31 shlokas
- 1
श्रीदेव्युवाच
देव त्वं पारदेन्द्रस्य प्रोक्ता मे बालजारणा
अतः परं समाचक्ष्व सम्यग्बद्धस्य जारणाम्
śrīdevyuvāca
deva tvaṃ pāradendrasya proktā me bālajāraṇā
ataḥ paraṃ samācakṣva samyagbaddhasya jāraṇām
- 2
श्रीभैरव उवाच
या पूर्वं वर्णिता सेयमधमा बालजारणा
उत्तमा दुर्लभा चैव श्रूयतां बद्धजारणा
śrībhairava uvāca
yā pūrvaṃ varṇitā seyamadhamā bālajāraṇā
uttamā durlabhā caiva śrūyatāṃ baddhajāraṇā
- 3
अबद्धं जारयेद्यस्तु जीर्यमाणः क्षयं व्रजेत्
बद्धस्य जीर्यते ग्रासो जीर्णस्य च मुखं भवेत्
abaddhaṃ jārayedyastu jīryamāṇaḥ kṣayaṃ vrajet
baddhasya jīryate grāso jīrṇasya ca mukhaṃ bhavet
- 4
सुमुखो निर्मुखो धत्ते सम्पूर्णोत्तमलक्षणे
सामान्यो ऽग्निसहत्वेन महारत्नानि जारकः
sumukho nirmukho dhatte sampūrṇottamalakṣaṇe
sāmānyo 'gnisahatvena mahāratnāni jārakaḥ
- 5
सामान्यः प्रथमं कार्यः सग्रासस्तु सुसंमतः
वसुदेहकरो देवि सामान्यो हि भवेदयम्
sāmānyaḥ prathamaṃ kāryaḥ sagrāsastu susaṃmataḥ
vasudehakaro devi sāmānyo hi bhavedayam
- 6
ग्रासहीनस्तु यो बद्धो दिव्यसिद्धिकरो भवेत्
grāsahīnastu yo baddho divyasiddhikaro bhavet
- 7
उत्तमो मूलबन्धस्तु मध्यमं रसबन्धनम्
अधमः पाकबन्धः स्यादेवं त्रिविधबन्धनम्
uttamo mūlabandhastu madhyamaṃ rasabandhanam
adhamaḥ pākabandhaḥ syādevaṃ trividhabandhanam
- 8
मूलबन्धस्तु यो बन्धो वासनाबन्ध उच्यते
स्याच्चतुःषष्टिमूलेभ्यः किंचिन्मूलेन बन्धनम्
mūlabandhastu yo bandho vāsanābandha ucyate
syāccatuḥṣaṣṭimūlebhyaḥ kiṃcinmūlena bandhanam
- 9
प्राण्यङ्गमसुरादीनां मूलाङ्गं देवतामतम्
पाषाणं चैव सिद्धानां मानुषाणां च पूजितम्
prāṇyaṅgamasurādīnāṃ mūlāṅgaṃ devatāmatam
pāṣāṇaṃ caiva siddhānāṃ mānuṣāṇāṃ ca pūjitam
- 10
पिण्डिकाद्रुतिसंकोचैस्त्रिविधं बन्धनं भवेत्
दिव्याभिरोषधीभिश्च प्रागुक्तं शुद्धबन्धनम्
piṇḍikādrutisaṃkocaistrividhaṃ bandhanaṃ bhavet
divyābhiroṣadhībhiśca prāguktaṃ śuddhabandhanam
- 11
द्रुतिभिर्बध्यते सूतः क्षणबन्ध उदाहृतः
drutibhirbadhyate sūtaḥ kṣaṇabandha udāhṛtaḥ
- 12
अभ्रकं हरबीजं च षोडशांशेन काञ्चनम्
ध्मातं प्रकाशमूषायां शोधयेत्काचटङ्कणैः
abhrakaṃ harabījaṃ ca ṣoḍaśāṃśena kāñcanam
dhmātaṃ prakāśamūṣāyāṃ śodhayetkācaṭaṅkaṇaiḥ
- 13
दक्षिणावर्तितं ध्मातं हरबीजेन मेलकम्
मूषां त्यक्त्वा वरारोहे तिष्ठते बद्धवद्रसः
dakṣiṇāvartitaṃ dhmātaṃ harabījena melakam
mūṣāṃ tyaktvā varārohe tiṣṭhate baddhavadrasaḥ
- 14
रक्तिकार्धार्धमात्रेण पर्वतानपि वेधयेत्
भक्षणात्तस्य देवेशि रुद्रतुल्यो भवेन्नरः
क्रीडते सप्तलोकेषु शिवतुल्यपराक्रमः
raktikārdhārdhamātreṇa parvatānapi vedhayet
bhakṣaṇāttasya deveśi rudratulyo bhavennaraḥ
krīḍate saptalokeṣu śivatulyaparākramaḥ
- 15
द्रुतीनां मेलनं देवि दिव्यौषधिपरं शृणु
drutīnāṃ melanaṃ devi divyauṣadhiparaṃ śṛṇu
- 16
वज्रकन्दं लाङ्गली च उच्चाटेन समन्वितम्
अभ्रकं क्रमते शीघ्रम् अन्यथा नास्ति संक्रमः
vajrakandaṃ lāṅgalī ca uccāṭena samanvitam
abhrakaṃ kramate śīghram anyathā nāsti saṃkramaḥ
- 17
कृष्णागुरुशङ्खनाभीरसोनसितरामठैः
