 7
अचिन्त्यं चिन्त्यमानो ऽपि चिन्तारूपं भजत्य् असौ
त्यक्त्वा तद्भावनं तस्माद् एवम् एवाहम् आस्थितः
acintyaṃ cintyamāno 'pi cintārūpaṃ bhajaty asau
tyaktvā tadbhāvanaṃ tasmād evam evāham āsthitaḥ
- 8
एवम् एव कृतं येन स कृतार्थो भवेद् असौ
एवम् एव स्वभावो यः स कृतार्थो भवेद् असौ
evam eva kṛtaṃ yena sa kṛtārtho bhaved asau
evam eva svabhāvo yaḥ sa kṛtārtho bhaved asau

