230 shlokas
- 1
श्रीदेव्युवाच
लोहवेधास्त्वया देव यदर्थमुपवर्णिताः
तं देहवेधम् आचक्ष्व येन स्यात्खेचरी गतिः
śrīdevyuvāca
lohavedhāstvayā deva yadarthamupavarṇitāḥ
taṃ dehavedham ācakṣva yena syātkhecarī gatiḥ
- 2
श्रीभैरव उवाच
प्रथमं शोधयेद्देहं पश्चात्कल्कं समाचरेत्
अन्यथा न भवेत्सिद्धिः रसे चैव रसायने
śrībhairava uvāca
prathamaṃ śodhayeddehaṃ paścātkalkaṃ samācaret
anyathā na bhavetsiddhiḥ rase caiva rasāyane
- 3
प्रातः प्रातः पिबेदादौ त्रिदिनं घृतसैन्धवम्
केतक्याः स्तनजं क्वाथं तदनु त्रिदिनं पिबेत्
prātaḥ prātaḥ pibedādau tridinaṃ ghṛtasaindhavam
ketakyāḥ stanajaṃ kvāthaṃ tadanu tridinaṃ pibet
- 4
विधिना स्वेदनं कृत्वा सयवक्षारशर्करम्
त्र्यहं पिबेद्वराक्वाथं सदेवासुरवन्दिते
vidhinā svedanaṃ kṛtvā sayavakṣāraśarkaram
tryahaṃ pibedvarākvāthaṃ sadevāsuravandite
- 5
क्वाथं कटुकरोहिण्याः सम्यक्जाते विरेचने
त्रिदिनं यावकान्नं च भुञ्जीत घृतसंयुतम्
kvāthaṃ kaṭukarohiṇyāḥ samyakjāte virecane
tridinaṃ yāvakānnaṃ ca bhuñjīta ghṛtasaṃyutam
- 6
पलाशबीजजन्तुघ्नगुणमोदकभक्षणात्
कीटस्य पातनं कुर्यादथ काकेष्टवारिणा
palāśabījajantughnaguṇamodakabhakṣaṇāt
kīṭasya pātanaṃ kuryādatha kākeṣṭavāriṇā
- 7
वचामरिचसिन्धूत्थरजनीकणनागरात्
धात्रीगुडविडङ्गाच्च परागं दिवसत्रयम्
vacāmaricasindhūttharajanīkaṇanāgarāt
dhātrīguḍaviḍaṅgācca parāgaṃ divasatrayam
- 8
एवं संशोध्य शाल्यन्नं क्षीरमुद्गाम्बुयावकैः
ततो जातबलो भूत्वा चरेद्रासायनं विधिम्
evaṃ saṃśodhya śālyannaṃ kṣīramudgāmbuyāvakaiḥ
tato jātabalo bhūtvā caredrāsāyanaṃ vidhim
- 9
धात्रीरसघृतक्षौद्रैः क्षीरैः सुरतरूद्भवैः
तैलं निर्मथ्य देवेशि द्विचतुःषट्पलान्वितम्
dhātrīrasaghṛtakṣaudraiḥ kṣīraiḥ suratarūdbhavaiḥ
tailaṃ nirmathya deveśi dvicatuḥṣaṭpalānvitam
- 10
लघुमध्योत्तमैर्मानैः त्रिमासं प्रत्यहं पिबेत्
आरोटं भक्षयेत्पश्चात्जीर्णं च तदनन्तरम्
laghumadhyottamairmānaiḥ trimāsaṃ pratyahaṃ pibet
āroṭaṃ bhakṣayetpaścātjīrṇaṃ ca tadanantaram
- 11
क्षेत्रीकृत्य ततो देहं ततो भक्ष्यं तु वर्धयेत्
kṣetrīkṛtya tato dehaṃ tato bhakṣyaṃ tu vardhayet
- 12
शोधितं व्योमताप्याभ्यां पातितं तदनन्तरम्
तण्डुलीयकभृङ्गाह्वपेषितं वापितं रसम्
आरोटमिति सेवेत प्रथमं देहसिद्धये
śodhitaṃ vyomatāpyābhyāṃ pātitaṃ tadanantaram
taṇḍulīyakabhṛṅgāhvapeṣitaṃ vāpitaṃ rasam
āroṭamiti seveta prathamaṃ dehasiddhaye
- 13
अथवा भस्मतां प्राप्तं षड्वारं कल्कयोगतः
यावत्संवत्सरं पूर्णं तावदारोटकं भजेत्
athavā bhasmatāṃ prāptaṃ ṣaḍvāraṃ kalkayogataḥ
yāvatsaṃvatsaraṃ pūrṇaṃ tāvadāroṭakaṃ bhajet
- 14
शिलाजतुक्षौद्रविडङ्गसर्पिर्लोहाभयापारदताप्यभक्षम्
आपूर्यते दुर्बलदेहधातून्त्रिपञ्चरात्रेण यथा शशाङ्कः
śilājatukṣaudraviḍaṅgasarpirlohābhayāpāradatāpyabhakṣam
āpūryate durbaladehadhātūntripañcarātreṇa yathā śaśāṅkaḥ
- 15
बककन्यारसक्षौद्रद्विनिशात्रिफलागुडैः
कल्कीकृतं रसं व्योमकान्तमध्वाज्यसंयुतम्
भुक्त्वा गच्छेदमरतां क्षेत्रीकरणमुत्तमम्
bakakanyārasakṣaudradviniśātriphalāguḍaiḥ
kalkīkṛtaṃ rasaṃ vyomakāntamadhvājyasaṃyutam
bhuktvā gacchedamaratāṃ kṣetrīkaraṇamuttamam
- 16
