221 shlokas
- 1
श्रीदेव्युवाच
लक्षणं शोधनं चैव पारदस्य श्रुतं मया
चारणं जारणं चैव श्रोतुमिच्छामि भैरव
śrīdevyuvāca
lakṣaṇaṃ śodhanaṃ caiva pāradasya śrutaṃ mayā
cāraṇaṃ jāraṇaṃ caiva śrotumicchāmi bhairava
- 2
श्रीभैरव उवाच
सर्वपापक्षये जाते प्राप्यते रसजारणा
तत्प्राप्तौ प्राप्तमेव स्याद्विज्ञानं मुक्तिकारणम्
śrībhairava uvāca
sarvapāpakṣaye jāte prāpyate rasajāraṇā
tatprāptau prāptameva syādvijñānaṃ muktikāraṇam
- 3
मोक्षाभिव्यञ्जकं देवि जारणं साधकस्य तु
यावन्न जार्यते सूतः तावत्तु न च निर्वृतिः
mokṣābhivyañjakaṃ devi jāraṇaṃ sādhakasya tu
yāvanna jāryate sūtaḥ tāvattu na ca nirvṛtiḥ
- 4
खल्लस्तु पीठिका देवि रसेन्द्रो लिङ्गमुच्यते
मर्दनं वन्दनं तस्य ग्रासः पूजा विधीयते
khallastu pīṭhikā devi rasendro liṅgamucyate
mardanaṃ vandanaṃ tasya grāsaḥ pūjā vidhīyate
- 5
यावद्दिनानि वह्निस्थो जार्यते धार्यते रसः
तावद्युगसहस्राणि शिवलोके महीयते
yāvaddināni vahnistho jāryate dhāryate rasaḥ
tāvadyugasahasrāṇi śivaloke mahīyate
- 6
दिनमेकं रसेन्द्रस्य यो ददाति हुताशनम्
द्रवन्ति तस्य पापानि कुर्वन्नपि न लिप्यते
dinamekaṃ rasendrasya yo dadāti hutāśanam
dravanti tasya pāpāni kurvannapi na lipyate
- 7
जारणा द्विविधा बालजारणा बद्धजारणा
तत्रादौ परमेशानि वक्ष्यते बालजारणा
jāraṇā dvividhā bālajāraṇā baddhajāraṇā
tatrādau parameśāni vakṣyate bālajāraṇā
- 8
गगनं जारयेदादौ सर्वसत्त्वमतः परम्
ततो माक्षिकशुद्धं च सुवर्णं तदनन्तरम्
gaganaṃ jārayedādau sarvasattvamataḥ param
tato mākṣikaśuddhaṃ ca suvarṇaṃ tadanantaram
- 9
गर्भस्थं द्रावयित्वा तु ततो बाह्यद्रुतिं द्रवेत्
सितं सितेन द्रव्येण रक्तं रक्तेन रञ्जयेत्
garbhasthaṃ drāvayitvā tu tato bāhyadrutiṃ dravet
sitaṃ sitena dravyeṇa raktaṃ raktena rañjayet
- 10
सारणं क्रामणं ज्ञात्वा ततो वेधं प्रयोजयेत्
sāraṇaṃ krāmaṇaṃ jñātvā tato vedhaṃ prayojayet
- 11
ॐ नमोऽमृतलोहाय परामृतरसोद्भवाय हुं स्वाहा
oṃ namo'mṛtalohāya parāmṛtarasodbhavāya huṃ svāhā
- 12
सर्वसत्त्वोपकाराय भगवन्त्वदनुज्ञया
जारणं कर्तुमिच्छामि ग्रासं गृह्ण मम प्रभो
sarvasattvopakārāya bhagavantvadanujñayā
jāraṇaṃ kartumicchāmi grāsaṃ gṛhṇa mama prabho
- 13
कुरुष्वेति शिवेनोक्तं ग्राह्यमेव सुबुद्धिना
kuruṣveti śivenoktaṃ grāhyameva subuddhinā
- 14
शृणु देवि प्रवक्ष्यामि व्योमजारणम् उत्तमम्
पत्त्राभ्रजारणं सत्त्वजारणं चेति तद्द्विधा
śṛṇu devi pravakṣyāmi vyomajāraṇam uttamam
pattrābhrajāraṇaṃ sattvajāraṇaṃ ceti taddvidhā
- 15
निर्मुखं समुखं चैव वासनामुखमेव च
एकैकं त्रिविधं तच्च तद्वक्ष्याम्य् आनुपूर्वशः
nirmukhaṃ samukhaṃ caiva vāsanāmukhameva ca
ekaikaṃ trividhaṃ tacca tadvakṣyāmy ānupūrvaśaḥ
