21 shlokas
- 1
तस्यां कृष्णाजिनम् अदित्याः सदो ऽसीति तथास्तृणाति
tasyāṃ kṛṣṇājinam adityāḥ sado 'sīti tathāstṛṇāti
- 2
अदित्याः सद आसीदेति कृष्णाजिने राजानम् आसादयति
adityāḥ sada āsīdeti kṛṣṇājine rājānam āsādayati
- 3
वरुणो ऽसि धृतव्रतो वारुणम् असीति राजानम् उपतिष्ठते
varuṇo 'si dhṛtavrato vāruṇam asīti rājānam upatiṣṭhate
- 4
वारुणम् असीति वाससा पर्यानह्यति
vāruṇam asīti vāsasā paryānahyati
- 5
तत्त्वा यामि ब्रह्मणा वन्दमान इति वारुण्यर्चा सर्वत्र राजानं परिचरति
tattvā yāmi brahmaṇā vandamāna iti vāruṇyarcā sarvatra rājānaṃ paricarati
- 6
अग्निं राजानं चान्तरेण मा संचारिष्टेति संप्रेष्यति
agniṃ rājānaṃ cāntareṇa mā saṃcāriṣṭeti saṃpreṣyati
- 7
अत्राप्यस्मै पायसम् अन्नम् अर्घ्यं लाजान् अपूपांश्चोपहरन्ति
atrāpyasmai pāyasam annam arghyaṃ lājān apūpāṃścopaharanti
- 8
अथावहननादि कर्म प्रतिपद्यते
athāvahananādi karma pratipadyate
- 9
श्रपणकाले सह पुरोडाशेन मदन्तीर् अधिश्रयति
śrapaṇakāle saha puroḍāśena madantīr adhiśrayati
- 10
चतुर्गृहीतान्य् आज्यानि गृह्णाति
caturgṛhītāny ājyāni gṛhṇāti
- 11
चतुर्होत्रातिथ्यम् आसादयति
caturhotrātithyam āsādayati
- 12
अत्र संभारयजूंषि व्याचष्टे
atra saṃbhārayajūṃṣi vyācaṣṭe
- 13
पशुवन्निर्मन्थ्येन चरति
paśuvannirmanthyena carati
- 14
वेदं निधाय सामिधेनीभ्यः संप्रेष्यति
vedaṃ nidhāya sāmidhenībhyaḥ saṃpreṣyati
- 15
पञ्च प्रयाजान्यजति
pañca prayājānyajati
- 16
सर्वम् औपभृतं चतुर्थे जुह्वां समानयति
sarvam aupabhṛtaṃ caturthe juhvāṃ samānayati
- 17
उपांशु चरति
upāṃśu carati
- 18
विष्णवे ऽनुब्रूहीति विष्णुं यजेतीडान्तातिथ्या
viṣṇave 'nubrūhīti viṣṇuṃ yajetīḍāntātithyā
- 19
ध्रौवाज्यम् आप्याय्यान्तर्वेदि चमसं निधाय तस्मिंस्तानूनप्त्रम् आपतये त्वा गृह्णामीति पञ्चभिः प्रतिमन्त्रं पञ्चावत्तम् अभिगृह्णाति
dhrauvājyam āpyāyyāntarvedi camasaṃ nidhāya tasmiṃstānūnaptram āpataye tvā gṛhṇāmīti pañcabhiḥ pratimantraṃ pañcāvattam abhigṛhṇāti
- 20
तद्दक्षिणश्रोण्यां निधायानाधृष्टम् असीति सर्व ऋत्विजो यजमानश्च समवमृशन्ति
taddakṣiṇaśroṇyāṃ nidhāyānādhṛṣṭam asīti sarva ṛtvijo yajamānaśca samavamṛśanti
- 21
अनु मे दीक्षाम् इति यजमानं वाचयति
anu me dīkṣām iti yajamānaṃ vācayati

