21 shlokas
- 1
पराशर उवाच
पुरूरवसो ज्येष्ठः पुत्रो यस्त्वायुर्नामा स राहोर्दुहितरम् उपयेमे
parāśara uvāca
purūravaso jyeṣṭhaḥ putro yastvāyurnāmā sa rāhorduhitaram upayeme
- 2
तस्यां च पञ्च पुत्रान् उत्पादयामास
tasyāṃ ca pañca putrān utpādayāmāsa
- 3
नहुषक्षत्रवृद्धरम्भरजिसंज्ञास्तथैवानेनाः पञ्चमः पुत्रो ऽभूत्
nahuṣakṣatravṛddharambharajisaṃjñāstathaivānenāḥ pañcamaḥ putro 'bhūt
- 4
क्षत्रवृद्धात्सुहोत्रः पुत्रो ऽभवत्
kṣatravṛddhātsuhotraḥ putro 'bhavat
- 5
काश्यपकाशगृत्समदास्त्रयस्तस्य पुत्रा बभूवुः
kāśyapakāśagṛtsamadāstrayastasya putrā babhūvuḥ
- 6
गृत्समदस्य शौनकश्चातुर्वर्ण्यप्रवर्तयिताभूत्
gṛtsamadasya śaunakaścāturvarṇyapravartayitābhūt
- 7
काश्यस्य काशेयः काशीराजः तस्माद्राष्ट्रः राष्ट्रस्य दीर्घतपाः पुत्रो ऽभवत्
kāśyasya kāśeyaḥ kāśīrājaḥ tasmādrāṣṭraḥ rāṣṭrasya dīrghatapāḥ putro 'bhavat
- 8
धन्वन्तरिस्तु दीर्घतपसः पुत्रो ऽभवत्
dhanvantaristu dīrghatapasaḥ putro 'bhavat
- 9
स हि संसिद्धकार्यकरणः सकलसंभूतिष्व् अशेषज्ञानविदा भगवता नारायणेन चातीतसंभूतौ तस्मै वरो दत्तः
sa hi saṃsiddhakāryakaraṇaḥ sakalasaṃbhūtiṣv aśeṣajñānavidā bhagavatā nārāyaṇena cātītasaṃbhūtau tasmai varo dattaḥ
- 10
काशीराजगोत्रे ऽवतीर्य त्वम् अष्टधा सम्यग् आयुर्वेदं करिष्यसि यज्ञभागभुग्भविष्यसीति
kāśīrājagotre 'vatīrya tvam aṣṭadhā samyag āyurvedaṃ kariṣyasi yajñabhāgabhugbhaviṣyasīti
- 11
तस्य च धन्वन्तरेः पुत्रः केतुमान्केतुमतो भीमरथः तस्यापि दिवोदासः तस्यापि प्रतर्दनः
tasya ca dhanvantareḥ putraḥ ketumānketumato bhīmarathaḥ tasyāpi divodāsaḥ tasyāpi pratardanaḥ
- 12
स च भद्रश्रेण्यवंशविनाशनाद् अशेषशत्रवो ऽनेन जिता इति शत्रुजिद् अभवत्
sa ca bhadraśreṇyavaṃśavināśanād aśeṣaśatravo 'nena jitā iti śatrujid abhavat
- 13
तेन च प्रीतिमतात्मपुत्रो वत्स वत्सेत्यभिहितो वत्सो ऽभवत्
tena ca prītimatātmaputro vatsa vatsetyabhihito vatso 'bhavat
- 14
सत्यपरतया ऋतध्वजसंज्ञाम् अवाप
satyaparatayā ṛtadhvajasaṃjñām avāpa
- 15
ततश्च कुवलयनामानम् अश्वं लेभे ततः कुवलयाश्व इत्य् अस्यां पृथिव्यां प्रथितः
tataśca kuvalayanāmānam aśvaṃ lebhe tataḥ kuvalayāśva ity asyāṃ pṛthivyāṃ prathitaḥ
- 16
तस्य च वत्सस्य पुत्रो ऽलर्कनामाभवत्यस्यायम् अद्यापि श्लोको गीयते
tasya ca vatsasya putro 'larkanāmābhavatyasyāyam adyāpi śloko gīyate
- 17
षष्टिवर्षसहस्राणि षष्टिवर्षशतानि च
अलर्कादपरो नान्यो बुभुजे मेदिनीं युवा
ṣaṣṭivarṣasahasrāṇi ṣaṣṭivarṣaśatāni ca
alarkādaparo nānyo bubhuje medinīṃ yuvā
- 18
तस्याप्य् अलर्कस्य सन्नतिनामाभवद् आत्मजः
tasyāpy alarkasya sannatināmābhavad ātmajaḥ
- 19
सन्नतेः सुनीथः तस्यापि सुकेतुः तस्माच्च धर्मकेतुर्जज्ञे
sannateḥ sunīthaḥ tasyāpi suketuḥ tasmācca dharmaketurjajñe
- 20
ततश्च सत्यकेतुः तस्माद्विभुः तत्तनयः सुविभुः ततश्च सुकुमारस्तस्यापि दृष्टकेतुः ततश्च वीतिहोत्रः तस्माद्भार्गः भार्गस्य भार्गभूमिः ततश्चातुर्वर्ण्यप्रवृत्तिर् इत्येते काश्यपभूभृतः कथिताः
tataśca satyaketuḥ tasmādvibhuḥ tattanayaḥ suvibhuḥ tataśca sukumārastasyāpi dṛṣṭaketuḥ tataśca vītihotraḥ tasmādbhārgaḥ bhārgasya bhārgabhūmiḥ tataścāturvarṇyapravṛttir ityete kāśyapabhūbhṛtaḥ kathitāḥ
- 21
रजेस्तु संततिः श्रूयताम्
rajestu saṃtatiḥ śrūyatām

