13 shlokas
- 1
देवश्रूर् एतानि प्रवप इति प्रोप्य केशान्सानडुहशकृद्य् उदपात्रे प्रक्षिपति
devaśrūr etāni pravapa iti propya keśānsānaḍuhaśakṛdy udapātre prakṣipati
- 2
एवम् उत्तरं गोदानम् उप्त्वा यजमान ओषधे त्रायस्वैनम् इति दर्भे ऽन्तर्धीयमाने जपति स्वधिते मा मा हिंसीर् इति क्षुरे निधीयमाने स्वस्त्य् उत्तराण्य् अशीयेति केशेषूप्यमानेषु
evam uttaraṃ godānam uptvā yajamāna oṣadhe trāyasvainam iti darbhe 'ntardhīyamāne japati svadhite mā mā hiṃsīr iti kṣure nidhīyamāne svasty uttarāṇy aśīyeti keśeṣūpyamāneṣu
- 3
नापिताय क्षुरं प्रयच्छति
nāpitāya kṣuraṃ prayacchati
- 4
श्मश्रूण्य् अग्रे वपते ऽथोपपक्षाव् अथ केशान्
śmaśrūṇy agre vapate 'thopapakṣāv atha keśān
- 5
अभ्यन्तरं नखानि निकृन्तते प्रथमं दक्षिणहस्तस्याङ्गुष्ठप्रभृति तथा सव्यस्य तथा पद्यानि
abhyantaraṃ nakhāni nikṛntate prathamaṃ dakṣiṇahastasyāṅguṣṭhaprabhṛti tathā savyasya tathā padyāni
- 6
इदम् अहम् अमुष्यामुष्यायणस्येति सकेशम् उदपात्रम् उदुम्बरमूले गूहयेद्दर्भमूले वा
idam aham amuṣyāmuṣyāyaṇasyeti sakeśam udapātram udumbaramūle gūhayeddarbhamūle vā
- 7
अन्नाद्याय व्यूहध्वम् इत्य् औदुम्बरेण काष्ठेन दतो धावते
annādyāya vyūhadhvam ity audumbareṇa kāṣṭhena dato dhāvate
- 8
तीर्थे लोमशे ऽवकाविले स्थावरासु हिरण्यम् अवधाय स्नाति
tīrthe lomaśe 'vakāvile sthāvarāsu hiraṇyam avadhāya snāti
- 9
यदि दूरे तीर्थम् उदपात्रे हिरण्यं निधाय स्नाति
yadi dūre tīrtham udapātre hiraṇyaṃ nidhāya snāti
- 10
महाव्याहृत्या जलम् अभिमन्त्र्येदम् आपः शिवा इति विगाहते
mahāvyāhṛtyā jalam abhimantryedam āpaḥ śivā iti vigāhate
- 11
हिरण्यवर्णाः शुचयः पावका इति चतस्र आपो अस्मान्मातरः शुन्धन्त्व् इति च जपित्वा स्नाति
hiraṇyavarṇāḥ śucayaḥ pāvakā iti catasra āpo asmānmātaraḥ śundhantv iti ca japitvā snāti
- 12
उद् आभ्यः शुचिर् आ पूत एमीत्य् उत्तीर्य पयस्वतीर् ओषधय इत्य् अपो ऽश्नाति
ud ābhyaḥ śucir ā pūta emīty uttīrya payasvatīr oṣadhaya ity apo 'śnāti
- 13
सोमस्य तनूर् असीति क्षौमम् अहतं वासः प्रदक्षिणं परिधाय सूर्यस्य वासो ऽसीति नीवीम् अनुकल्पयते
somasya tanūr asīti kṣaumam ahataṃ vāsaḥ pradakṣiṇaṃ paridhāya sūryasya vāso 'sīti nīvīm anukalpayate

