21 shlokas
- 1
द्वादशशतदक्षिणस्य क्रतोर्दशभिर्वा
dvādaśaśatadakṣiṇasya kratordaśabhirvā
- 2
तदा सप्त गावो हिरण्यं वासो ऽजा च दश भवन्ति
tadā sapta gāvo hiraṇyaṃ vāso 'jā ca daśa bhavanti
- 3
भूयसा वा
bhūyasā vā
- 4
एकयैकविंशतिदक्षिणस्य तिसृभिः षष्टिदक्षिणस्य
ekayaikaviṃśatidakṣiṇasya tisṛbhiḥ ṣaṣṭidakṣiṇasya
- 5
उक्तसंख्यां सम्पाद्य सं यत्ते गोर् अस्मे चन्द्राणीति सोमविक्रयिणो हिरण्यं प्रत्यादाय यजमानाय प्रयच्छत्य् अस्मे ते बन्धुर् इति शुक्लाम् ऊर्णास्तुकां च
uktasaṃkhyāṃ sampādya saṃ yatte gor asme candrāṇīti somavikrayiṇo hiraṇyaṃ pratyādāya yajamānāya prayacchaty asme te bandhur iti śuklām ūrṇāstukāṃ ca
- 6
तया यजमानो दशापवित्रस्य नाभिं करोति
tayā yajamāno daśāpavitrasya nābhiṃ karoti
- 7
इदम् अहं सर्पाणां दन्दशूकानां ग्रीवा उपग्रथ्नामीति कृष्णाम् ऊर्णस्तुकाम् उपग्रथ्नाति
idam ahaṃ sarpāṇāṃ dandaśūkānāṃ grīvā upagrathnāmīti kṛṣṇām ūrṇastukām upagrathnāti
- 8
सोमविक्रयिणि तम इति तया जलेन सोमविक्रयिणं ललाटे विध्यति
somavikrayiṇi tama iti tayā jalena somavikrayiṇaṃ lalāṭe vidhyati
- 9
स्वान भ्राजाङ्घार इत्य् आन्ताद् अनुवाकस्य सोमक्रयणान् अनुदिशति
svāna bhrājāṅghāra ity āntād anuvākasya somakrayaṇān anudiśati
- 10
मित्रो न एहि सुमित्रधा इति राजानं सोमविक्रयिणो ऽपादत्त इन्द्रस्योरुम् आविशेति यजमानस्य दक्षिण ऊराव् आसादयत्य् ऐनं यजमानः प्रत्यपोर्णुते वयः सुपर्णा इति
mitro na ehi sumitradhā iti rājānaṃ somavikrayiṇo 'pādatta indrasyorum āviśeti yajamānasya dakṣiṇa ūrāv āsādayaty ainaṃ yajamānaḥ pratyaporṇute vayaḥ suparṇā iti
- 11
अभ्युक्षितम् उष्णीषं परिकर्मिणे प्रयच्छति
abhyukṣitam uṣṇīṣaṃ parikarmiṇe prayacchati
- 12
मित्रावरुणयोस्त्वा प्रशास्त्रोः प्रशिषा प्रयच्छाम्य् अवक्रो ऽविधुरो भूयासम् इति मैत्रावरुणाय दीक्षितदण्डं प्रयच्छति
mitrāvaruṇayostvā praśāstroḥ praśiṣā prayacchāmy avakro 'vidhuro bhūyāsam iti maitrāvaruṇāya dīkṣitadaṇḍaṃ prayacchati
- 13
रुद्रस्त्वावर्तयत्व् इति सोमक्रयणीं प्रदक्षिणम् आवर्त्यान्यया गवा निष्क्रीय गोष्ठे यजमानस्योत्सृजति
rudrastvāvartayatv iti somakrayaṇīṃ pradakṣiṇam āvartyānyayā gavā niṣkrīya goṣṭhe yajamānasyotsṛjati
- 14
अथ यजमानो राजानं हस्ताभ्याम् उपादाय शीर्ष्णि कृत्वोद् आयुषेत्य् उत्तिष्ठति
atha yajamāno rājānaṃ hastābhyām upādāya śīrṣṇi kṛtvod āyuṣety uttiṣṭhati
- 15
प्रागीषं सोमवाहनम् अनो दक्षिणत उपस्थितं भवति
prāgīṣaṃ somavāhanam ano dakṣiṇata upasthitaṃ bhavati
- 16
उर्व् अन्तरिक्षम् अन्विहीत्य् अभिप्रव्रजति
urv antarikṣam anvihīty abhipravrajati
- 17
तस्य नीडे ऽध्वर्युर् अदित्याः सदो ऽसीति प्राचीनग्रीवं कृष्णाजिनम् उत्तरलोमोपस्तृणात्य् अदित्याः सद आसीदेति कृष्णाजिने राजानम् आसादयति
tasya nīḍe 'dhvaryur adityāḥ sado 'sīti prācīnagrīvaṃ kṛṣṇājinam uttaralomopastṛṇāty adityāḥ sada āsīdeti kṛṣṇājine rājānam āsādayati
- 18
अस्तभ्नाद्द्याम् ऋषभ इत्य् एनम् उपतिष्ठते
astabhnāddyām ṛṣabha ity enam upatiṣṭhate
- 19
वनेषु व्य् अन्तरिक्षं ततानेति वाससा परितनोति
vaneṣu vy antarikṣaṃ tatāneti vāsasā paritanoti
- 20
सौर्यर्चा पुरस्तात्कृष्णाजिनं प्रत्यानह्यत्य् उद् उ त्यं जातवेदसम् इत्य् ऊर्ध्वग्रीवं बहिर्विशसनम्
sauryarcā purastātkṛṣṇājinaṃ pratyānahyaty ud u tyaṃ jātavedasam ity ūrdhvagrīvaṃ bahirviśasanam
- 21
धूर् असीति धुराव् अभिमृश्य वारुणम् असीति शकटम् आखिद्य वरुणस्त्वोत्तभ्नात्व् इत्य् उपस्तभ्य वरुणस्य स्कम्भनम् असीति शम्यां प्रतिमुच्योस्राव् एतं धूर्षाहाव् इत्य् उन्नीयमानौ सोमवाहनाव् अन्वीक्षते
dhūr asīti dhurāv abhimṛśya vāruṇam asīti śakaṭam ākhidya varuṇastvottabhnātv ity upastabhya varuṇasya skambhanam asīti śamyāṃ pratimucyosrāv etaṃ dhūrṣāhāv ity unnīyamānau somavāhanāv anvīkṣate

