30 shlokas
- 1
पराशर उवाच
अतः परं ययातेः प्रथमपुत्रस्य यदोर्वंशम् अहं कथयामि
parāśara uvāca
ataḥ paraṃ yayāteḥ prathamaputrasya yadorvaṃśam ahaṃ kathayāmi
- 2
यत्राशेषलोकनिवासो मनुष्यसिद्धगन्धर्वयक्षराक्षसगुह्यककिंपुरुषाप्सरोरगविहगदैत्यदानवादित्यरुद्रवस्वश्विमरुद्देवर्षिभिर्मुमुक्षिभिर्धर्मार्थकाममोक्षार्थिभिश्च तत्तत्फललाभाय सदाभिष्टुतो ऽपरिच्छेद्यमाहात्म्यांशेन भगवान् अनादिनिधनो विष्णुर् अवततार
yatrāśeṣalokanivāso manuṣyasiddhagandharvayakṣarākṣasaguhyakakiṃpuruṣāpsaroragavihagadaityadānavādityarudravasvaśvimaruddevarṣibhirmumukṣibhirdharmārthakāmamokṣārthibhiśca tattatphalalābhāya sadābhiṣṭuto 'paricchedyamāhātmyāṃśena bhagavān anādinidhano viṣṇur avatatāra
- 3
अत्र श्लोकः
atra ślokaḥ
- 4
यदोर्वंशं नरः श्रुत्वा सर्वपापैः प्रमुच्यते
यत्रावतीर्णं विष्ण्वाख्यं परं ब्रह्म निराकृति
yadorvaṃśaṃ naraḥ śrutvā sarvapāpaiḥ pramucyate
yatrāvatīrṇaṃ viṣṇvākhyaṃ paraṃ brahma nirākṛti
- 5
सहस्रजित्क्रोष्टुनलनहुषसंज्ञाश्चत्वारो यदुपुत्रा बभूवुः
sahasrajitkroṣṭunalanahuṣasaṃjñāścatvāro yaduputrā babhūvuḥ
- 6
सहस्रजित्पुत्रः शतजित्
sahasrajitputraḥ śatajit
- 7
तस्य हैहयहेहयवेणुहयास्त्रयः पुत्रा बभूवुः
tasya haihayahehayaveṇuhayāstrayaḥ putrā babhūvuḥ
- 8
हैहयपुत्रो धर्मः तस्यापि धर्मनेत्रः ततः कुन्तिः कुन्तेः सहजित्
haihayaputro dharmaḥ tasyāpi dharmanetraḥ tataḥ kuntiḥ kunteḥ sahajit
- 9
तत्तनयो महिष्मान्यो ऽसौ माहिष्मतीं पुरीं निर्वापयामास
tattanayo mahiṣmānyo 'sau māhiṣmatīṃ purīṃ nirvāpayāmāsa
- 10
तस्माद्भद्रश्रेण्यस्ततो दुर्दमस्तस्माद्धनकः धनकस्य कृतवीर्यकृताग्निकृतधर्मकृतौजसश्चत्वारः पुत्रा बभूवुः
tasmādbhadraśreṇyastato durdamastasmāddhanakaḥ dhanakasya kṛtavīryakṛtāgnikṛtadharmakṛtaujasaścatvāraḥ putrā babhūvuḥ
- 11
कृतवीर्याद् अर्जुनः सप्तद्वीपाधिपतिर्बाहुसहस्रो जज्ञे
kṛtavīryād arjunaḥ saptadvīpādhipatirbāhusahasro jajñe
- 12
यो ऽसौ भगवदंशम् अत्रिकुलप्रसूतं दत्तात्रेयाख्यम् आराध्य बाहुसहस्रम् अधर्मसेवानिवारणं स्वधर्मसेवित्वं रणे पृथिवीजयं धर्मतश्चानुपालनम्
अरातिभ्यो ऽपराजयम् अखिलजगत्प्रख्यातपुरुषाच्च मृत्युम् इत्य् एतान्वरान् अभिलषितवांल्लेभे च
yo 'sau bhagavadaṃśam atrikulaprasūtaṃ dattātreyākhyam ārādhya bāhusahasram adharmasevānivāraṇaṃ svadharmasevitvaṃ raṇe pṛthivījayaṃ dharmataścānupālanam
