20 shlokas
- 1
और्व उवाच
हविष्यमत्स्यमांसैस्तु शशस्य शकुनस्य च
सौकरच्छागलैणेयरौरवैर्गवयेन च
aurva uvāca
haviṣyamatsyamāṃsaistu śaśasya śakunasya ca
saukaracchāgalaiṇeyarauravairgavayena ca
- 2
औरभ्रगव्यैश्च तथा मासवृद्ध्या पितामहाः
प्रयान्ति तृप्तिं मांसैस्तु नित्यं वार्ध्रीणसामिषैः
aurabhragavyaiśca tathā māsavṛddhyā pitāmahāḥ
prayānti tṛptiṃ māṃsaistu nityaṃ vārdhrīṇasāmiṣaiḥ
- 3
खड्गमांसमतीवात्र कालशाकं तथा मधु
शस्तानि कर्मण्यत्यन्ततृप्तिदानि नरेश्वर
khaḍgamāṃsamatīvātra kālaśākaṃ tathā madhu
śastāni karmaṇyatyantatṛptidāni nareśvara
- 4
गयामुपेत्य यः श्राद्धं करोति पृथिवीपते
सफलं तस्य तज्जन्म जायते पितृतुष्टिदम्
gayāmupetya yaḥ śrāddhaṃ karoti pṛthivīpate
saphalaṃ tasya tajjanma jāyate pitṛtuṣṭidam
- 5
प्रसातिकाः सनीवाराः श्यामाका द्विविधास्तथा
वन्यौषधीप्रधानास्तु श्राद्धार्हाः पुरुषर्षभ
prasātikāḥ sanīvārāḥ śyāmākā dvividhāstathā
vanyauṣadhīpradhānāstu śrāddhārhāḥ puruṣarṣabha
- 6
यवाः प्रियंगवो मुद्गा गोधूमा व्रीहयस्तिलाः
निष्पावाः कोविदाराश्च सर्षपाश्चात्र शोभनाः
yavāḥ priyaṃgavo mudgā godhūmā vrīhayastilāḥ
niṣpāvāḥ kovidārāśca sarṣapāścātra śobhanāḥ
- 7
अकृताग्रयणं यच्च धान्यजातं नरेश्वर
राजमाषान् अणूंश्चैव मसूरांश्च विवर्जयेत्
akṛtāgrayaṇaṃ yacca dhānyajātaṃ nareśvara
rājamāṣān aṇūṃścaiva masūrāṃśca vivarjayet
- 8
अलाबुं गृञ्जनं चैव पलाण्डुं पिण्डमूलकम्
गन्धारकं करम्भाणि लवणान्यौषराणि च
alābuṃ gṛñjanaṃ caiva palāṇḍuṃ piṇḍamūlakam
gandhārakaṃ karambhāṇi lavaṇānyauṣarāṇi ca
- 9
आरक्ताश्चैव निर्यासाः प्रत्यक्षलवणानि च
वर्ज्यान्येतानि वै श्राद्धे यच्च वाचा न शस्यते
āraktāścaiva niryāsāḥ pratyakṣalavaṇāni ca
varjyānyetāni vai śrāddhe yacca vācā na śasyate
- 10
नक्ताहृतमनुत्सृष्टं तृप्यते न च यत्र गौः
दुर्गन्धि फेनिलं चाम्बु श्राद्धयोग्यं न पार्थिव
naktāhṛtamanutsṛṣṭaṃ tṛpyate na ca yatra gauḥ
durgandhi phenilaṃ cāmbu śrāddhayogyaṃ na pārthiva
- 11
क्षीरमेकशफानां यदौष्ट्रमाविकमेव च
मार्गं च माहिषं चैव वर्जयेच्छ्राद्धकर्मणि
kṣīramekaśaphānāṃ yadauṣṭramāvikameva ca
mārgaṃ ca māhiṣaṃ caiva varjayecchrāddhakarmaṇi
- 12
षण्डापविद्धचण्डालपाषण्ड्युन्मत्तरोगिभिः
कृकवाकुश्च नग्नैश्च वानरग्रामसूकरैः
ṣaṇḍāpaviddhacaṇḍālapāṣaṇḍyunmattarogibhiḥ
kṛkavākuśca nagnaiśca vānaragrāmasūkaraiḥ
- 13
उदक्यासूतिकाशौचिमृतहारैश्च वीक्षिते
श्राद्धे सुरा न पितरो भुञ्जते पुरुषर्षभ
udakyāsūtikāśaucimṛtahāraiśca vīkṣite
śrāddhe surā na pitaro bhuñjate puruṣarṣabha
- 14
तस्मात्परिश्रिते कुर्याच्छ्राद्धं श्रद्धासमन्वितः
उर्व्यां च तिलविक्षेपाद्यातुधानान्निवारयेत्
tasmātpariśrite kuryācchrāddhaṃ śraddhāsamanvitaḥ
urvyāṃ ca tilavikṣepādyātudhānānnivārayet
- 15
न पूति नैवोपपन्नं केशकीटादिभिर्नृप
न चैवाभिषवैर्मिश्रमन्नं पर्युषितं तथा
na pūti naivopapannaṃ keśakīṭādibhirnṛpa
na caivābhiṣavairmiśramannaṃ paryuṣitaṃ tathā
- 16
श्रद्धासमन्वितैर्दत्तं पितृभ्यो नामगोत्रतः
यदाहारास्तु ते जातास्तदाहारत्वमेति तत्
śraddhāsamanvitairdattaṃ pitṛbhyo nāmagotrataḥ
yadāhārāstu te jātāstadāhāratvameti tat
- 17
श्रूयन्ते चापि पितृभिर्गीता गाथा महीपते
इक्ष्वाकोर्मनुपुत्रस्य कलापोपवने पुरा
śrūyante cāpi pitṛbhirgītā gāthā mahīpate
ikṣvākormanuputrasya kalāpopavane purā
- 18
अपि नस्ते भविष्यन्ति कुले सन्मार्गशीलिनः
गयामुपेत्य ये पिण्डान्दास्यन्त्यस्माकमादरात्
api naste bhaviṣyanti kule sanmārgaśīlinaḥ
gayāmupetya ye piṇḍāndāsyantyasmākamādarāt
- 19
अपि नः स कुले जायाद्यो नो दद्यात्त्रयोदशीम्
पायसं मधुसर्पिभ्यां वर्षासु च मघासु च
api naḥ sa kule jāyādyo no dadyāttrayodaśīm
pāyasaṃ madhusarpibhyāṃ varṣāsu ca maghāsu ca
- 20
गौरीं वाप्युद्वहेत्कन्यां नीलं वा वृषमुत्सृजेत्
यजेत वाश्वमेधेन विधिवद्दक्षिणावता
gaurīṃ vāpyudvahetkanyāṃ nīlaṃ vā vṛṣamutsṛjet
yajeta vāśvamedhena vidhivaddakṣiṇāvatā

