60 shlokas
- 1
यस्मिन्सर्वं यतः सर्वं यः सर्वं सर्वतश्च यः
यश्च सर्वमयो नित्यं तस्मै सर्वात्मने नमः
yasminsarvaṃ yataḥ sarvaṃ yaḥ sarvaṃ sarvataśca yaḥ
yaśca sarvamayo nityaṃ tasmai sarvātmane namaḥ
- 2
कैलासशिखरे रम्ये नानारत्नविभूषिते
नानाद्रुमलताकीर्णे गुप्तसम्बन्धवर्जिते
kailāsaśikhare ramye nānāratnavibhūṣite
nānādrumalatākīrṇe guptasambandhavarjite
- 3
देवदेवं सुखासीनं नीलकण्ठं त्रिलोचनम्
प्रणम्य शिरसा देवी पार्वती परिपृच्छति
devadevaṃ sukhāsīnaṃ nīlakaṇṭhaṃ trilocanam
praṇamya śirasā devī pārvatī paripṛcchati
- 4
श्रीदेव्युवाच
देवदेव महादेव काल कामाङ्गदाहक
कुलकौलमहाकौलसिद्धकौलादिनाशन
śrīdevyuvāca
devadeva mahādeva kāla kāmāṅgadāhaka
kulakaulamahākaulasiddhakaulādināśana
- 5
त्वत्प्रसादाच्छ्रुतं सर्वम् अशेषमवधारितम्
यदि ते ऽहम् अनुग्राह्या यद्यहं तव वल्लभा
tvatprasādācchrutaṃ sarvam aśeṣamavadhāritam
yadi te 'ham anugrāhyā yadyahaṃ tava vallabhā
- 6
सूचिता सर्वतन्त्रेषु या पुनर्न प्रकाशिता
जीवन्मुक्तिरियं नाथ कीदृशी वक्तुमर्हसि
sūcitā sarvatantreṣu yā punarna prakāśitā
jīvanmuktiriyaṃ nātha kīdṛśī vaktumarhasi
- 7
श्रीभैरव उवाच
साधु साधु महाभागे साधु पर्वतनन्दिनि
साधु पृष्टं त्वया देवि भक्तानां हितकाम्यया
śrībhairava uvāca
sādhu sādhu mahābhāge sādhu parvatanandini
sādhu pṛṣṭaṃ tvayā devi bhaktānāṃ hitakāmyayā
- 8
अजरामरदेहस्य शिवतादात्म्यवेदनम्
जीवन्मुक्तिर्महादेवि देवानामपि दुर्लभा
ajarāmaradehasya śivatādātmyavedanam
jīvanmuktirmahādevi devānāmapi durlabhā
- 9
पिण्डपाते च यो मोक्षः स च मोक्षो निरर्थकः
पिण्डे तु पतिते देवि गर्दभोऽपि विमुच्यते
piṇḍapāte ca yo mokṣaḥ sa ca mokṣo nirarthakaḥ
piṇḍe tu patite devi gardabho'pi vimucyate
- 10
यदि मुक्तिर्भगक्षोभे किं न मुञ्चन्ति गर्दभाः
अजाश्च वृषभाश्चैव किंन मुक्ता गणाम्बिके
yadi muktirbhagakṣobhe kiṃ na muñcanti gardabhāḥ
ajāśca vṛṣabhāścaiva kiṃna muktā gaṇāmbike
- 11
तस्मात्संरक्षयेत्पिण्डं रसैश्चैव रसायनैः
शुक्रमूत्रपुरीषाणां यदि मुक्तिर्निषेवणात्
tasmātsaṃrakṣayetpiṇḍaṃ rasaiścaiva rasāyanaiḥ
śukramūtrapurīṣāṇāṃ yadi muktirniṣevaṇāt
- 12
किंन मुक्ता महादेवि श्वानशूकरजातयः
षड्दर्शनेऽपि मुक्तिस्तु दर्शिता पिण्डपातने
kiṃna muktā mahādevi śvānaśūkarajātayaḥ
ṣaḍdarśane'pi muktistu darśitā piṇḍapātane
- 13
करामलकवत्सापि प्रत्यक्षं नोपलभ्यते
अकथ्यमपि देवेशि सद्भावं कथयामि ते
karāmalakavatsāpi pratyakṣaṃ nopalabhyate
akathyamapi deveśi sadbhāvaṃ kathayāmi te
- 14
शून्यपापो मन्त्रयाजी न पिण्डं धारयेत्क्वचित्
देवानामपि देवेशि दुर्लभं पिण्डधारणम्
śūnyapāpo mantrayājī na piṇḍaṃ dhārayetkvacit
devānāmapi deveśi durlabhaṃ piṇḍadhāraṇam
- 15
किं पुनर्मानुषाणां तु धरणीतलवासिनाम्
धर्मे नष्टे कुतो धर्मः धर्मे नष्टे कुतः क्रिया
kiṃ punarmānuṣāṇāṃ tu dharaṇītalavāsinām
dharme naṣṭe kuto dharmaḥ dharme naṣṭe kutaḥ kriyā
- 16
क्रियानष्टे कुतो योगः योगे नष्टे कुतो गतिः
