85 shlokas
- 1
पराशर उवाच
पूरोर्जनमेजयस्तस्यापि प्रचिन्वान्प्रचिन्वतः प्रवीरः प्रवीरान्मनस्युर्मनस्योश्चाभयदः तस्यापि सुद्युः सुद्योर्बहुगतः तस्यापि संयातिः संयातेर् अहंयातिः ततो रौद्राश्वः
parāśara uvāca
pūrorjanamejayastasyāpi pracinvānpracinvataḥ pravīraḥ pravīrānmanasyurmanasyoścābhayadaḥ tasyāpi sudyuḥ sudyorbahugataḥ tasyāpi saṃyātiḥ saṃyāter ahaṃyātiḥ tato raudrāśvaḥ
- 2
ऋतेषुकक्षेषुस्थण्डिलेषुकृतेषुजलेषुधर्मेषुधृतेषुस्थलेषुसंनतेषुवनेषुनामानो रौद्राश्वस्य दश पुत्रा बभूवुः
ṛteṣukakṣeṣusthaṇḍileṣukṛteṣujaleṣudharmeṣudhṛteṣusthaleṣusaṃnateṣuvaneṣunāmāno raudrāśvasya daśa putrā babhūvuḥ
- 3
ऋतेषोर् अन्तिनारः पुत्रो ऽभूत्
ṛteṣor antināraḥ putro 'bhūt
- 4
सुमतिम् अप्रतिरथं ध्रुवं चाप्यन्तिनारः पुत्रानवाप
sumatim apratirathaṃ dhruvaṃ cāpyantināraḥ putrānavāpa
- 5
अप्रतिरथस्य कण्वः पुत्रो ऽभूत्
apratirathasya kaṇvaḥ putro 'bhūt
- 6
तस्यापि मेधातिथिः
tasyāpi medhātithiḥ
- 7
यतः कण्वायना द्विजा बभूवुः
yataḥ kaṇvāyanā dvijā babhūvuḥ
- 8
अप्रतिरथस्यापरः पुत्रो ऽभूद् ऐलीनः
apratirathasyāparaḥ putro 'bhūd ailīnaḥ
- 9
ऐलीनस्य दुष्यन्ताद्याश्चत्वारः पुत्रा बभूवुः
ailīnasya duṣyantādyāścatvāraḥ putrā babhūvuḥ
- 10
दुष्यन्ताच्चक्रवर्ती भरतो ऽभूत्
duṣyantāccakravartī bharato 'bhūt
- 11
यन्नामहेतुर्देवैः श्लोको गीयते
yannāmaheturdevaiḥ śloko gīyate
- 12
माता भस्त्रा पितुः पुत्रो येन जातः स एव सः
भरस्व पुत्रं दुष्यन्त मावमंस्थाः शकुन्तलाम्
mātā bhastrā pituḥ putro yena jātaḥ sa eva saḥ
bharasva putraṃ duṣyanta māvamaṃsthāḥ śakuntalām
- 13
रेतोधाः पुत्रो नयति नरदेव यमक्षयात्
त्वं चास्य धाता गर्भस्य सत्यम् आह शकुन्तला
retodhāḥ putro nayati naradeva yamakṣayāt
tvaṃ cāsya dhātā garbhasya satyam āha śakuntalā
- 14
भरतस्य पत्नित्रये नव पुत्रा बभूवुः
bharatasya patnitraye nava putrā babhūvuḥ
- 15
नैते ममानुरूपा इत्य् अभिहितास्तन्मातरः परित्यागभयात्तत्पुत्राञ्जघ्नुः
naite mamānurūpā ity abhihitāstanmātaraḥ parityāgabhayāttatputrāñjaghnuḥ
- 16
ततो ऽस्य वितथे पुत्रजन्मनि पुत्रार्थिनो मरुत्सोमयाजिनो दीर्घतमसः पार्ष्ण्यपास्तद्बृहस्पतिवीर्याद् उतथ्यपत्न्यां ममतायां समुत्पन्नो भरद्वाजाख्यः पुत्रो मरुद्भिर्दत्तः
tato 'sya vitathe putrajanmani putrārthino marutsomayājino dīrghatamasaḥ pārṣṇyapāstadbṛhaspativīryād utathyapatnyāṃ mamatāyāṃ samutpanno bharadvājākhyaḥ putro marudbhirdattaḥ
- 17
तस्यापि नामनिर्वचनश्लोकः पठ्यते
tasyāpi nāmanirvacanaślokaḥ paṭhyate
- 18
मूढे भर द्वाजम् इमं भर द्वाजं बृहस्पते
यातौ यद् उक्त्वा पितरौ भरद्वाजस्ततस्त्व् अयम्
इति
mūḍhe bhara dvājam imaṃ bhara dvājaṃ bṛhaspate
yātau yad uktvā pitarau bharadvājastatastv ayam
iti
- 19
भरद्वाजः स तस्य वितथे पुत्रजन्मनि मरुद्भिर्दत्तः ततो वितथसंज्ञाम् अवाप
bharadvājaḥ sa tasya vitathe putrajanmani marudbhirdattaḥ tato vitathasaṃjñām avāpa
- 20
वितथस्यापि मन्युः पुत्रो ऽभवत्
vitathasyāpi manyuḥ putro 'bhavat
- 21
बृहत्क्षत्रमहावीर्यनगरगर्गा ऽभवन्मन्युपुत्राः
bṛhatkṣatramahāvīryanagaragargā 'bhavanmanyuputrāḥ
- 22
नगरस्य सङ्कृतिः सङ्कृतेर्गुरुप्रीतिरन्तिदेवौ
nagarasya saṅkṛtiḥ saṅkṛterguruprītirantidevau
- 23
गर्गाच्छिनिः ततश्च गार्ग्याः शैन्याः क्षत्रोपेता द्विजातयो बभूवुः
gargācchiniḥ tataśca gārgyāḥ śainyāḥ kṣatropetā dvijātayo babhūvuḥ
- 24
महावीर्याच्च दुरुक्षयो नाम पुत्रो ऽभवत्
mahāvīryācca durukṣayo nāma putro 'bhavat
- 25
तस्य त्रय्यारुणिः पुष्करिणः कपिश्च पुत्रत्रयम् अभूत्
tasya trayyāruṇiḥ puṣkariṇaḥ kapiśca putratrayam abhūt
- 26
तच्च पुत्रत्रितयम् अपि पश्चाद्विप्रताम् उपजगाम
tacca putratritayam api paścādvipratām upajagāma
- 27
बृहत्क्षत्रस्य सुहोत्रः
bṛhatkṣatrasya suhotraḥ
- 28
सुहोत्राद्धस्ती य इदं हस्तिनपुरम् आवासयामास
suhotrāddhastī ya idaṃ hastinapuram āvāsayāmāsa
- 29
अजमीढद्विजमीढपुरुमीढास्त्रयो हस्तिनस्तनयाः
ajamīḍhadvijamīḍhapurumīḍhāstrayo hastinastanayāḥ
- 30
अजमीढात्कण्वः
ajamīḍhātkaṇvaḥ

