16 shlokas
- 1
वैशंपायन उवाच
इङ्गितेनैव दाशार्हस्तम् अभिप्रायम् आदितः
द्रौणेर्बुद्ध्वा महाबाहुर् अर्जुनं प्रत्यभाषत
vaiśaṃpāyana uvāca
iṅgitenaiva dāśārhastam abhiprāyam āditaḥ
drauṇerbuddhvā mahābāhur arjunaṃ pratyabhāṣata
- 2
अर्जुनार्जुन यद्दिव्यम् अस्त्रं ते हृदि वर्तते
द्रोणोपदिष्टं तस्यायं कालः संप्रति पाण्डव
arjunārjuna yaddivyam astraṃ te hṛdi vartate
droṇopadiṣṭaṃ tasyāyaṃ kālaḥ saṃprati pāṇḍava
- 3
भ्रातॄणाम् आत्मनश्चैव परित्राणाय भारत
विसृजैतत्त्वम् अप्याजावस्त्रम् अस्त्रनिवारणम्
bhrātṝṇām ātmanaścaiva paritrāṇāya bhārata
visṛjaitattvam apyājāvastram astranivāraṇam
- 4
केशवेनैवम् उक्तस्तु पाण्डवः परवीरहा
अवातरद्रथात्तूर्णं प्रगृह्य सशरं धनुः
keśavenaivam uktastu pāṇḍavaḥ paravīrahā
avātaradrathāttūrṇaṃ pragṛhya saśaraṃ dhanuḥ
- 5
पूर्वम् आचार्यपुत्राय ततो ऽनन्तरम् आत्मने
भ्रातृभ्यश्चैव सर्वेभ्यः स्वस्तीत्युक्त्वा परंतपः
pūrvam ācāryaputrāya tato 'nantaram ātmane
bhrātṛbhyaścaiva sarvebhyaḥ svastītyuktvā paraṃtapaḥ
- 6
देवताभ्यो नमस्कृत्य गुरुभ्यश्चैव सर्वशः
उत्ससर्ज शिवं ध्यायन्न् अस्त्रम् अस्त्रेण शाम्यताम्
devatābhyo namaskṛtya gurubhyaścaiva sarvaśaḥ
utsasarja śivaṃ dhyāyann astram astreṇa śāmyatām
- 7
ततस्तद् अस्त्रं सहसा सृष्टं गाण्डीवधन्वना
प्रजज्वाल महार्चिष्मद्युगान्तानलसंनिभम्
tatastad astraṃ sahasā sṛṣṭaṃ gāṇḍīvadhanvanā
prajajvāla mahārciṣmadyugāntānalasaṃnibham
- 8
तथैव द्रोणपुत्रस्य तद् अस्त्रं तिग्मतेजसः
प्रजज्वाल महाज्वालं तेजोमण्डलसंवृतम्
tathaiva droṇaputrasya tad astraṃ tigmatejasaḥ
prajajvāla mahājvālaṃ tejomaṇḍalasaṃvṛtam
- 9
निर्घाता बहवश्चासन्पेतुर् उल्काः सहस्रशः
महद्भयं च भूतानां सर्वेषां समजायत
nirghātā bahavaścāsanpetur ulkāḥ sahasraśaḥ
mahadbhayaṃ ca bhūtānāṃ sarveṣāṃ samajāyata
- 10
सशब्दम् अभवद्व्योम ज्वालामालाकुलं भृशम्
चचाल च मही कृत्स्ना सपर्वतवनद्रुमा
saśabdam abhavadvyoma jvālāmālākulaṃ bhṛśam
cacāla ca mahī kṛtsnā saparvatavanadrumā
- 11
ते अस्त्रे तेजसा लोकांस्तापयन्ती व्यवस्थिते
महर्षी सहितौ तत्र दर्शयामासतुस्तदा
te astre tejasā lokāṃstāpayantī vyavasthite
maharṣī sahitau tatra darśayāmāsatustadā
- 12
नारदः स च धर्मात्मा भरतानां पितामहः
उभौ शमयितुं वीरौ भारद्वाजधनंजयौ
nāradaḥ sa ca dharmātmā bharatānāṃ pitāmahaḥ
ubhau śamayituṃ vīrau bhāradvājadhanaṃjayau
- 13
तौ मुनी सर्वधर्मज्ञौ सर्वभूतहितैषिणौ
दीप्तयोर् अस्त्रयोर्मध्ये स्थितौ परमतेजसौ
tau munī sarvadharmajñau sarvabhūtahitaiṣiṇau
dīptayor astrayormadhye sthitau paramatejasau
- 14
तदन्तरम् अनाधृष्यावुपगम्य यशस्विनौ
आस्ताम् ऋषिवरौ तत्र ज्वलिताविव पावकौ
tadantaram anādhṛṣyāvupagamya yaśasvinau
āstām ṛṣivarau tatra jvalitāviva pāvakau
- 15
प्राणभृद्भिर् अनाधृष्यौ देवदानवसंमतौ
अस्त्रतेजः शमयितुं लोकानां हितकाम्यया
prāṇabhṛdbhir anādhṛṣyau devadānavasaṃmatau
astratejaḥ śamayituṃ lokānāṃ hitakāmyayā
- 16
ऋषी ऊचतुः
नानाशस्त्रविदः पूर्वे ये ऽप्यतीता महारथाः
नैतद् अस्त्रं मनुष्येषु तैः प्रयुक्तं कथंचन
ṛṣī ūcatuḥ
nānāśastravidaḥ pūrve ye 'pyatītā mahārathāḥ
naitad astraṃ manuṣyeṣu taiḥ prayuktaṃ kathaṃcana