- 16
वैक्रान्तवज्रसंस्पर्शाद्दिव्यौषधिबलेन वा
निर्मुखो भक्षयेद्देवि क्षणेन गगनं रसः
vaikrāntavajrasaṃsparśāddivyauṣadhibalena vā
nirmukho bhakṣayeddevi kṣaṇena gaganaṃ rasaḥ
- 17
हेमकर्मणि हेमैव तारे तारो मुखं भवेत्
hemakarmaṇi hemaiva tāre tāro mukhaṃ bhavet
- 18
तप्तखल्लकृता पिष्टिः श्लक्ष्णम् अल्पाल्पमभ्रकम्
अम्लवेतसजम्बीरबीजपूराम्लभूखगैः
मर्दितं चरते देवि सेयं समुखजारणा
taptakhallakṛtā piṣṭiḥ ślakṣṇam alpālpamabhrakam
amlavetasajambīrabījapūrāmlabhūkhagaiḥ
marditaṃ carate devi seyaṃ samukhajāraṇā
- 19
क्षारत्रयं पञ्चपटु काक्षीकासीसगन्धकम्
माक्षिकं चाम्लसंयुक्तं ताम्रपात्रे तु जारयेत्
kṣāratrayaṃ pañcapaṭu kākṣīkāsīsagandhakam
mākṣikaṃ cāmlasaṃyuktaṃ tāmrapātre tu jārayet
- 20
एतच्चाभिषवाद्दिव्यं कारयित्वा विचक्षणः
जारणार्थं च बीजानां वज्राणां च विशेषतः
etaccābhiṣavāddivyaṃ kārayitvā vicakṣaṇaḥ
jāraṇārthaṃ ca bījānāṃ vajrāṇāṃ ca viśeṣataḥ
- 21
तस्मिन्नावर्तितं नागं वङ्गं वा सुरवन्दिते
निषेचयेच्छतं वारं न रसायनकर्मणि
tasminnāvartitaṃ nāgaṃ vaṅgaṃ vā suravandite
niṣecayecchataṃ vāraṃ na rasāyanakarmaṇi
- 22
अनेन सकलं देवि चारणावस्तु भावयेत्
क्षाराम्ले भावितं व्योम रजसा प्रथमेन च
anena sakalaṃ devi cāraṇāvastu bhāvayet
kṣārāmle bhāvitaṃ vyoma rajasā prathamena ca
- 23
सृष्टित्रयोदककणातुम्बुरुद्रवमर्दितम्
चरेज्जरेद्वा पुटितं यवचिञ्चारसेन च
sṛṣṭitrayodakakaṇātumburudravamarditam
carejjaredvā puṭitaṃ yavaciñcārasena ca
- 24
शतावरी गदा रम्भा मेघनादा पुनर्नवा
शिग्रुको यवचिञ्चा च भावितं तद्रसैः क्रमात्
śatāvarī gadā rambhā meghanādā punarnavā
śigruko yavaciñcā ca bhāvitaṃ tadrasaiḥ kramāt
- 25
मूलं हिलमुचायास्तु कौवेरीमूलमेव च
कदलीमुसलीशिग्रुताम्बूलीवाणपीलुकम्
mūlaṃ hilamucāyāstu kauverīmūlameva ca
kadalīmusalīśigrutāmbūlīvāṇapīlukam
- 26
अलम्बुषा बला कोलमास्फोटः खरमञ्जरी
तुम्बुरुस्तिक्तशाकं वाप्येषाम् एकरसेन तु
राजिकाव्योषयुक्तेन त्रिदिनं स्विन्नमभ्रकम्
alambuṣā balā kolamāsphoṭaḥ kharamañjarī
tumburustiktaśākaṃ vāpyeṣām ekarasena tu
rājikāvyoṣayuktena tridinaṃ svinnamabhrakam
- 27
कासीसतुवरीसिन्धुटङ्कणक्षारसंयुतः
पूर्वाभिषवयोगेन सूतकश्चरति क्षणात्
kāsīsatuvarīsindhuṭaṅkaṇakṣārasaṃyutaḥ
pūrvābhiṣavayogena sūtakaścarati kṣaṇāt
- 28
गोलको भवति क्षिप्रं सर्वसिद्धिप्रदायकः
golako bhavati kṣipraṃ sarvasiddhipradāyakaḥ
- 29
गृहीत्वा देवि धान्याम्लमम्लवर्गेण संयुतम्
क्वाथयित्वाभ्रकं तत्तु स्नुहीक्षीरेण मर्दयेत्
gṛhītvā devi dhānyāmlamamlavargeṇa saṃyutam
kvāthayitvābhrakaṃ tattu snuhīkṣīreṇa mardayet
- 30
आरण्यगोमयेनैव कपोताख्यं पुटं ततः
āraṇyagomayenaiva kapotākhyaṃ puṭaṃ tataḥ

