28 shlokas
- 1
पराशर उवाच
रजेस्तु पञ्च पुत्रशतान्यतुलबलपराक्रमसाराण्यासन्
parāśara uvāca
rajestu pañca putraśatānyatulabalaparākramasārāṇyāsan
- 2
देवासुरसंग्रामारम्भे च परस्परवधेप्सवो देवाश्चासुराश्च ब्रह्माणम् उपेत्य पप्रच्छुः
devāsurasaṃgrāmārambhe ca parasparavadhepsavo devāścāsurāśca brahmāṇam upetya papracchuḥ
- 3
भगवन्न् अस्माकम् अत्र विरोधे कतमः पक्षो जेता भविष्यतीति
bhagavann asmākam atra virodhe katamaḥ pakṣo jetā bhaviṣyatīti
- 4
अथाह भगवान्
athāha bhagavān
- 5
येषाम् अर्थे रजिर् आत्मात्तायुधो योत्स्यति तत्पक्षो जेतेति
yeṣām arthe rajir ātmāttāyudho yotsyati tatpakṣo jeteti
- 6
अथ दैत्यैर् उपेत्य रजिर् आत्मसाहाय्यदानायाभ्यर्थितः प्राह
atha daityair upetya rajir ātmasāhāyyadānāyābhyarthitaḥ prāha
- 7
योत्स्ये ऽहं भवताम् अर्थे यद्य् अहम् अमरजयाद्भवताम् इन्द्रो भविष्यामीत्य् आकर्ण्यैतत्तैर् अभिहितम्
yotsye 'haṃ bhavatām arthe yady aham amarajayādbhavatām indro bhaviṣyāmīty ākarṇyaitattair abhihitam
- 8
न वयम् अन्यथा वदिष्यामो ऽन्यथा करिष्यामो ऽस्माकम् इन्द्रः प्रह्लादस्तदर्थम् एवायम् उद्यम इत्य् उक्त्वा गतेष्व् असुरेषु देवैर् अप्य् असाव् अवनिपतिर् एवम् एवोक्तस्तेनापि च तथैवोक्ते देवैर् इन्द्रस्त्वं भविष्यसीति समन्विच्छितम्
na vayam anyathā vadiṣyāmo 'nyathā kariṣyāmo 'smākam indraḥ prahlādastadartham evāyam udyama ity uktvā gateṣv asureṣu devair apy asāv avanipatir evam evoktastenāpi ca tathaivokte devair indrastvaṃ bhaviṣyasīti samanvicchitam
- 9
रजिनापि देवसैन्यसहायेनानेकैर्महास्त्रैस्तद् अशेषमहासुरबलं निषूदितम्
rajināpi devasainyasahāyenānekairmahāstraistad aśeṣamahāsurabalaṃ niṣūditam
- 10
अथ जितारिपक्षश्च देवेन्द्रो रजिचरणयुगलम् आत्मनः शिरसा निपीड्याह
atha jitāripakṣaśca devendro rajicaraṇayugalam ātmanaḥ śirasā nipīḍyāha
- 11
भयत्राणाद् अन्नदानाद्भवान् अस्मत्पिताशेषलोकानाम् उत्तमोत्तमो भवान्यस्याहं पुत्रस्त्रिलोकेन्द्रः
bhayatrāṇād annadānādbhavān asmatpitāśeṣalokānām uttamottamo bhavānyasyāhaṃ putrastrilokendraḥ
- 12
स चापि राजा प्रहस्याह
sa cāpi rājā prahasyāha
- 13
एवम् अस्त्व् एवम् अस्त्व् अनतिक्रमणीया हि वैरिपक्षाद् अप्य् अनेकविधचाटुवाक्यगर्भा प्रणतिर् इत्य् उक्त्वा स्वपुरं जगाम
evam astv evam astv anatikramaṇīyā hi vairipakṣād apy anekavidhacāṭuvākyagarbhā praṇatir ity uktvā svapuraṃ jagāma
- 14
शतक्रतुर् अपीन्द्रत्वं चकार
śatakratur apīndratvaṃ cakāra
- 15
