16 shlokas
- 1
पूर्वार्धे पथ्यां स्वस्तिम् अग्निं दक्षिणार्धे ऽपरार्धे सोमम् उत्तरार्धे सवितारं मध्ये ऽदितिं यजेत्
pūrvārdhe pathyāṃ svastim agniṃ dakṣiṇārdhe 'parārdhe somam uttarārdhe savitāraṃ madhye 'ditiṃ yajet
- 2
अदितिम् इष्ट्वा मरुतो यद्ध वो दिव इति मारुतीम् ऋचम् अन्वाह
aditim iṣṭvā maruto yaddha vo diva iti mārutīm ṛcam anvāha
- 3
शम्य्वन्तः प्रायणीयः संतिष्ठते
śamyvantaḥ prāyaṇīyaḥ saṃtiṣṭhate
- 4
स्थालीं सक्षामकाषाम् एतन्मेक्षणम् एतद्बर्हिर् एतं वेदम् उदयनीयाय सुरक्षितं निदधाति
sthālīṃ sakṣāmakāṣām etanmekṣaṇam etadbarhir etaṃ vedam udayanīyāya surakṣitaṃ nidadhāti
- 5
ध्रौवम् आज्यं धारयति
dhrauvam ājyaṃ dhārayati
- 6
तस्माज्जुह्वाम् अष्टौ चतुरो वा गृहीत्वा दर्भनाड्या हिरण्यं निष्टर्क्यं प्रग्रथ्य जुह्वाम् अवदधातीयं ते शुक्र तनूर् इति
tasmājjuhvām aṣṭau caturo vā gṛhītvā darbhanāḍyā hiraṇyaṃ niṣṭarkyaṃ pragrathya juhvām avadadhātīyaṃ te śukra tanūr iti
- 7
तद् आज्यं जूर् असि धृता मनसेत्य् आहवनीये ऽन्वारब्धे यजमाने निरूढपशुबन्धलक्षणां पिङ्गाक्षीम् एकहायनीं सोमक्रयणीम् ईक्षमाणो जुहोति
tad ājyaṃ jūr asi dhṛtā manasety āhavanīye 'nvārabdhe yajamāne nirūḍhapaśubandhalakṣaṇāṃ piṅgākṣīm ekahāyanīṃ somakrayaṇīm īkṣamāṇo juhoti
- 8
अपरं चतुर्गृहीतं गृहीत्वा शुक्रम् असीति हिरण्यं घृताद् उद्धृत्य सुरक्षितं निदधाति चतुर्गृहीतं च
aparaṃ caturgṛhītaṃ gṛhītvā śukram asīti hiraṇyaṃ ghṛtād uddhṛtya surakṣitaṃ nidadhāti caturgṛhītaṃ ca
- 9
वैश्वदेवं हविर् इत्य् आज्यम् अभिमन्त्र्य सूर्यस्य चक्षुर् अरुहम् इति सहिरण्येन पाणिनादित्यम् उपतिष्ठते
vaiśvadevaṃ havir ity ājyam abhimantrya sūryasya cakṣur aruham iti sahiraṇyena pāṇinādityam upatiṣṭhate
- 10
अग्रेण शालां प्रत्यङ्मुखीम् अवस्थाप्य सोमक्रयणीं चिद् असि मनासीति संशास्ति
agreṇa śālāṃ pratyaṅmukhīm avasthāpya somakrayaṇīṃ cid asi manāsīti saṃśāsti
- 11
मित्रस्त्वा पदि बध्नात्व् इति दक्षिणे पूर्वपादे बद्ध्वा पूषाध्वन इति यत्र सोमस्तत्र गमयति
mitrastvā padi badhnātv iti dakṣiṇe pūrvapāde baddhvā pūṣādhvana iti yatra somastatra gamayati
- 12
दक्षिणेन पदा वस्व्य् असि रुद्रासीत्याद्यैर्दक्षिणानि षट्पदान्य् अनुनिक्रामति
dakṣiṇena padā vasvy asi rudrāsītyādyairdakṣiṇāni ṣaṭpadāny anunikrāmati
- 13
एकम् इषे विष्णुस्त्वान्वेत्व् इत्य् एतैर्निक्रम्यमाणेषु यजमानो ऽनुवर्तयति
ekam iṣe viṣṇustvānvetv ity etairnikramyamāṇeṣu yajamāno 'nuvartayati
- 14
सखाय इति सप्तमं पदम् अभिमन्त्रयते
sakhāya iti saptamaṃ padam abhimantrayate
- 15
अध्वर्युर्बृहस्पतिस्त्वा सुम्ने रण्वत्व् इति सप्तमं पदम् अभिगृह्णाति
adhvaryurbṛhaspatistvā sumne raṇvatv iti saptamaṃ padam abhigṛhṇāti
- 16
तद्धिरण्यं तस्मिन्निधाय परिस्तीर्य पृथिव्यास्त्वा मूर्धन्न् आजिघर्मीति तच्चतुर्गृहीतम् अभिजुहोति
taddhiraṇyaṃ tasminnidhāya paristīrya pṛthivyāstvā mūrdhann ājigharmīti taccaturgṛhītam abhijuhoti

