382 shlokas
- 1
श्रीदेव्युवाच
ओषधी कीदृशी नाथ रसमूर्छाकरी शुभा
केन वा भस्मसूतः स्यात्केन वा खोटबन्धनम्
śrīdevyuvāca
oṣadhī kīdṛśī nātha rasamūrchākarī śubhā
kena vā bhasmasūtaḥ syātkena vā khoṭabandhanam
- 2
श्रीभैरव उवाच
शृणु भैरवि यत्नेन रहस्यं रसबन्धनम्
ब्रह्मविष्णुसुरेन्द्राद्यैर्न ज्ञातं वीरवन्दिते
śrībhairava uvāca
śṛṇu bhairavi yatnena rahasyaṃ rasabandhanam
brahmaviṣṇusurendrādyairna jñātaṃ vīravandite
- 3
गङ्गायमुनयोर्मध्ये प्रयोगो नाम राक्षसः
तस्यासन्ने वरारोहे क्षणाद्बध्येत सूतकः
gaṅgāyamunayormadhye prayogo nāma rākṣasaḥ
tasyāsanne varārohe kṣaṇādbadhyeta sūtakaḥ
- 4
निशाचरस्य पत्त्राणि गृह्णीयात्साधकोत्तमः
अधो निष्पीडितं देवि रसो भवति चोत्तमः
niśācarasya pattrāṇi gṛhṇīyātsādhakottamaḥ
adho niṣpīḍitaṃ devi raso bhavati cottamaḥ
- 5
रसं संमर्द्य तेनैव दिनानि त्रीणि वार्त्तिकः
आरोटं बन्धयेत्क्षिप्रं गगनं तत्र जारयेत्
rasaṃ saṃmardya tenaiva dināni trīṇi vārttikaḥ
āroṭaṃ bandhayetkṣipraṃ gaganaṃ tatra jārayet
- 6
तेन पत्त्ररसेनैव साधयेद्गगनं पुनः
सप्तधा भावितं तेन त्र्यूषणेन सहैकतः
यन्त्रे विद्याधरे देवि गगनं तत्र जारयेत्
tena pattrarasenaiva sādhayedgaganaṃ punaḥ
saptadhā bhāvitaṃ tena tryūṣaṇena sahaikataḥ
yantre vidyādhare devi gaganaṃ tatra jārayet
- 7
मासमात्रेण देवेशि जीर्यते तत्समं समे
समजीर्णे रसे देवि शतवेधी भवेद्रसः
māsamātreṇa deveśi jīryate tatsamaṃ same
samajīrṇe rase devi śatavedhī bhavedrasaḥ
- 8
निशाचररसे देवि गन्धकं भावयेत्ततः
भावयेत्सप्तवारं तु द्विपद्याश्च रसेन तु
niśācararase devi gandhakaṃ bhāvayettataḥ
bhāvayetsaptavāraṃ tu dvipadyāśca rasena tu
- 9
तारस्य पत्त्रलेपेन अर्धार्धकाञ्चनोत्तमम्
गन्धके समजीर्णे ऽस्मिन्शतवेधी रसो भवेत्
tārasya pattralepena ardhārdhakāñcanottamam
gandhake samajīrṇe 'sminśatavedhī raso bhavet
- 10
पुनस्तं गन्धकं दत्त्वा पत्त्रलेपे रविं हरेत्
तं रविं तारमध्ये तु त्रिगुणं वाहयेत्ततः
punastaṃ gandhakaṃ dattvā pattralepe raviṃ haret
taṃ raviṃ tāramadhye tu triguṇaṃ vāhayettataḥ
- 11
हेमार्धे मिलितं हेम मातृकासमतां व्रजेत्
पुनस्तं गन्धकं साक्षाद्द्रावयित्वा द्रुतं कुरु
hemārdhe militaṃ hema mātṛkāsamatāṃ vrajet
punastaṃ gandhakaṃ sākṣāddrāvayitvā drutaṃ kuru
- 12
रसेन्द्रं मर्दयेत्तेन गतदेहं तु कारयेत्
लेपमात्रेण तेनैव कुष्ठानष्टादश प्रिये
अर्शो भगंदरं लूतां शिरोरोगांश्च नाशयेत्
rasendraṃ mardayettena gatadehaṃ tu kārayet
lepamātreṇa tenaiva kuṣṭhānaṣṭādaśa priye
arśo bhagaṃdaraṃ lūtāṃ śirorogāṃśca nāśayet
- 13
निशाचररसे भाव्यं सप्तवारं तु तालकम्
तेनैव घातयेद्वङ्गं वङ्गं तारे तु निर्वहेत्
niśācararase bhāvyaṃ saptavāraṃ tu tālakam
tenaiva ghātayedvaṅgaṃ vaṅgaṃ tāre tu nirvahet
- 14
तं तारं जारयेत्सूते तत्सूतं बन्धनं व्रजेत्
लेपमात्रेण तेनैव चतुःषष्टितमो भवेत्
taṃ tāraṃ jārayetsūte tatsūtaṃ bandhanaṃ vrajet
