21 shlokas
- 1
अपरेणाहवनीयं व्रतम् अभ्याहृत्य व्रतप्रदाने निःषिच्य व्रत्य व्रतय व्रतम् उपेहीति दीक्षिताय प्रयच्छति
apareṇāhavanīyaṃ vratam abhyāhṛtya vratapradāne niḥṣicya vratya vrataya vratam upehīti dīkṣitāya prayacchati
- 2
दैवीं धियं मनामह इत्य् अप आचम्य ये देवा मनोजाता मनोयुज इति स्वायतने पूर्वतो व्रतयति
daivīṃ dhiyaṃ manāmaha ity apa ācamya ye devā manojātā manoyuja iti svāyatane pūrvato vratayati
- 3
नादीक्षिता दीक्षितं व्रतयन्तं पश्यन्ति
nādīkṣitā dīkṣitaṃ vratayantaṃ paśyanti
- 4
शिवाः पीता भवथेति व्रतयित्वाप आचामति
śivāḥ pītā bhavatheti vratayitvāpa ācāmati
- 5
एवं पुरा नक्षत्राणाम् अस्तमयाद्वाचं यमयति व्रतं दोहयत्य् अस्तमितेषु नक्षत्रेषु वाचं विसृजते
evaṃ purā nakṣatrāṇām astamayādvācaṃ yamayati vrataṃ dohayaty astamiteṣu nakṣatreṣu vācaṃ visṛjate
- 6
मध्याह्ने व्रतयति
madhyāhne vratayati
- 7
अपि वा पुरोदयाद् आदित्यस्य वाचं यमयति व्रतं दोहयत्य् उदित आदित्ये वाचं विसृजते
api vā purodayād ādityasya vācaṃ yamayati vrataṃ dohayaty udita āditye vācaṃ visṛjate
- 8
अपराह्णे वा व्रतयति
aparāhṇe vā vratayati
- 9
याग्निहोत्रस्य स्कन्नस्य प्रायश्चित्तिः सा व्रतस्य
yāgnihotrasya skannasya prāyaścittiḥ sā vratasya
- 10
यवागू राजन्यस्य व्रतम् आमिक्षा वैश्यस्य पयो ब्राह्मणस्य
yavāgū rājanyasya vratam āmikṣā vaiśyasya payo brāhmaṇasya
- 11
दीक्षास्व् एतानि सर्वेषाम् उपसत्सु स्तनविभागः
dīkṣāsv etāni sarveṣām upasatsu stanavibhāgaḥ
- 12
यदि पयो न स्याद्राजन्यव्रतेन व्रतयेत्
yadi payo na syādrājanyavratena vratayet
- 13
यदि मन्येतोपदस्यामीत्य् ओदनं धानाः सक्तून्घृतम् इत्य् अनुव्रतयेद् इत्य् आह
yadi manyetopadasyāmīty odanaṃ dhānāḥ saktūnghṛtam ity anuvratayed ity āha
- 14
नाव्रतो भवत्य् अग्निहोत्रस्याविच्छित्त्यै
nāvrato bhavaty agnihotrasyāvicchittyai
- 15
पत्न्याश्च वाग्यतायाः प्रतिप्रस्थाता दक्षिणेन द्वारेण निर्गत्य व्रतं दोहयित्वा व्रतश्रपणागारे श्रपयित्वा सुरक्षितं निदधाति
patnyāśca vāgyatāyāḥ pratiprasthātā dakṣiṇena dvāreṇa nirgatya vrataṃ dohayitvā vrataśrapaṇāgāre śrapayitvā surakṣitaṃ nidadhāti
- 16
अथ पत्न्यै स्वायतने प्रयच्छति
atha patnyai svāyatane prayacchati
- 17
साप्य् अत्रैव व्रतं तूष्णीं व्रतयति
sāpy atraiva vrataṃ tūṣṇīṃ vratayati
- 18
यद् अहर्दीक्षयति तस्य रात्रिं जागर्ति
yad ahardīkṣayati tasya rātriṃ jāgarti
- 19
दीक्षितस्य यूपं छिनत्ति क्रीते वा राजनि
dīkṣitasya yūpaṃ chinatti krīte vā rājani
- 20
तद्व्याख्यातम्
tadvyākhyātam
- 21
समानो यूप आहवनीयः स्वरुर् अग्नीषोमीयसवनीययोर् अनूबन्ध्यायाश्च
samāno yūpa āhavanīyaḥ svarur agnīṣomīyasavanīyayor anūbandhyāyāśca

