16 shlokas
- 1
ऊर्जे त्वेति मनसः प्रतिप्रियम् अन्नम् अश्नाति सर्पिर्मिश्रं दध्युपसेकम्
ūrje tveti manasaḥ pratipriyam annam aśnāti sarpirmiśraṃ dadhyupasekam
- 2
अत ऊर्ध्वं कनीयः कनीयो व्रतयति
ata ūrdhvaṃ kanīyaḥ kanīyo vratayati
- 3
आशितस्य केशान्वपतीत्य् एके
āśitasya keśānvapatīty eke
- 4
गव्यं नवनीतम् उदपात्रे सदर्भे निदधाति
gavyaṃ navanītam udapātre sadarbhe nidadhāti
- 5
अथैनन्महीनां पयो ऽसीति पाणिभ्यां प्रम्लाय वर्चोधा असि वर्चो मयि धेहीति मुखम् आरभ्यानुलोमम् आ पादाभ्यां त्रिः पराचीनम् अङ्गानि सर्वाण्य् अभ्यङ्क्ते
athainanmahīnāṃ payo 'sīti pāṇibhyāṃ pramlāya varcodhā asi varco mayi dhehīti mukham ārabhyānulomam ā pādābhyāṃ triḥ parācīnam aṅgāni sarvāṇy abhyaṅkte
- 6
पृष्ठम् अन्यो ऽस्याभ्यनक्ति
pṛṣṭham anyo 'syābhyanakti
- 7
वृत्रस्य कनीनिकासीति त्रैककुदेनाञ्जनपिष्टेनान्येन वाञ्जीत सतूलया शरेषीकया दर्भपुञ्जीलेन वानिधावमानस्त्रिः पूर्वदक्षिणम् अक्षि द्विः सव्यम्
vṛtrasya kanīnikāsīti traikakudenāñjanapiṣṭenānyena vāñjīta satūlayā śareṣīkayā darbhapuñjīlena vānidhāvamānastriḥ pūrvadakṣiṇam akṣi dviḥ savyam
- 8
अपि वा द्वे पञ्चकृत्वः
api vā dve pañcakṛtvaḥ
- 9
बहिः शालाया उत्तरेण प्राग्वंशम् एकविंशतिदर्भकूर्चैस्त्रिधा विभक्तैश्चित्पतिस्त्वा पुनात्व् इत्य् एतैः प्रतिमन्त्रं द्विर् उपरिणाभ्य् उन्मृज्य प्रदक्षिणं सकृद् अवाङ्मार्ष्टि
bahiḥ śālāyā uttareṇa prāgvaṃśam ekaviṃśatidarbhakūrcaistridhā vibhaktaiścitpatistvā punātv ity etaiḥ pratimantraṃ dvir upariṇābhy unmṛjya pradakṣiṇaṃ sakṛd avāṅmārṣṭi
- 10
अच्छिद्रेण पवित्रेणेति सर्वत्रानुषजति
acchidreṇa pavitreṇeti sarvatrānuṣajati
- 11
राजसूय एकशतेन कूर्चैः
rājasūya ekaśatena kūrcaiḥ
- 12
चित्पतिर्मा पुनातु पवमानः सुवर्जन इत्य् एतम् अनुवाकम् उन्मृज्यमानो यजमानो जपति यद्देवा देवहेडनम् इति तस्य ते पवित्रपते पवित्रेणेति च
citpatirmā punātu pavamānaḥ suvarjana ity etam anuvākam unmṛjyamāno yajamāno japati yaddevā devaheḍanam iti tasya te pavitrapate pavitreṇeti ca
- 13
अथैतानि कर्माणि प्रतिप्रस्थातापरस्मिन्परिश्रिते तूष्णीं पत्न्याः करोति
athaitāni karmāṇi pratiprasthātāparasminpariśrite tūṣṇīṃ patnyāḥ karoti
- 14
उन्दनादिवपनान्तं न करोतीत्य् एके
undanādivapanāntaṃ na karotīty eke
- 15
आ वो देवास ईमह इति यजमानः पूर्वेण द्वारेण शालां प्रविश्य विद्युद् असीत्य् अप उपस्पृश्येन्द्राग्नी द्यावापृथिवी इत्य् अपरेणाहवनीयम् अतिक्रम्य दक्षिणतस्तिष्ठंस्त्वं दीक्षाणाम् अधिपतिर् असीत्य् आहवनीयम् उपतिष्ठते
ā vo devāsa īmaha iti yajamānaḥ pūrveṇa dvāreṇa śālāṃ praviśya vidyud asīty apa upaspṛśyendrāgnī dyāvāpṛthivī ity apareṇāhavanīyam atikramya dakṣiṇatastiṣṭhaṃstvaṃ dīkṣāṇām adhipatir asīty āhavanīyam upatiṣṭhate
- 16
तस्यैष संचरो यावत्सुत्यम्
tasyaiṣa saṃcaro yāvatsutyam

