62 shlokas
- 1
मैत्रेय उवाच
प्रोक्तान्येतानि भवता सप्त मन्वन्तराणि वै
भविष्याण्यपि विप्रर्षे ममाख्यातुं त्वमर्हसि
maitreya uvāca
proktānyetāni bhavatā sapta manvantarāṇi vai
bhaviṣyāṇyapi viprarṣe mamākhyātuṃ tvamarhasi
- 2
पराशर उवाच
सूर्यस्य पत्नी संज्ञाभूत्तनया विश्वकर्मणः
मनुर्यमो यमी चैव तदपत्यानि वै मुने
parāśara uvāca
sūryasya patnī saṃjñābhūttanayā viśvakarmaṇaḥ
manuryamo yamī caiva tadapatyāni vai mune
- 3
असहन्ती तु सा भर्तुस्तेजश्छायां युयोज वै
भर्तुः शुश्रूषणे ऽरण्यं स्वयं च तपसे ययौ
asahantī tu sā bhartustejaśchāyāṃ yuyoja vai
bhartuḥ śuśrūṣaṇe 'raṇyaṃ svayaṃ ca tapase yayau
- 4
संज्ञेयम् इत्यथार्कश्च छायायामात्मजत्रयम्
शनैश्चरं मनुं चान्यं तपतीं चाप्यजीजनत्
saṃjñeyam ityathārkaśca chāyāyāmātmajatrayam
śanaiścaraṃ manuṃ cānyaṃ tapatīṃ cāpyajījanat
- 5
छायासंज्ञा ददौ शापं यमाय कुपिता यदा
तदान्येयमसौ बुद्धिरित्यासीद्यमसूर्ययोः
chāyāsaṃjñā dadau śāpaṃ yamāya kupitā yadā
tadānyeyamasau buddhirityāsīdyamasūryayoḥ
- 6
ततो विवस्वानाख्याते तयैवारण्यसंस्थिताम्
समाधिदृष्ट्या ददृशे तामश्वां तपसि स्थिताम्
tato vivasvānākhyāte tayaivāraṇyasaṃsthitām
samādhidṛṣṭyā dadṛśe tāmaśvāṃ tapasi sthitām
- 7
वाजिरूपधरः सो ऽपि तस्यां देवावथाश्विनौ
जनयामास रेवन्तं रेतसो ऽन्ते च भास्करः
vājirūpadharaḥ so 'pi tasyāṃ devāvathāśvinau
janayāmāsa revantaṃ retaso 'nte ca bhāskaraḥ
- 8
आनिन्ये च पुनः संज्ञां स्वस्थानं भगवान्रविः
तेजसः शमनं चास्य विश्वकर्मा चकार ह
āninye ca punaḥ saṃjñāṃ svasthānaṃ bhagavānraviḥ
tejasaḥ śamanaṃ cāsya viśvakarmā cakāra ha
- 9
भ्रममारोप्य सूर्यं तु तस्य तेजोविशातनम्
कृतवानष्टमं भागं न व्यशातयताव्ययम्
bhramamāropya sūryaṃ tu tasya tejoviśātanam
kṛtavānaṣṭamaṃ bhāgaṃ na vyaśātayatāvyayam
- 10
यत्सूर्याद्वैष्णवं तेजः शातितं विश्वकर्मणा
जाज्वल्यमानमपतत्तद्भूमौ मुनिसत्तम
yatsūryādvaiṣṇavaṃ tejaḥ śātitaṃ viśvakarmaṇā
jājvalyamānamapatattadbhūmau munisattama
- 11
त्वष्टैव तेजसा तेन विष्णोश्चक्रमकल्पयत्
त्रिशूलं चैव शर्वस्य शिबिकां धनदस्य च
tvaṣṭaiva tejasā tena viṣṇoścakramakalpayat
triśūlaṃ caiva śarvasya śibikāṃ dhanadasya ca
- 12
शक्तिं गुहस्य देवानाम् अन्येषां च यदायुधम्
तत्सर्वं तेजसा तेन विश्वकर्मा व्यवर्धयत्
śaktiṃ guhasya devānām anyeṣāṃ ca yadāyudham
tatsarvaṃ tejasā tena viśvakarmā vyavardhayat
- 13
छायासंज्ञासुतो यो ऽसौ द्वितीयः कथितो मनुः
पूर्वजस्य सवर्णो ऽसौ सावर्णिस्तेन कथ्यते
chāyāsaṃjñāsuto yo 'sau dvitīyaḥ kathito manuḥ
pūrvajasya savarṇo 'sau sāvarṇistena kathyate
- 14
तस्य मन्वन्तरं ह्येतत्सावर्णिकम् अथाष्टमम्
तच्छृणुष्व महाभाग भविष्यं कथयामि ते
tasya manvantaraṃ hyetatsāvarṇikam athāṣṭamam
tacchṛṇuṣva mahābhāga bhaviṣyaṃ kathayāmi te
- 15
सावर्णिस्तु मनुर्यो ऽसौ मैत्रेय भविता ततः