स्वर्याते तु रजौ नारदर्षिचोदिता रजिपुत्राः शतक्रतुम् आत्मपितृपुत्रं समाचाराद्राज्यं याचितवन्तः
svaryāte tu rajau nāradarṣicoditā rajiputrāḥ śatakratum ātmapitṛputraṃ samācārādrājyaṃ yācitavantaḥ
- 16
अप्रदानेन च विजित्येन्द्रम् अतिबलिनः स्वयम् इन्द्रत्वं चक्रुः
apradānena ca vijityendram atibalinaḥ svayam indratvaṃ cakruḥ
- 17
ततश्च बहुतिथे काले ह्य् अतीते बृहस्पतिम् एकान्ते दृष्ट्वा अपहृतत्रैलोक्ययज्ञभागः शतक्रतुर् उवाच
tataśca bahutithe kāle hy atīte bṛhaspatim ekānte dṛṣṭvā apahṛtatrailokyayajñabhāgaḥ śatakratur uvāca
- 18
बदरीफलमात्रम् अप्य् अर्हसि ममाप्यायनाय पुरोडाशखण्डं दातुम् इत्य् उक्तो बृहस्पतिर् उवाच
badarīphalamātram apy arhasi mamāpyāyanāya puroḍāśakhaṇḍaṃ dātum ity ukto bṛhaspatir uvāca
- 19
यद्य् एवं त्वयाहं पूर्वम् एव चोदितः स्यां तन्मया त्वदर्थं किम् अकर्तव्यम् इत्य् अल्पैर् एवाहोभिस्त्वां निजं पदं प्रापयिष्यामीत्य् अभिधाय तेषाम् अनुदिनम् अभिचारकं बुद्धिमोहाय शक्रस्य तेजोऽभिवृद्धये जुहाव
yady evaṃ tvayāhaṃ pūrvam eva coditaḥ syāṃ tanmayā tvadarthaṃ kim akartavyam ity alpair evāhobhistvāṃ nijaṃ padaṃ prāpayiṣyāmīty abhidhāya teṣām anudinam abhicārakaṃ buddhimohāya śakrasya tejo'bhivṛddhaye juhāva
- 20
ते चापि तेन बुद्धिमोहेनाभिभूयमाना ब्रह्मद्विषो धर्मत्यागिनो वेदवादपराङ्मुखा बभूवुः
te cāpi tena buddhimohenābhibhūyamānā brahmadviṣo dharmatyāgino vedavādaparāṅmukhā babhūvuḥ
- 21
ततस्तान् अपेतधर्माचारान् इन्द्रो जघान
tatastān apetadharmācārān indro jaghāna
- 22
पुरोहिताप्यायिततेजाश्च शक्रो दिवम् आक्रमत्
purohitāpyāyitatejāśca śakro divam ākramat
- 23
एतद् इन्द्रस्य स्वपदच्यवनाद् आरोहणं श्रुत्वा पुरुषः स्वपदभ्रंशं दौरात्म्यं च नाप्नोति
etad indrasya svapadacyavanād ārohaṇaṃ śrutvā puruṣaḥ svapadabhraṃśaṃ daurātmyaṃ ca nāpnoti
- 24
रम्भस्त्व् अनपत्यो ऽभवत्
rambhastv anapatyo 'bhavat
- 25
क्षत्रवृद्धसुतः प्रतिक्षत्रो ऽभवत्
kṣatravṛddhasutaḥ pratikṣatro 'bhavat
- 26
तत्पुत्रः सञ्जयः तस्यापि जयः तस्यापि विजयः तस्माच्च जज्ञे कृतः
tatputraḥ sañjayaḥ tasyāpi jayaḥ tasyāpi vijayaḥ tasmācca jajñe kṛtaḥ
- 27
तस्य च हर्यधनः हर्यधनसुतः सहदेवः तस्माद् अदीनस्तस्य जयत्सेनः ततश्च संकृतिः तत्पुत्रः क्षत्रधर्मा इत्य् एते क्षत्रवृद्धस्य वंश्याः
tasya ca haryadhanaḥ haryadhanasutaḥ sahadevaḥ tasmād adīnastasya jayatsenaḥ tataśca saṃkṛtiḥ tatputraḥ kṣatradharmā ity ete kṣatravṛddhasya vaṃśyāḥ
- 28
ततो नहुषवंशं प्रवक्ष्यामि
tato nahuṣavaṃśaṃ pravakṣyāmi

