166 shlokas
- 1
श्रीदेव्युवाच
द्रावणं रञ्जनं चैव पारदस्य श्रुतं मया
सारणं क्रामणं चैव क्रमादाख्यातुमर्हसि
śrīdevyuvāca
drāvaṇaṃ rañjanaṃ caiva pāradasya śrutaṃ mayā
sāraṇaṃ krāmaṇaṃ caiva kramādākhyātumarhasi
- 2
श्रीभैरव उवाच
मूषां तु गोस्तनीं कृत्वा धत्तूरकुसुमाकृतिम्
तदर्धं पूरयेत्तैलं रञ्जितं च रसं क्षिपेत्
śrībhairava uvāca
mūṣāṃ tu gostanīṃ kṛtvā dhattūrakusumākṛtim
tadardhaṃ pūrayettailaṃ rañjitaṃ ca rasaṃ kṣipet
- 3
तुषकर्षाग्निना बाह्ये मूषायास्तु प्रदापयेत्
विंशांशनागसंयुक्तं समावर्तं च खोटकम्
दीर्घसंदंशनेनैव प्रक्षिपेत्सारितं भवेत्
tuṣakarṣāgninā bāhye mūṣāyāstu pradāpayet
viṃśāṃśanāgasaṃyuktaṃ samāvartaṃ ca khoṭakam
dīrghasaṃdaṃśanenaiva prakṣipetsāritaṃ bhavet
- 4
द्विगुणेन ततो हेम्ना जायते प्रतिसारितम्
ततस्त्रिगुणहेम्ना तु जायते चानुसारितम्
dviguṇena tato hemnā jāyate pratisāritam
tatastriguṇahemnā tu jāyate cānusāritam
- 5
जारयेद्विडयोगेन प्राग्वच्चाथ पुनः पुनः
अनेन विधिना देवि भवेद्द्वेधा तु वेधकः
jārayedviḍayogena prāgvaccātha punaḥ punaḥ
anena vidhinā devi bhaveddvedhā tu vedhakaḥ
- 6
भूलताशोणितशिलाविषटङ्कणपारदम्
ताप्यं स्त्रीस्तन्यसम्पिष्टं क्रामणं क्षेपलेपयोः
bhūlatāśoṇitaśilāviṣaṭaṅkaṇapāradam
tāpyaṃ strīstanyasampiṣṭaṃ krāmaṇaṃ kṣepalepayoḥ
- 7
इन्द्रगोपो विषं कान्तं दरदं रुधिरं तथा
रसकं तिलतैलं च क्रामणं क्षेपलेपयोः
indragopo viṣaṃ kāntaṃ daradaṃ rudhiraṃ tathā
rasakaṃ tilatailaṃ ca krāmaṇaṃ kṣepalepayoḥ
- 8
भूलता माक्षिकशिला टङ्कणं रुधिरं विषम्
काकविष्ठा स्तनक्षीरं महिषीकर्णयोर्मलः
रामठं च महेशानि क्रामणं क्षेपलेपयोः
bhūlatā mākṣikaśilā ṭaṅkaṇaṃ rudhiraṃ viṣam
kākaviṣṭhā stanakṣīraṃ mahiṣīkarṇayormalaḥ
rāmaṭhaṃ ca maheśāni krāmaṇaṃ kṣepalepayoḥ
- 9
भूलता लाङ्गली शृङ्गी काकविष्ठा च शैलजम्
विष्णुक्रान्ता मधूच्छिष्टं रुधिरं द्विपदीरजः
bhūlatā lāṅgalī śṛṅgī kākaviṣṭhā ca śailajam
viṣṇukrāntā madhūcchiṣṭaṃ rudhiraṃ dvipadīrajaḥ
- 10
सुरसा ब्रह्मसोमा च गृध्रकर्णी च लक्षणा
कर्णगं महिषस्यापि क्रामणं क्षेपलेपयोः
surasā brahmasomā ca gṛdhrakarṇī ca lakṣaṇā
karṇagaṃ mahiṣasyāpi krāmaṇaṃ kṣepalepayoḥ
- 11
गण्डोलविषभेकास्यमहिषाक्षिमलं तथा
रुधिरेण समायुक्तं रससंक्रामणं परम्
gaṇḍolaviṣabhekāsyamahiṣākṣimalaṃ tathā
rudhireṇa samāyuktaṃ rasasaṃkrāmaṇaṃ param
- 12
विषं सुरेन्द्रगोपश्च रोचना गुग्गुलुस्तथा
स्त्रीस्तन्यं चैव तैर्युक्तो लोहे तु क्रमते रसः
viṣaṃ surendragopaśca rocanā guggulustathā
strīstanyaṃ caiva tairyukto lohe tu kramate rasaḥ
- 13
श्रीखण्डनिम्बनिर्यासस्त्रीस्तन्यविषटङ्कणैः
गोघृतेन समायुक्तो लोहे तु क्रमते रसः
śrīkhaṇḍanimbaniryāsastrīstanyaviṣaṭaṅkaṇaiḥ
goghṛtena samāyukto lohe tu kramate rasaḥ
- 14
अरिवर्गहतौ वङ्गनागौ द्वौ क्रामणं परम्