सुतपाश्चामिताभाश्च मुख्याश्चापि तदा सुराः
sāvarṇistu manuryo 'sau maitreya bhavitā tataḥ
sutapāścāmitābhāśca mukhyāścāpi tadā surāḥ
- 16
तेषां गणस्तु देवानाम् एकैको विंशकः स्मृतः
सप्तर्षीनपि वक्ष्यामि भविष्यान्मुनिसत्तम
teṣāṃ gaṇastu devānām ekaiko viṃśakaḥ smṛtaḥ
saptarṣīnapi vakṣyāmi bhaviṣyānmunisattama
- 17
दीप्तिमान्गालवो रामः कृपो द्रौणिस्तथापरः
मत्पुत्रश्च तथा व्यास ऋश्यशृङ्गश्च सप्तमः
dīptimāngālavo rāmaḥ kṛpo drauṇistathāparaḥ
matputraśca tathā vyāsa ṛśyaśṛṅgaśca saptamaḥ
- 18
विष्णुप्रसादादनघः पातालान्तरगोचरः
विरोचनसुतस्तेषां बलिरिन्द्रो भविष्यति
viṣṇuprasādādanaghaḥ pātālāntaragocaraḥ
virocanasutasteṣāṃ balirindro bhaviṣyati
- 19
विरजाश्चार्वरीवंश्च निर्मोहाद्यास्तथापरे
सावर्णेस्तु मनोः पुत्रा भविष्यन्ति नरेश्वराः
virajāścārvarīvaṃśca nirmohādyāstathāpare
sāvarṇestu manoḥ putrā bhaviṣyanti nareśvarāḥ
- 20
नवमो दक्षसावर्णिर्मैत्रेय भविता मनुः
navamo dakṣasāvarṇirmaitreya bhavitā manuḥ
- 21
पारा मरीचिगर्भाश्च सुधर्माणस्तथा त्रिधा
भविष्यन्ति तदा देवा एकैको द्वादशो गणः
pārā marīcigarbhāśca sudharmāṇastathā tridhā
bhaviṣyanti tadā devā ekaiko dvādaśo gaṇaḥ
- 22
तेषामिन्द्रो महावीर्यो भविष्यत्यद्भुतो द्विज
teṣāmindro mahāvīryo bhaviṣyatyadbhuto dvija
- 23
सवनो द्युतिमान्भव्यो वसुर्मेधातिथिस्तथा
ज्योतिष्मान्सप्तमः सत्यस्तत्रैते च महर्षयः
savano dyutimānbhavyo vasurmedhātithistathā
jyotiṣmānsaptamaḥ satyastatraite ca maharṣayaḥ
- 24
धृतकेतुर्दीप्तिकेतुः पञ्चहस्तो निरामयः
पृथुश्रवाद्याश्च तथा दक्षसावर्णिकात्मजाः
dhṛtaketurdīptiketuḥ pañcahasto nirāmayaḥ
pṛthuśravādyāśca tathā dakṣasāvarṇikātmajāḥ
- 25
दशमो ब्रह्मसावर्णिर्भविष्यति मुने मनुः
सुधामानो विरुद्धाश्च शतसंख्यास्तथा सुराः
daśamo brahmasāvarṇirbhaviṣyati mune manuḥ
sudhāmāno viruddhāśca śatasaṃkhyāstathā surāḥ
- 26
तेषामिन्द्रश्च भविता शान्तिर्नाम महाबलः
सप्तर्षयो भविष्यन्ति ये तदा ताञ्छृणुष्व च
teṣāmindraśca bhavitā śāntirnāma mahābalaḥ
saptarṣayo bhaviṣyanti ye tadā tāñchṛṇuṣva ca
- 27
हविष्मान्सुकृतिः सत्यो ह्यपां मूर्तिस्तथापरः
नाभागो ऽप्रतिमौजाश्च सत्यकेतुस्तथैव च
haviṣmānsukṛtiḥ satyo hyapāṃ mūrtistathāparaḥ
nābhāgo 'pratimaujāśca satyaketustathaiva ca
- 28
सुक्षेत्रश्चोत्तमौजाश्च भूरिषेणादयो दश
ब्रह्मसावर्णिपुत्रास्तु रक्षिष्यन्ति वसुंधराम्
sukṣetraścottamaujāśca bhūriṣeṇādayo daśa
brahmasāvarṇiputrāstu rakṣiṣyanti vasuṃdharām
- 29
एकादशश्च भविता धर्मसावर्णिको मनुः
ekādaśaśca bhavitā dharmasāvarṇiko manuḥ
- 30
विहंगमाः कामगमा निर्माणरुचयस्तथा
गणास्त्वेते तदा मुख्या देवानां च भविष्यताम्
एकैकस्त्रिंशकस्तेषां गणश्चेन्द्रश्च वै वृषः
vihaṃgamāḥ kāmagamā nirmāṇarucayastathā
gaṇāstvete tadā mukhyā devānāṃ ca bhaviṣyatām
ekaikastriṃśakasteṣāṃ gaṇaścendraśca vai vṛṣaḥ