arātibhyo 'parājayam akhilajagatprakhyātapuruṣācca mṛtyum ity etānvarān abhilaṣitavāṃllebhe ca
- 13
तेनेयम् अशेषद्वीपवती पृथिवी सम्यक्परिपालिता
teneyam aśeṣadvīpavatī pṛthivī samyakparipālitā
- 14
दश यज्ञसहस्राण्य् असाव् अयजत्
daśa yajñasahasrāṇy asāv ayajat
- 15
तस्य च श्लोको ऽद्यापि गीयते
tasya ca śloko 'dyāpi gīyate
- 16
न नूनं कार्तवीर्यस्य गतिं यास्यन्ति पार्थिवाः
यज्ञैर्दानैस्तपोभिर्वा प्रश्रयेण श्रुतेन च
na nūnaṃ kārtavīryasya gatiṃ yāsyanti pārthivāḥ
yajñairdānaistapobhirvā praśrayeṇa śrutena ca
- 17
अनष्टद्रव्यता च तस्य राज्ये ऽभवत्
anaṣṭadravyatā ca tasya rājye 'bhavat
- 18
एवं च पञ्चाशीतिवर्षसहस्राण्य् अव्याहतारोग्यश्रीबलपराक्रमो राज्यम् अकरोत्
evaṃ ca pañcāśītivarṣasahasrāṇy avyāhatārogyaśrībalaparākramo rājyam akarot
- 19
माहिष्मत्यां दिग्विजयाभ्यागतो नर्मदाजलावगाहनक्रीडातिपानमदाकुलेनायत्नेनैव तेनाशेषदेवदैत्यगन्धर्वेशजयोद्भूतमदावलेपो ऽपि रावणः पशुर् इव बद्ध्वा स्वनगरैकान्ते स्थापितः
māhiṣmatyāṃ digvijayābhyāgato narmadājalāvagāhanakrīḍātipānamadākulenāyatnenaiva tenāśeṣadevadaityagandharveśajayodbhūtamadāvalepo 'pi rāvaṇaḥ paśur iva baddhvā svanagaraikānte sthāpitaḥ
- 20
यश्च पञ्चाशीतिवर्षसहस्रोपलक्षणकालावसाने भगवन्नारायणांशेन परशुरामेणोपसंहृतः
yaśca pañcāśītivarṣasahasropalakṣaṇakālāvasāne bhagavannārāyaṇāṃśena paraśurāmeṇopasaṃhṛtaḥ
- 21
तस्य च पुत्रशतप्रधानाः पञ्च पुत्रा बभूवुः शूरशूरसेनवृषसेनमधुजयध्वजसंज्ञाः
tasya ca putraśatapradhānāḥ pañca putrā babhūvuḥ śūraśūrasenavṛṣasenamadhujayadhvajasaṃjñāḥ
- 22
जयध्वजात्तालजङ्घः पुत्रो ऽभवत्
jayadhvajāttālajaṅghaḥ putro 'bhavat
- 23
तालजङ्घस्य तालजङ्घाख्यं पुत्रशतम् आसीत्
tālajaṅghasya tālajaṅghākhyaṃ putraśatam āsīt
- 24
एषां ज्येष्ठो वीतिहोत्रस्तथान्यो भरतः
eṣāṃ jyeṣṭho vītihotrastathānyo bharataḥ
- 25
भरताद्वृषः
bharatādvṛṣaḥ
- 26
वृषस्य पुत्रो मधुर् अभवत्
vṛṣasya putro madhur abhavat
- 27
तस्यापि वृष्णिप्रमुखं पुत्रशतम् आसीत्
tasyāpi vṛṣṇipramukhaṃ putraśatam āsīt
- 28
यतो वृष्णिसंज्ञाम् एतद्गोत्रम् अवाप
yato vṛṣṇisaṃjñām etadgotram avāpa
- 29
मधुसंज्ञाहेतुश्च मधुर् अभवत्
madhusaṃjñāhetuśca madhur abhavat
- 30
यादवाश्च यदुनामोपलक्षणाद् इति
yādavāśca yadunāmopalakṣaṇād iti