lepamātreṇa tenaiva catuḥṣaṣṭitamo bhavet
- 15
चतुःषष्टितमे भागे शुल्ववेधं तु दापयेत्
शुल्वं तु दापयेत्तारे तत्तारं काञ्चनं भवेत्
तत्तारं जायते श्रेष्ठं धर्मकामार्थमोक्षदम्
catuḥṣaṣṭitame bhāge śulvavedhaṃ tu dāpayet
śulvaṃ tu dāpayettāre tattāraṃ kāñcanaṃ bhavet
tattāraṃ jāyate śreṣṭhaṃ dharmakāmārthamokṣadam
- 16
निशाचरस्य पुष्पाणि सूक्ष्मचूर्णानि कारयेत्
पलानि दश चूर्णस्य रसैर्धात्र्यास्तु भावयेत्
niśācarasya puṣpāṇi sūkṣmacūrṇāni kārayet
palāni daśa cūrṇasya rasairdhātryāstu bhāvayet
- 17
घृतेन मधुनालोड्य नवभाण्डे विनिक्षिपेत्
धान्यराशौ निधातव्यं त्रिसप्ताहं सुरेश्वरि
ghṛtena madhunāloḍya navabhāṇḍe vinikṣipet
dhānyarāśau nidhātavyaṃ trisaptāhaṃ sureśvari
- 18
तेन भक्षितमात्रेण वलीपलितवर्जितः
tena bhakṣitamātreṇa valīpalitavarjitaḥ
- 19
वल्कलं सूक्ष्मचूर्णं तु मधुना सहितं लिहेत्
अर्धमासप्रयोगेण प्रत्यक्षोऽयं भवेत्प्रिये
valkalaṃ sūkṣmacūrṇaṃ tu madhunā sahitaṃ lihet
ardhamāsaprayogeṇa pratyakṣo'yaṃ bhavetpriye
- 20
तस्य मूत्रपुरीषेण शुल्वं भवति काञ्चनम्
मासमात्रप्रयोगेण पन्नगः काञ्चनं भवेत्
tasya mūtrapurīṣeṇa śulvaṃ bhavati kāñcanam
māsamātraprayogeṇa pannagaḥ kāñcanaṃ bhavet
- 21
ग्राह्यं तत्फलतैलं वा यन्त्रे पातालसंज्ञके
तेन तैलेन देवेशि रसं संकोचयेद्बुधः
grāhyaṃ tatphalatailaṃ vā yantre pātālasaṃjñake
tena tailena deveśi rasaṃ saṃkocayedbudhaḥ
- 22
तत्क्षणाज्जायते देवि पट्टबद्धो महारसः
tatkṣaṇājjāyate devi paṭṭabaddho mahārasaḥ
- 23
कटुकं कङ्कणं कार्यं रसलिङ्गे वरानने
संकोच्य मारणं तेन कर्तव्यं परमाद्भुतम्
kaṭukaṃ kaṅkaṇaṃ kāryaṃ rasaliṅge varānane
saṃkocya māraṇaṃ tena kartavyaṃ paramādbhutam
- 24
निशाचररसे क्षिप्तं सप्तवारं तु भास्करम्
कालिकारहितं तेन जायते कनकप्रभम्
niśācararase kṣiptaṃ saptavāraṃ tu bhāskaram
kālikārahitaṃ tena jāyate kanakaprabham
- 25
तत्तारेण समं वाह्यं तेन सिक्तं तु वापितम्
दशांशं वेधयेत्सूतं दश पीतं शतेन च
tattāreṇa samaṃ vāhyaṃ tena siktaṃ tu vāpitam
daśāṃśaṃ vedhayetsūtaṃ daśa pītaṃ śatena ca
- 26
शतं वेधयते लक्षं सहस्रं कोटिवेधकम्
दशांशं कोटिवेधि स्यात्कोटिवेधि समेन च
śataṃ vedhayate lakṣaṃ sahasraṃ koṭivedhakam
daśāṃśaṃ koṭivedhi syātkoṭivedhi samena ca
- 27
पुनरन्यं प्रवक्ष्यामि रसबन्धं सुदुर्लभम्
punaranyaṃ pravakṣyāmi rasabandhaṃ sudurlabham
- 28
त्रैलोक्यजननी या स्यादोषधी अजनायिका
तस्याः सम्पर्कमात्रेण बद्धस्तिष्ठति पारदः
trailokyajananī yā syādoṣadhī ajanāyikā
tasyāḥ samparkamātreṇa baddhastiṣṭhati pāradaḥ
- 29
सप्ताहं मर्दितस्तस्या महौषध्या रसेन सः
शतांशेनैव वेधेन कुरुते दिव्यकाञ्चनम्
saptāhaṃ marditastasyā mahauṣadhyā rasena saḥ
śatāṃśenaiva vedhena kurute divyakāñcanam
- 30
द्विसप्ताहं रसे तस्या मर्दनाद्वरवर्णिनि
लक्षवेधी रसः साक्षादष्टौ लोहानि काञ्चनम्
dvisaptāhaṃ rase tasyā mardanādvaravarṇini
lakṣavedhī rasaḥ sākṣādaṣṭau lohāni kāñcanam