चूर्णमभ्रकसत्त्वस्य कान्तलोहस्य वा ततः
तीक्ष्णस्य वा महादेवि त्रिफलाक्वाथभावितम्
cūrṇamabhrakasattvasya kāntalohasya vā tataḥ
tīkṣṇasya vā mahādevi triphalākvāthabhāvitam
- 17
यावदञ्जनसंकाशं वस्त्रछन्नं विशोध्य तत्
भृङ्गामलकसारेण हरिद्राया रसेन च
yāvadañjanasaṃkāśaṃ vastrachannaṃ viśodhya tat
bhṛṅgāmalakasāreṇa haridrāyā rasena ca
- 18
पुटितं रससंयुक्तं मधुघृतसमन्वितम्
लोहसम्पुटमध्यस्थं मासं धान्ये प्रतिष्ठितम्
puṭitaṃ rasasaṃyuktaṃ madhughṛtasamanvitam
lohasampuṭamadhyasthaṃ māsaṃ dhānye pratiṣṭhitam
- 19
घृतेन मधुना लिह्यात्क्षेत्रीकरणमुत्तमम्
एवं वर्षप्रयोगेण सहस्रायुर्भवेन्नरः
ghṛtena madhunā lihyātkṣetrīkaraṇamuttamam
evaṃ varṣaprayogeṇa sahasrāyurbhavennaraḥ
- 20
रससिद्धेः पुरा हेम गुञ्जामात्रं दिने दिने
भक्षयेद्देहसिद्ध्यर्थं रससिद्धिः प्रजायते
rasasiddheḥ purā hema guñjāmātraṃ dine dine
bhakṣayeddehasiddhyarthaṃ rasasiddhiḥ prajāyate
- 21
कान्ताभ्रसत्त्वं सरसमीषत्कनकजारितम्
लिह्यादादौ समध्वाज्यं क्षेत्रीकरणमुत्तमम्
kāntābhrasattvaṃ sarasamīṣatkanakajāritam
lihyādādau samadhvājyaṃ kṣetrīkaraṇamuttamam
- 22
वर्षं वर्षार्धम् अथवा पूर्वमेवं तु भक्षयेत्
varṣaṃ varṣārdham athavā pūrvamevaṃ tu bhakṣayet
- 23
वज्रजीर्णो रसो देवि ह्युत्तमः परिकीर्तितः
मध्यमो हेमजीर्णस्तु तारजीर्णोऽधमः प्रिये
vajrajīrṇo raso devi hyuttamaḥ parikīrtitaḥ
madhyamo hemajīrṇastu tārajīrṇo'dhamaḥ priye
- 24
हेमजीर्णे भस्मसूते रुद्रत्वं भक्षिते व्रजेत्
विष्णुत्वं तारजीर्णे तु ब्रह्मत्वं भास्करेण तु
hemajīrṇe bhasmasūte rudratvaṃ bhakṣite vrajet
viṣṇutvaṃ tārajīrṇe tu brahmatvaṃ bhāskareṇa tu
- 25
तीक्ष्णजीर्णे धनाध्यक्षः सूर्यत्वं चपलालये तु
वाजरे तु शशाङ्कत्वम् अनलत्वं तु रोहणे
सामान्येन तु तीक्ष्णेन शक्रत्वं प्राप्नुयान्नरः
tīkṣṇajīrṇe dhanādhyakṣaḥ sūryatvaṃ capalālaye tu
vājare tu śaśāṅkatvam analatvaṃ tu rohaṇe
sāmānyena tu tīkṣṇena śakratvaṃ prāpnuyānnaraḥ
- 26
एवं यो लोहजीर्णं तु भक्षयेद्भस्मसूतकम्
जलेन जलरूपः स्यात्स्थलेन स्थलतां व्रजेत्
evaṃ yo lohajīrṇaṃ tu bhakṣayedbhasmasūtakam
jalena jalarūpaḥ syātsthalena sthalatāṃ vrajet
- 27
तेजोऽधिके तथा तेजः वायोरप्यधिको बली
हर्ता कर्ता स्वयं साक्षात्शापानुग्रहकारकः
tejo'dhike tathā tejaḥ vāyorapyadhiko balī
hartā kartā svayaṃ sākṣātśāpānugrahakārakaḥ
- 28
यत्र मूत्रपुरीषं तु साधकस्तु परित्यजेत्
पाषाणो मृन्मयं तत्र स्पष्टं भवति काञ्चनम्
yatra mūtrapurīṣaṃ tu sādhakastu parityajet
pāṣāṇo mṛnmayaṃ tatra spaṣṭaṃ bhavati kāñcanam
- 29
प्रस्वेदस्तस्य गात्रस्य लोहान्यष्टौ च वेधयेत्
तत्सर्वं कनकं नित्यं भक्षिते द्वादशे पले
रुद्रतुल्यो महादेवि अजरामरकारिणि
prasvedastasya gātrasya lohānyaṣṭau ca vedhayet
tatsarvaṃ kanakaṃ nityaṃ bhakṣite dvādaśe pale
rudratulyo mahādevi ajarāmarakāriṇi
- 30
भस्मसूतं तथा तारं भक्षयेत्षोडशं पलम्
अथवा तारजीर्णं तु भक्षयेद्भस्मसूतकम्
शुल्वं च वङ्गघोषं च तत्स्वेदात्तारतां व्रजेत्
bhasmasūtaṃ tathā tāraṃ bhakṣayetṣoḍaśaṃ palam
athavā tārajīrṇaṃ tu bhakṣayedbhasmasūtakam
śulvaṃ ca vaṅgaghoṣaṃ ca tatsvedāttāratāṃ vrajet

