19 shlokas
- 1
श्रीदेव्युवाच
बीजानां कल्पनं प्रोक्तं विशेषेण च साधनम्
जार्यन्ते तानि यैः सूते तान्विडान्वक्तुमर्हसि
śrīdevyuvāca
bījānāṃ kalpanaṃ proktaṃ viśeṣeṇa ca sādhanam
jāryante tāni yaiḥ sūte tānviḍānvaktumarhasi
- 2
श्रीभैरव उवाच
कासीसं सैन्धवं काङ्क्षी सौवीरं व्योषगन्धकम्
सौवर्चलं सर्जिका च मालतीनीरसम्भवम्
शिग्रुमूलरसैः सिक्तो विडो ऽयं सर्वजारणः
śrībhairava uvāca
kāsīsaṃ saindhavaṃ kāṅkṣī sauvīraṃ vyoṣagandhakam
sauvarcalaṃ sarjikā ca mālatīnīrasambhavam
śigrumūlarasaiḥ sikto viḍo 'yaṃ sarvajāraṇaḥ
- 3
निर्दग्धं शङ्खचूर्णं तु रविक्षीरशतप्लुतम्
पुटितं बहुशो देवि प्रशस्तो जारणाविडः
nirdagdhaṃ śaṅkhacūrṇaṃ tu ravikṣīraśataplutam
puṭitaṃ bahuśo devi praśasto jāraṇāviḍaḥ
- 4
शतशो वा प्लुतं चूर्णं गन्धकस्य गवां जलैः
śataśo vā plutaṃ cūrṇaṃ gandhakasya gavāṃ jalaiḥ
- 5
निर्दग्धं शङ्खचूर्णं तु शिग्रुमूलाम्बुभावितम्
शतशो विषसिन्धूत्थसंयुतं वडवामुखम्
nirdagdhaṃ śaṅkhacūrṇaṃ tu śigrumūlāmbubhāvitam
śataśo viṣasindhūtthasaṃyutaṃ vaḍavāmukham
- 6
टङ्कणं शतशो देवि भावयेत्किंशुकद्रवैः
विडो वह्निमुखाख्योऽयं लोहानां जारणे प्रिये
ṭaṅkaṇaṃ śataśo devi bhāvayetkiṃśukadravaiḥ
viḍo vahnimukhākhyo'yaṃ lohānāṃ jāraṇe priye
- 7
चूलिका गन्धपाषाणः कान्तस्य च मुखं प्रिये
एकैकमेव पर्याप्तं लौहचूर्णस्य जारणे
cūlikā gandhapāṣāṇaḥ kāntasya ca mukhaṃ priye
ekaikameva paryāptaṃ lauhacūrṇasya jāraṇe
- 8
गन्धतालकसिन्धूत्थं चूलीटङ्कणभूखगम्
क्षारैर्मूत्रैश्च विपचेदयं ज्वालामुखो विडः
gandhatālakasindhūtthaṃ cūlīṭaṅkaṇabhūkhagam
kṣārairmūtraiśca vipacedayaṃ jvālāmukho viḍaḥ
- 9
एकविंशतिपर्यायं देवदालीदलद्रवैः
भावितो निचुलक्षारः सर्वसत्त्वानि जारयेत्
ekaviṃśatiparyāyaṃ devadālīdaladravaiḥ
bhāvito niculakṣāraḥ sarvasattvāni jārayet
- 10
वास्तुकैरण्डकदलीदेवदालीपुनर्नवम्
वासा पलाशनिचुलं तिलकाञ्चनमाक्षिकम्
vāstukairaṇḍakadalīdevadālīpunarnavam
vāsā palāśaniculaṃ tilakāñcanamākṣikam
- 11
सर्वाङ्गं खण्डशश्छिन्नं नातिशुष्कं शिलातले
दग्धकाण्डैस्तिलानां तु पञ्चाङ्गं मूलकस्य च
sarvāṅgaṃ khaṇḍaśaśchinnaṃ nātiśuṣkaṃ śilātale
dagdhakāṇḍaistilānāṃ tu pañcāṅgaṃ mūlakasya ca
- 12
प्लावयेन्मूत्रवर्गेण जलं तस्मात्परिस्रुतम्
लोहपात्रे पचेद्यन्त्रे हंसपाके ऽग्निमानवित्
plāvayenmūtravargeṇa jalaṃ tasmātparisrutam
lohapātre pacedyantre haṃsapāke 'gnimānavit
- 13
बाष्पाणां बुद्बुदानां च बहूनामुद्गमो यदा
तदा कासीससौराष्ट्रीक्षारत्रयकटुत्रयम्
bāṣpāṇāṃ budbudānāṃ ca bahūnāmudgamo yadā
tadā kāsīsasaurāṣṭrīkṣāratrayakaṭutrayam
- 14
गन्धकं च सितं हिङ्गुलवणानि च षट्तथा
एषां चूर्णं क्षिपेदेष लोहसम्पुटमध्यगः
सप्ताहं भूगतः पश्चाद्धान्यस्थः प्रवरो विडः
gandhakaṃ ca sitaṃ hiṅgulavaṇāni ca ṣaṭtathā
eṣāṃ cūrṇaṃ kṣipedeṣa lohasampuṭamadhyagaḥ
saptāhaṃ bhūgataḥ paścāddhānyasthaḥ pravaro viḍaḥ
- 15
जम्बीराम्लेन पचनं शिग्रुमूलद्रवेण च
चूलिकागन्धकासिक्तौ द्वौ विडौ शतशः क्रमात्
jambīrāmlena pacanaṃ śigrumūladraveṇa ca
cūlikāgandhakāsiktau dvau viḍau śataśaḥ kramāt
- 16
कोषातकीदलरसैः क्षारैर्वा निचुलोद्भवैः
देवदालीशिवाबीजं गुञ्जासैन्धवटङ्कणम्
भावयेदम्लवर्गेण विडोऽयं हेमजारणः
koṣātakīdalarasaiḥ kṣārairvā niculodbhavaiḥ
devadālīśivābījaṃ guñjāsaindhavaṭaṅkaṇam
bhāvayedamlavargeṇa viḍo'yaṃ hemajāraṇaḥ
- 17
मूलकार्द्रकचित्राणां क्षारैर्गोमूत्रगालितैः
गन्धकः शतशो भाव्यो विडोऽयं हेमजारणे
mūlakārdrakacitrāṇāṃ kṣārairgomūtragālitaiḥ
gandhakaḥ śataśo bhāvyo viḍo'yaṃ hemajāraṇe
- 18
हरितालशिलाक्षारो लवणं शङ्खशुक्तिका
हंसपाकविपक्वोऽयं विडः स्याद्धेमजारणे
haritālaśilākṣāro lavaṇaṃ śaṅkhaśuktikā
haṃsapākavipakvo'yaṃ viḍaḥ syāddhemajāraṇe
- 19
एवं संगृह्य सम्भारान्रसकर्म समाचरेत्
तन्ममाचक्ष्व देवेशि किमन्यच्छ्रोतुमिच्छसि
evaṃ saṃgṛhya sambhārānrasakarma samācaret
tanmamācakṣva deveśi kimanyacchrotumicchasi