arivargahatau vaṅganāgau dvau krāmaṇaṃ param
- 15
मातृवाहः कुलीरश्च शङ्खाभ्यन्तरजो मलः
तथा कपित्थनिर्यासो रससंक्रामणं परम्
mātṛvāhaḥ kulīraśca śaṅkhābhyantarajo malaḥ
tathā kapitthaniryāso rasasaṃkrāmaṇaṃ param
- 16
क्रामणं रसराजस्य वेधकाले प्रदापयेत्
क्रामणं यो न जानाति श्रमस्तस्य निरर्थकः
krāmaṇaṃ rasarājasya vedhakāle pradāpayet
krāmaṇaṃ yo na jānāti śramastasya nirarthakaḥ
- 17
अतः परं प्रवक्ष्यामि हेमतारदलानि तु
ataḥ paraṃ pravakṣyāmi hematāradalāni tu
- 18
नागं सूतं समं घृष्टं गन्धद्वादशसंयुतम्
धत्तूरकरसे घृष्टा गुटिका चणकाकृतिः
nāgaṃ sūtaṃ samaṃ ghṛṣṭaṃ gandhadvādaśasaṃyutam
dhattūrakarase ghṛṣṭā guṭikā caṇakākṛtiḥ
- 19
तारस्य भागाश्चत्वारः शुल्वभागास्त्रयस्तथा
सम्यग् आवर्त्य देवेशि गुटिकैकां तु निक्षिपेत्
tārasya bhāgāścatvāraḥ śulvabhāgāstrayastathā
samyag āvartya deveśi guṭikaikāṃ tu nikṣipet
- 20
अनेन क्रमयोगेण तारे ताम्रं तु वाहयेत्
यावत्तु जायते रक्तं तारं चैव न संशयः
anena kramayogeṇa tāre tāmraṃ tu vāhayet
yāvattu jāyate raktaṃ tāraṃ caiva na saṃśayaḥ
- 21
अस्य भागद्वयं ग्राह्यं तारस्य भागपञ्चकम्
हेमभागैकसंयुक्तं द्रुतं हेमाष्टकं भवेत्
asya bhāgadvayaṃ grāhyaṃ tārasya bhāgapañcakam
hemabhāgaikasaṃyuktaṃ drutaṃ hemāṣṭakaṃ bhavet
- 22
गन्धकेन हतं शुल्वं दरदेन समन्वितम्
आर्द्रकं मूलकं शुण्ठी लशुनं हिङ्गु माक्षिकम्
gandhakena hataṃ śulvaṃ daradena samanvitam
ārdrakaṃ mūlakaṃ śuṇṭhī laśunaṃ hiṅgu mākṣikam
- 23
मर्दयेन्मातुलुङ्गेन नागपत्त्राणि लेपयेत्
पुटेन म्रियते नागः सिन्दूरारुणसंनिभः
mardayenmātuluṅgena nāgapattrāṇi lepayet
puṭena mriyate nāgaḥ sindūrāruṇasaṃnibhaḥ
- 24
तत्तारे त्रिगुणे व्यूढं निर्बीजं कनकं भवेत्
tattāre triguṇe vyūḍhaṃ nirbījaṃ kanakaṃ bhavet
- 25
गन्धपाषाणदरदतीक्ष्णखर्परसूतकैः
भागवृद्धैः समध्वाज्यैः पञ्चमांशेन लेपयेत्
gandhapāṣāṇadaradatīkṣṇakharparasūtakaiḥ
bhāgavṛddhaiḥ samadhvājyaiḥ pañcamāṃśena lepayet
- 26
पुटनाच्छुष्कपुटनात्द्विधा तारस्य कृष्णता
puṭanācchuṣkapuṭanātdvidhā tārasya kṛṣṇatā
- 27
पीतगन्धकपालाशनिर्यासेन प्रलेपितम्
पुटत्रयप्रदानेन रजतं काञ्चनं भवेत्
pītagandhakapālāśaniryāsena pralepitam
puṭatrayapradānena rajataṃ kāñcanaṃ bhavet
- 28
पीतकृष्णारुणगणं यथालाभं सुचूर्णितम्
गोसर्पिर्भावितं तारे वापेन श्वेतनाशनम्
pītakṛṣṇāruṇagaṇaṃ yathālābhaṃ sucūrṇitam
gosarpirbhāvitaṃ tāre vāpena śvetanāśanam
- 29
रक्तपीतासितगणं छागक्षीरेण भूयसा
सप्ताहं स्थापयेत्तारे निषेकाद्रक्तिवर्धनम्
raktapītāsitagaṇaṃ chāgakṣīreṇa bhūyasā
saptāhaṃ sthāpayettāre niṣekādraktivardhanam
- 30
यदा वापनिषेकाभ्यां मार्जारनयनप्रभम्
तत्तारं दलसम्प्रोक्तं मेलनं परमं मतम्
yadā vāpaniṣekābhyāṃ mārjāranayanaprabham
tattāraṃ dalasamproktaṃ melanaṃ paramaṃ matam