नारीकुसुमपालाशबीजतैलसमन्वितैः
सोष्णैर्मिलन्ति क्वथिता द्रुतयः सकला रसैः
kṛṣṇāguruśaṅkhanābhīrasonasitarāmaṭhaiḥ
nārīkusumapālāśabījatailasamanvitaiḥ
soṣṇairmilanti kvathitā drutayaḥ sakalā rasaiḥ
- 18
माक्षिकं च विषं गुञ्जा टङ्कणं स्त्रीरजस्तथा
स्त्रीस्तन्येन विलिप्तं च सर्वद्वंद्वानि मेलयेत्
mākṣikaṃ ca viṣaṃ guñjā ṭaṅkaṇaṃ strīrajastathā
strīstanyena viliptaṃ ca sarvadvaṃdvāni melayet
- 19
जीवाहिव्योमपाषाणैः क्रोष्टुजिह्वासुभावितम्
क्रामणं सर्वलोहानां द्रुतीनामपि मेलकम्
jīvāhivyomapāṣāṇaiḥ kroṣṭujihvāsubhāvitam
krāmaṇaṃ sarvalohānāṃ drutīnāmapi melakam
- 20
अश्वस्य लाला लशुनमार्द्रकं निम्बपल्लवम्
टङ्कणं च रसं व्योम वज्रं चापि प्रवेशयेत्
aśvasya lālā laśunamārdrakaṃ nimbapallavam
ṭaṅkaṇaṃ ca rasaṃ vyoma vajraṃ cāpi praveśayet
- 21
अभ्रं हेमद्रुतिं सूतं त्रयमेकत्र मेलयेत्
क्रामणेन तु मूषायां लेपं दत्त्वा विचक्षणः
तुषकर्ष्वग्निना भूमौ स्वेदेन मिलति क्षणात्
abhraṃ hemadrutiṃ sūtaṃ trayamekatra melayet
krāmaṇena tu mūṣāyāṃ lepaṃ dattvā vicakṣaṇaḥ
tuṣakarṣvagninā bhūmau svedena milati kṣaṇāt
- 22
शतवेधी भवेत्सोऽयमारतारे च शुल्वके
तस्य मध्ये तथा देया अभ्रहेमद्रुतिः पुनः
śatavedhī bhavetso'yamāratāre ca śulvake
tasya madhye tathā deyā abhrahemadrutiḥ punaḥ
- 23
तुषकर्ष्वग्निना स्वेद्यं यावत्सूतावशेषितम्
सहस्रवेधी स भवेत्नात्र कार्या विचारणा
tuṣakarṣvagninā svedyaṃ yāvatsūtāvaśeṣitam
sahasravedhī sa bhavetnātra kāryā vicāraṇā
- 24
संकलैः संकलैर्बन्धे वेधं दशगुणोत्तरम्
सप्तसंकलिकाबद्धः कोटिवेधी महारसः
saṃkalaiḥ saṃkalairbandhe vedhaṃ daśaguṇottaram
saptasaṃkalikābaddhaḥ koṭivedhī mahārasaḥ
- 25
शरीरार्थं यदा भक्षेत्गुञ्जामात्रं विचक्षणः
त्रिकटुत्रिफलायुक्तं घृतेन मधुना सह
जीर्णे जीर्णे तु संग्राह्यं यावत्स्यादष्टरक्तिकाः
śarīrārthaṃ yadā bhakṣetguñjāmātraṃ vicakṣaṇaḥ
trikaṭutriphalāyuktaṃ ghṛtena madhunā saha
jīrṇe jīrṇe tu saṃgrāhyaṃ yāvatsyādaṣṭaraktikāḥ
- 26
शतादिकोटिपर्यन्तं संकलैर्यो हतो रसः
जीवेत्तेन प्रमाणेन वज्रवल्ली यथा रसः
śatādikoṭiparyantaṃ saṃkalairyo hato rasaḥ
jīvettena pramāṇena vajravallī yathā rasaḥ
- 27
हेमाभ्रशुल्बद्रुतिभिः पारदस्तु समन्वितः
वेधयेत्पूर्वयोगेन भक्षयेत्सर्वयोगतः
लभते वैष्णवं स्थानं विष्णुतुल्यपराक्रमः
hemābhraśulbadrutibhiḥ pāradastu samanvitaḥ
vedhayetpūrvayogena bhakṣayetsarvayogataḥ
labhate vaiṣṇavaṃ sthānaṃ viṣṇutulyaparākramaḥ
- 28
आराभ्रहेमद्रुतयः पारदेन समन्विताः
वङ्गस्य प्रतिवापेन शतांशे स्तम्भनं ध्रुवम्
ārābhrahemadrutayaḥ pāradena samanvitāḥ
vaṅgasya prativāpena śatāṃśe stambhanaṃ dhruvam
- 29
तीक्ष्णमारं तथा हेम पारदेन समन्वितम्
नागस्य प्रतिवापेन शतांशे स्तम्भनं भवेत्
tīkṣṇamāraṃ tathā hema pāradena samanvitam
nāgasya prativāpena śatāṃśe stambhanaṃ bhavet
- 30
तीक्ष्णं घोषं तथा तारं पारदेन समन्वितम्
वङ्गस्य प्रतिवापेन स्तम्भनं स्याच्छतांशतः
tīkṣṇaṃ ghoṣaṃ tathā tāraṃ pāradena samanvitam
vaṅgasya prativāpena stambhanaṃ syācchatāṃśataḥ

