207 shlokas
- 1
श्रीदेव्युवाच
महारसैरुपरसैर्लोहैश्च परमेश्वर
आज्ञापय समस्तं तु रसराजस्य बन्धनम्
śrīdevyuvāca
mahārasairuparasairlohaiśca parameśvara
ājñāpaya samastaṃ tu rasarājasya bandhanam
- 2
श्रीभैरव उवाच
वैक्रान्तस्य तु भागैकं चाष्टभागं तु सूतकम्
कनकस्य तु सप्तांशं द्विपदीरसटङ्कणम्
śrībhairava uvāca
vaikrāntasya tu bhāgaikaṃ cāṣṭabhāgaṃ tu sūtakam
kanakasya tu saptāṃśaṃ dvipadīrasaṭaṅkaṇam
- 3
नष्टपिष्टं च शुष्कं च ध्मातं खोटो भवेत्प्रिये
सौवीरं टङ्कणं काचं दत्त्वा दत्त्वा तु शोधयेत्
naṣṭapiṣṭaṃ ca śuṣkaṃ ca dhmātaṃ khoṭo bhavetpriye
sauvīraṃ ṭaṅkaṇaṃ kācaṃ dattvā dattvā tu śodhayet
- 4
समहेम्नि समावर्त्य सूतं मूषागतं ततः
समांशभक्षणं तं तु शुद्धसूतेन कारयेत्
samahemni samāvartya sūtaṃ mūṣāgataṃ tataḥ
samāṃśabhakṣaṇaṃ taṃ tu śuddhasūtena kārayet
- 5
वैक्रान्तं षोडशांशेन पूर्वयोगेन धामयेत्
दशसंकलिकायोगात्वेधो दशगुणोत्तरः
vaikrāntaṃ ṣoḍaśāṃśena pūrvayogena dhāmayet
daśasaṃkalikāyogātvedho daśaguṇottaraḥ
- 6
सप्तसंकलिकायोगो वेधो दशगुणोत्तरः
वैक्रान्तो वज्रवत्ज्ञेयो नात्र कार्या विचारणा
पुनरन्यं प्रवक्ष्यामि प्रयोगं भुवि दुर्लभम्
saptasaṃkalikāyogo vedho daśaguṇottaraḥ
vaikrānto vajravatjñeyo nātra kāryā vicāraṇā
punaranyaṃ pravakṣyāmi prayogaṃ bhuvi durlabham
- 7
वैक्रान्तसत्त्वं देवेशि पारदेन समन्वितम्
जारितं समहेम्ना तु शिलाभाण्डे निधापयेत्
vaikrāntasattvaṃ deveśi pāradena samanvitam
jāritaṃ samahemnā tu śilābhāṇḍe nidhāpayet
- 8
मासमात्रोषितं भूमौ समुद्धृत्य प्रयत्नतः
एष देवि रसो दिव्यो देहद्रव्यकरो भवेत्
māsamātroṣitaṃ bhūmau samuddhṛtya prayatnataḥ
eṣa devi raso divyo dehadravyakaro bhavet
- 9
वैक्रान्तकास्तु ये केचित्त्रिफलाया रसेन च
भूम्यामलकसारेण वसुहट्टरसेन च
vaikrāntakāstu ye kecittriphalāyā rasena ca
bhūmyāmalakasāreṇa vasuhaṭṭarasena ca
- 10
एकैकं देवि सप्ताहं स्वेदिता मर्दितास्तथा
सुध्माता मूकमूषायां खोटो भवति चाक्षयः
ekaikaṃ devi saptāhaṃ sveditā marditāstathā
sudhmātā mūkamūṣāyāṃ khoṭo bhavati cākṣayaḥ
- 11
कान्तं रूप्यं सकनकं पारदं चैव योजयेत्
शुल्वं तृतीयभागं तु स्रोतोञ्जनसमन्वितम्
तत्ध्मातं खोटतां याति देहलोहकरं भवेत्
kāntaṃ rūpyaṃ sakanakaṃ pāradaṃ caiva yojayet
śulvaṃ tṛtīyabhāgaṃ tu srotoñjanasamanvitam
tatdhmātaṃ khoṭatāṃ yāti dehalohakaraṃ bhavet
- 12
श्वेतवैक्रान्तचूर्णं तु हयमूत्रेण मर्दयेत्
आदौ सुस्विन्नम् आदाय पले पलशतं क्षिपेत्
śvetavaikrāntacūrṇaṃ tu hayamūtreṇa mardayet
ādau susvinnam ādāya pale palaśataṃ kṣipet
- 13
तारस्य जायते भस्म विशुद्धस्फटिकाकृति
तद्भस्म मेलयेत्सूते समभागे विचक्षणः
tārasya jāyate bhasma viśuddhasphaṭikākṛti
tadbhasma melayetsūte samabhāge vicakṣaṇaḥ
- 14
चारयेत्रजतं सूते हयमूत्रेण मर्दयेत्
पुटयेदन्धमूषायां क्रमेण मृदुवह्निना
cārayetrajataṃ sūte hayamūtreṇa mardayet
puṭayedandhamūṣāyāṃ krameṇa mṛduvahninā
- 15
क्रामणेन समायुक्तं मूषामध्ये विचक्षणः
