8 shlokas
- 1
अष्टावक्र उवाच
विहाय वैरिणं कामम् अर्थं चानर्थसङ्कुलम्
धर्मम् अप्य् एतयोर्हेतुं सर्वत्रानादरं कुरु
aṣṭāvakra uvāca
vihāya vairiṇaṃ kāmam arthaṃ cānarthasaṅkulam
dharmam apy etayorhetuṃ sarvatrānādaraṃ kuru
- 2
स्वप्नेन्द्रजालवत्पश्य दिनानि त्रीणि पञ्च वा
मित्रक्षेत्रधनागारदारदायादिसम्पदः
svapnendrajālavatpaśya dināni trīṇi pañca vā
mitrakṣetradhanāgāradāradāyādisampadaḥ
- 3
यत्र यत्र भवेत्तृष्णा संसारं विद्धि तत्र वै
प्रौढवैराग्यम् आश्रित्य वीततृष्णः सुखी भव
yatra yatra bhavettṛṣṇā saṃsāraṃ viddhi tatra vai
prauḍhavairāgyam āśritya vītatṛṣṇaḥ sukhī bhava
- 4
तृष्णामात्रात्मको बन्धस्तन्नाशो मोक्ष उच्यते
भावसंसक्तिमात्रेण प्राप्तितुष्टिर्मुहुर्मुहुः
tṛṣṇāmātrātmako bandhastannāśo mokṣa ucyate
bhāvasaṃsaktimātreṇa prāptituṣṭirmuhurmuhuḥ
- 5
त्वम् एकश्चेतनः शुद्धो जडं विश्वम् असत्तथा
अविद्यापि न किंचित्सा का बुभुत्सा तथापि ते
tvam ekaścetanaḥ śuddho jaḍaṃ viśvam asattathā
avidyāpi na kiṃcitsā kā bubhutsā tathāpi te
- 6
राज्यं सुताः कलत्राणि शरीराणि सुखानि च
संसक्तस्यापि नष्टानि तव जन्मनि जन्मनि
rājyaṃ sutāḥ kalatrāṇi śarīrāṇi sukhāni ca
saṃsaktasyāpi naṣṭāni tava janmani janmani
- 7
अलम् अर्थेन कामेन सुकृतेनापि कर्मणा
एभ्यः संसारकान्तारे न विश्रान्तम् अभून्मनः
alam arthena kāmena sukṛtenāpi karmaṇā
ebhyaḥ saṃsārakāntāre na viśrāntam abhūnmanaḥ
- 8
कृतं न कति जन्मानि कायेन मनसा गिरा
दुःखम् आयासदं कर्म तद् अद्याप्य् उपरम्यताम्
kṛtaṃ na kati janmāni kāyena manasā girā
duḥkham āyāsadaṃ karma tad adyāpy uparamyatām