गतिनष्टे कुतो मोक्षो मोक्षे नष्टे न किंचन
kriyānaṣṭe kuto yogaḥ yoge naṣṭe kuto gatiḥ
gatinaṣṭe kuto mokṣo mokṣe naṣṭe na kiṃcana
- 17
श्रीदेव्युवाच
जीवन्मुक्तिस्वरूपं तु देवदेव श्रुतं मया
तत्प्रत्युपायं मे ब्रूहि यद्यस्ति करुणा मयि
śrīdevyuvāca
jīvanmuktisvarūpaṃ tu devadeva śrutaṃ mayā
tatpratyupāyaṃ me brūhi yadyasti karuṇā mayi
- 18
श्रीभैरव उवाच
कर्मयोगेन देवेशि प्राप्यते पिण्डधारणम्
रसश्च पवनश्चेति कर्मयोगो द्विधा मतः
śrībhairava uvāca
karmayogena deveśi prāpyate piṇḍadhāraṇam
rasaśca pavanaśceti karmayogo dvidhā mataḥ
- 19
मूर्छितो हरति व्याधिं मृतो जीवयति स्वयम्
बद्धः खेचरतां कुर्यात्रसो वायुश्च भैरवि
mūrchito harati vyādhiṃ mṛto jīvayati svayam
baddhaḥ khecaratāṃ kuryātraso vāyuśca bhairavi
- 20
ज्ञानान्मोक्षः सुरेशानि ज्ञानं पवनधारणात्
तत्र देवि स्थिरं पिण्डं यत्र स्थैर्ये रसः प्रभुः
jñānānmokṣaḥ sureśāni jñānaṃ pavanadhāraṇāt
tatra devi sthiraṃ piṇḍaṃ yatra sthairye rasaḥ prabhuḥ
- 21
अचिराज्जायते देवि शरीरम् अजरामरम्
मनसश्च यथा ध्यानं रसयोगादवाप्यते
acirājjāyate devi śarīram ajarāmaram
manasaśca yathā dhyānaṃ rasayogādavāpyate
- 22
सत्यं स लभते देवि ज्ञानं विज्ञानपूर्वकम्
तस्य मन्त्राश्च सिध्यन्ति यो ऽश्नाति मृतसूतकम्
satyaṃ sa labhate devi jñānaṃ vijñānapūrvakam
tasya mantrāśca sidhyanti yo 'śnāti mṛtasūtakam
- 23
यावन्न शक्तिपातस्तु न यावत्पाशकृन्तनम्
तावत्तस्य कुतो बुद्धिः जायते मृतसूतके
yāvanna śaktipātastu na yāvatpāśakṛntanam
tāvattasya kuto buddhiḥ jāyate mṛtasūtake
- 24
मद्यमांसरता नित्यं भगलिङ्गेषु ये रताः
तेषां विनष्टबुद्धीनां रसज्ञानं सुदुर्लभम्
madyamāṃsaratā nityaṃ bhagaliṅgeṣu ye ratāḥ
teṣāṃ vinaṣṭabuddhīnāṃ rasajñānaṃ sudurlabham
- 25
कुलशासनहीनानां सद्दर्शनम् अकाङ्क्षिणाम्
न सिध्यति रसो देवि पिबन्ति मृगतृष्णिकाम्
kulaśāsanahīnānāṃ saddarśanam akāṅkṣiṇām
na sidhyati raso devi pibanti mṛgatṛṣṇikām
- 26
गोमांसं भक्षयेद्यस्तु पिबेदमरवारुणीम्
कुलीनं तमहं मन्ये रसज्ञम् अपरे ऽधमाः
gomāṃsaṃ bhakṣayedyastu pibedamaravāruṇīm
kulīnaṃ tamahaṃ manye rasajñam apare 'dhamāḥ
- 27
न गर्भः सम्प्रदायार्थे रसो गर्भो विधीयते
तेनायं लभते सिद्धिं न सिद्धिः सूतकं विना
na garbhaḥ sampradāyārthe raso garbho vidhīyate
tenāyaṃ labhate siddhiṃ na siddhiḥ sūtakaṃ vinā
- 28
यावन्न हरबीजं तु भक्षयेत्पारदं रसम्
तावत्तस्य कुतो मुक्तिः कुतः पिण्डस्य धारणम्
yāvanna harabījaṃ tu bhakṣayetpāradaṃ rasam
tāvattasya kuto muktiḥ kutaḥ piṇḍasya dhāraṇam
- 29
मद्यमांसरताप्रज्ञा मोहिताः शिवमायया
जल्पन्ति च वयं मुक्ता यास्यामः शिवमन्दिरम्
madyamāṃsaratāprajñā mohitāḥ śivamāyayā
jalpanti ca vayaṃ muktā yāsyāmaḥ śivamandiram
- 30
पिण्डधारणयोगे च निस्पृहा मन्दबुद्धयः
खण्डज्ञानेन देवेशि रञ्जितं सचराचरम्
piṇḍadhāraṇayoge ca nispṛhā mandabuddhayaḥ
khaṇḍajñānena deveśi rañjitaṃ sacarācaram