अहोरात्रं त्रिरात्रं वा भवेदग्निसहो रसः
krāmaṇena samāyuktaṃ mūṣāmadhye vicakṣaṇaḥ
ahorātraṃ trirātraṃ vā bhavedagnisaho rasaḥ
- 16
स्पर्शनात्सर्वलोहानि रजतं च करिष्यति
भक्षिते वक्ष्यमाणेन जरादारिद्रनाशनम्
sparśanātsarvalohāni rajataṃ ca kariṣyati
bhakṣite vakṣyamāṇena jarādāridranāśanam
- 17
रक्तस्य वक्ष्यते कर्म जरादारिद्रनाशनम्
सप्तधा भावयेत्तस्य व्याघ्रीकन्दाम्भसा रजः
raktasya vakṣyate karma jarādāridranāśanam
saptadhā bhāvayettasya vyāghrīkandāmbhasā rajaḥ
- 18
पलं तस्य पलं हेम्नः पलं शुद्धरसस्य च
शुद्धं भस्म भवेत्सर्वं पुनर्हेमशतं क्षिपेत्
तद्भस्म जायते क्षिप्रं शुद्धहेमसमप्रभम्
palaṃ tasya palaṃ hemnaḥ palaṃ śuddharasasya ca
śuddhaṃ bhasma bhavetsarvaṃ punarhemaśataṃ kṣipet
tadbhasma jāyate kṣipraṃ śuddhahemasamaprabham
- 19
तद्भस्म रसराजे तु पुनर्हेम्ना च मेलयेत्
भवेदग्निसहो देवि ततो रसवरो भवेत्
tadbhasma rasarāje tu punarhemnā ca melayet
bhavedagnisaho devi tato rasavaro bhavet
- 20
स्पर्शवेधी भवेत्सूतः कोटिवेधी महारसः
sparśavedhī bhavetsūtaḥ koṭivedhī mahārasaḥ
- 21
रक्तवैक्रान्तसत्त्वं च हेम्ना तु सह मेलयेत्
समं तं जारयेत्सूतं सारयित्वा समेन तु
सहस्रांशेन लोहानि वेधयेन्नात्र संशयः
raktavaikrāntasattvaṃ ca hemnā tu saha melayet
samaṃ taṃ jārayetsūtaṃ sārayitvā samena tu
sahasrāṃśena lohāni vedhayennātra saṃśayaḥ
- 22
कृष्णवैक्रान्तभागैकं शुद्धसूतपलांशकम्
एकत्र मर्दयेत्खल्ले चूर्णं च भवति द्वयम्
kṛṣṇavaikrāntabhāgaikaṃ śuddhasūtapalāṃśakam
ekatra mardayetkhalle cūrṇaṃ ca bhavati dvayam
- 23
अस्य चूर्णस्य भागैकं हेमभागसहस्रकम्
एकत्र मर्दयेत्तावद्यावद्भस्म तु जायते
asya cūrṇasya bhāgaikaṃ hemabhāgasahasrakam
ekatra mardayettāvadyāvadbhasma tu jāyate
- 24
धमेत्तच्चान्धमूषायां यावत्खोटो भविष्यति
dhamettaccāndhamūṣāyāṃ yāvatkhoṭo bhaviṣyati
- 25
समांशभक्षणं तस्य शुद्धसूतं तु कारयेत्
वेधयेत्सर्वलोहानि स्पर्शमात्रेण पार्वति
samāṃśabhakṣaṇaṃ tasya śuddhasūtaṃ tu kārayet
vedhayetsarvalohāni sparśamātreṇa pārvati
- 26
तच्चूर्णम् अभ्रकं चैव रसेन सह मर्दयेत्
एकत्र मर्दयेत्तावद्यावद्भस्म प्रजायते
taccūrṇam abhrakaṃ caiva rasena saha mardayet
ekatra mardayettāvadyāvadbhasma prajāyate
- 27
धमेत्तद् अन्धमूषायां यावत्खोटो भविष्यति
समांशं भक्षणं तस्य पिष्टिकां कारयेद्बुधः
dhamettad andhamūṣāyāṃ yāvatkhoṭo bhaviṣyati
samāṃśaṃ bhakṣaṇaṃ tasya piṣṭikāṃ kārayedbudhaḥ
- 28
वेधयेत्सर्वलोहानि स्पर्शमात्रेण हेमता
तच्चूर्णम् अभ्रकं चैव रसेन सह मर्दयेत्
vedhayetsarvalohāni sparśamātreṇa hematā
taccūrṇam abhrakaṃ caiva rasena saha mardayet
- 29
स्वेदयेज्जारयेच्चैव ततो वह्निसहो भवेत्
स रसः सारितश्चैव सर्वलोहानि विध्यति
svedayejjārayeccaiva tato vahnisaho bhavet
sa rasaḥ sāritaścaiva sarvalohāni vidhyati
- 30
पीतवर्णेऽपि वैक्रान्ते रक्तकृष्णविधिर्मतः
pītavarṇe'pi vaikrānte raktakṛṣṇavidhirmataḥ

